بيىل دا ءبىلىم كۇنىنە وراي, جامبىل اۋدانىنا قاراستى اسا اۋىلىنداعى «بايتەرەك» شاعىن اۋدانىندا جاڭا تۇرعىن ءۇي پايدالانۋعا بەرىلدى. وعان جامبىل وبلىسىنىڭ اكىمى اسقار مىرزاحمەتوۆ ارنايى قاتىسىپ, پاتەر يەلەرىنە كىلتتەردى سالتاناتتى جاعدايدا تاپسىردى. ال بۇل باسپانا تۇرعىندارعا ارەندالىق نەگىزدە بەرىلىپ وتىر. پاتەرلەر نەگىزىنەن كوپ بالالى جانە تولىق ەمەس وتباسىلارعا بەرىلدى.
اسا اۋىلىندا بارلىعى 18 وتباسى قونىس تويىن تويلاۋدا. اۋداندىق بيۋدجەتتەن قاراستىرىلعان قارجىعا بوي كوتەرگەن قۇرىلىستى «بينوم» جاۋاپكەرشىلىگى شەكتەۋلى سەرىكتەستىگى جۇرگىزگەن. جوبا قۇنى 146,9 ميلليون تەڭگەنى قۇرايدى.
وبلىس بويىنشا كوپ بالالى وتباسىلاردى تۇرعىن ۇيمەن قامتاماسىز ەتۋ ماقساتىندا ۇستىمىزدەگى جىلدىڭ ءبىرىنشى جارتى جىلدىعىندا 120 كوپ بالالى وتباسىنا پاتەر كىلتى تاپسىرىلعانىن ايتا كەتەيىك. ونىڭ 93-ءى ارەندالىق ءۇي بولسا, 27-ءسى دەمەۋشىلەر ەسەبىنەن بەرىلدى. وڭىردە جىل سوڭىنا دەيىن 493 كوپ بالالى وتباسىن تۇرعىن ۇيمەن قامتاماسىز ەتۋ جوسپارلانعان بولاتىن.
سونداي-اق تۇرعىن ءۇي كەزەگى كەلگەنگە دەيىن كوپ بالالى وتباسىلاردىڭ تۇرعىن ءۇي ماسەلەسىن ۋاقىتشا شەشۋ ءۇشىن 612 پاتەرلى 12 جاتاقحانا قۇرىلىسىنا ءتيىستى قاراجات قاراستىرىلىپ, جىل سوڭىنا دەيىن پايدالانۋعا بەرىلەدى دەپ كۇتىلۋدە. سونىمەن قاتار «نۇرلى جەر» باعدارلاماسى اياسىندا ۇستىمىزدەگى جىلى بارلىعى 17,6 ميلليارد تەڭگەگە 30 كوپقاباتتى 2 118 پاتەرلى تۇرعىن ءۇيدىڭ قۇرىلىسى جۇرگىزىلىپ, جىل سوڭىنا دەيىن 28 كوپقاباتتى 1988 پاتەرلى تۇرعىن ۇيلەر پايدالانۋعا بەرىلەتىن بولادى.
جالپى, كونستيتۋتسيا كۇنى جانە ءبىلىم كۇنى مەرەكەلەرىنە وراي, وبلىس بويىنشا 800-گە جۋىق پاتەردى قۇرايتىن 11 كوپقاباتتى تۇرعىن ءۇي پايدالانۋعا بەرىلدى. ونىڭ 9-ى تاراز قالاسىندا بولسا, 2-ەۋى جامبىل جانە تالاس اۋداندارىنا تيەسىلى.
جامبىل وبلىسى
