«بۇل شارانى وتكىزۋ ەرىككەننىڭ ەرمەگى ەمەس. وكىنىشكە قاراي سوڭعى جىلدارى وتباسىنداعى اكەلەر ءرولى تومەندەپ كەتتى, بالا تاربيەسى تەك ايەلدىڭ عانا شارۋاسى سياقتى كورىنەدى, اكەلەر بۇل ىستەن سىرت قالىپ جاتادى. ال بۇل جاستاردىڭ اكە بولۋعا دايىندىعىن ناشارلاتادى, اتا-انالىق بورىشىن, اكەلىك باقىتىن سەزىنبەۋگە اكەلەدى. قازىر انالار وتباسىنداعى بارلىق ءىستى ءوز موينىنا الادى. ونىڭ ىشىندە بالا تاربيەسىنە, ونى كيىندىرۋگە, ءبىلىم بەرۋگە ءوزىن جاۋاپتى سانايدى. بىراق قانداي التىن انا بولسا دا ول اكەنىڭ ورنىن تولتىرا المايدى. فەستيۆالدىڭ وتۋىنە قۋانىشتىمىن, بۇل وتباسى بەرەكەسى مەن اكەنىڭ ءرولىن نىعايتا تۇسەدى دەپ سەنەمىن» دەدى پەداگوگ ماريونەللا سلەسار.
شاراعا قاتىسۋعا وبلىستىڭ بارلىق اۋداندارىنان 18 اكە ءوتىنىش بەرگەن ەكەن. ولار ۇيدە بالالارمەن, جۇبايىمەن قالاي قارىم-قاتىناس جاسايتىنىن, جالپى ءوزىنىڭ وتباسىنداعى كۇندەلىكتى تىرشىلىكتى بەينە تاسپاعا جازىپ, شاعىن سيۋجەت جاساپ وتكىزگەن. قازىلار القاسى سونىڭ ىشىنەن ىرىكتەپ 7 اكەنى تاڭداپ الدى. وزا شىققان جەتى اكە دوستىق ۇيىندە وتكەن فەستيۆالدە ماراپاتتالدى.
– مەن بالالارىمدى ءوزىم كورسەتكەن ۇلگىمەن تاربيەلەيمىن.ۇيدە مەنىڭ «اسقار تاۋىم» اكەم بولدى. ءبىزدى ول ۇلكەندى, انامىزدى, اكەنى سىيلاۋعا ۇيرەتتى. اتا-انامىز بىزگە ەڭبەكقورلىعىمەن, جاۋاپكەرشىلىگىمەن جانە تاتۋلىعىمەن ۇلگى كورسەتتى. مەنىڭ بالالارىم ونەرلى, اشىق مىنەزدى, اقىلدى, وتباسىنىڭ ار-ۇياتىن ويلايتىن ازاماتتار بولسا دەپ ارماندايمىن» دەدى بايقاۋعا قاتىسقان اكە مارات ىسقاقوۆ.
فەستيۆالدە جۇلدەگەر بولعان جوق, ولاردىڭ قاتىسقانىنىڭ ءوزى جەڭىسپەن بىردەي ەدى. ولار ءار ءتۇرلى اتالىمدار بويىنشا ماراپاتتالدى. سوت ورىنداۋشى بولىپ ىستەيتىن مارات ىسقاقوۆ «ەڭ ۇزدىك پاپا» نوميناتسياسى بويىنشا, ليساكوۆ قالاسىنان كەلگەن جاسۇلان شايحيتدەنوۆ «ەڭ ونەگەلى پاپا», زاڭگەر ءارى سپورتشى يلدار مۇحامەدزيانوۆ «ەڭ سپورتشى پاپا», ۇزىنكول اۋدانىنا كەلگەن شەكاراشى ەربول مامىرقانوۆ «قولى التىن پاپا», اۋليەكول اۋدانىنان كەلگەن ونەر مەكتەبىنىڭ مۇعالىمى ازامات ساقاۋوۆ «ەڭ شىعارماشىل پاپا», قوعامدىق جۇمىستارعا بەلسەنە قاتىساتىن قوستانايلىق اۆتوسلەسار الەكساندر پەتروۆ «قوعامدىق بەلسەندى پاپا», مايلين اۋدانىنىڭ تۇرعىنى, دەنەشىنىقتىرۋ ءپانىنىڭ مۇعالىمى رەنات كاريموۆ «ەڭ ۇلگىلى اكە» اتاندى. ولار ماراپاتتارىن قوساعىمەن قوسا اعارىپ وتىرعان قاريالار مىرزاباي مەن شاريزات جامانباليندەردىڭ قولىنان الدى, باقىتتى قاريالار ولارعا باتاسىن بەردى.
قوستاناي
