دەنساۋلىق ساقتاۋ ءمينيسترى ەلجان ءبىرتانوۆ دەنساۋلىق ساقتاۋ جۇيەسىن مەديتسينالىق قىزمەتتى مەديتسينالىق ساقتاندىرۋ بويىنشا كورسەتۋگە دايىنداۋ تۋرالى باياندادى. قازىر دايىندىق جۇمىستارى بەس نەگىزگى باعىت بويىنشا جۇرگىزىلۋدە: قۇقىقتىق بازانى قالىپتاستىرۋ, دەنساۋلىق ساقتاۋ مينيسترلىگىنىڭ اقپاراتتىق جۇيەلەرىن جاقسارتۋ, قورعا اۋدارىلعان اقشاعا مونيتورينگ جۇرگىزۋ جانە ساقتاندىرىلعان ادامداردى ەسەپتەۋ, اقپاراتتىق-ءتۇسىندىرۋ جۇمىستارى, قاراعاندى وبلىسىندا مەديتسينالىق ساقتاندىرۋدىڭ قاناتقاقتى جوباسىن ەنگىزۋ.
1 قىركۇيەكتەن باستاپ ەنگىزىلگەن مەديتسينالىق ساقتاندىرۋدى تەستىلەۋ الدىن الا ماسەلەلەردى انىقتاۋعا جانەمامس-كە تولىق كوشۋ كەزىندە تاۋەكەلدەردى جويۋعا كومەكتەسەدى. ە.ءبىرتانوۆ وزگە دە مەملەكەتتىك ورگاندارمەن بىرلەسىپ شەشۋدى تالاپ ەتەتىن بىرنەشە ماسەلەنى اتادى. «مەديتسينالىق ساقتاندىرۋ تابىستى جۇمىس ىستەۋ ءۇشىن حالىقتى بارىنشا كوبىرەك تارتۋ كەرەك. مەديتسينالىق ساقتاندىرۋ قورى ساقتاندىرىلعان ادامداردىڭ سانىن تۇراقتى تۇردە ەسەپتەپ, مونيتورينگ جۇرگىزەدى. بۇگىنگى تاڭدا ءبىزدىڭ باعالاۋىمىز بويىنشا, ازاماتتاردىڭ 94,6%-ى ءمامس جۇيەسىمەن قامتىلعان, ال حالىقتىڭ شامامەن 5,4%-ى نەمەسە 1 ملن ادام ساقتاندىرىلماعان», دەدى دەنساۋلىق ساقتاۋ ءمينيسترى.
ءوزىن-ءوزى جۇمىسپەن قامتىعان حالىقتى وزەكتەندىرۋ ماسەلەسى بويىنشا ۆەدومستۆو باسشىسى 2,7 ملن ادامنىڭ 687,7 مىڭىنىڭ مارتەبەسى انىقتالماعانىن اتاپ ءوتتى. سونىمەن قاتار مينيستر ەڭبەك جانە سالىق زاڭدارىنىڭ ورىندالۋىنا باقىلاۋدى كۇشەيتۋ قاجەت ەكەنىن ەسكە سالدى. سەلەكتورلىق رەجىمدەگى كەڭەسكە وڭىرلەردەگى اكىمدىكتەردىڭ, دەنساۋلىق ساقتاۋ باسقارمالارىنىڭ وكىلدەرى قاتىستى, ولار مەديتسينالىق ساقتاندىرۋدى ەنگىزۋگە تەحنيكالىق دايىندىق, 2020 جىلدىڭ قاڭتارىنان باستاپ مەديتسينالىق كومەك كورسەتۋدەگى وزگەرىستەر جايلى حالىقتى حاباردار ەتۋ تۋرالى باياندادى.
«مەديتسينالىق ساقتاندىرۋ ءاربىر تۇرعىنعا اسەر ەتەدى, سوندىقتان مەملەكەتتىك ورگاندار ساقتاندىرۋ مەديتسيناسىنا بىرقالىپتى كوشۋ ءۇشىن بارلىق قاجەتتى شارالاردى قابىلداۋى ءتيىس. ولار ۇيلەسىمدى جانە ءوزارا جۇيەلى جۇمىس ىستەۋى ءتيىس. ەڭ باستى ماسەلە – بالالاردان باستاپ ەرەسەكتەردىڭ بارلىعىن ەسەپكە الۋ قاجەت. وسى ايدا حالىق مارتەبەسىن وزەكتەندىرۋ, ءمامس جۇيەسىنە جەڭىلدىك جاسالعان ساناتتار بويىنشا قاتىسۋشىلاردى رەتتەۋ جۇمىستارىن اياقتاۋ كەرەك», دەدى ب.ساپارباەۆ.
سونىمەن قاتار اكىمدىكتەرگە 1 قازانعا دەيىن مەديتسينالىق ۇيىمداردى كومپيۋتەرمەن جابدىقتاۋ جانە ينتەرنەتپەن قامتۋ جۇمىستارىن اياقتاۋدى تاپسىردى, دەپ حابارلادى پرەمەر-ءمينيستردىڭ ءباسپاسوز قىزمەتى.
