كورەيالىق اقىن: ازيا ادەبيەتى ەۋروپا ادەبيەتىن جاسارتتى، تىڭ لەپ قوستى

رۋحانيات • 04 قىركۇيەك، 2019

كورەيالىق اقىن: ازيا ادەبيەتى ەۋروپا ادەبيەتىن جاسارتتى، تىڭ لەپ قوستى

75 رەت كورسەتىلدى

ازيالىق اقىن-جازۋشىلاردىڭ جيىنى 300-دەن استام قالامگەردىڭ باسىن قوستى. ونىڭ ىشىندە، 38 مەملەكەتتەن نوبەل سىيلىعىنىڭ نومينانتتارى، بۋكەر جانە ASEAN سىيلىقتارىنىڭ لاۋرەاتتارى، ۇلتتىق، مەملەكەتتىك سىيلىقتاردىڭ يەگەرلەرى ءھام جازۋشىلار وداعى مەن اسسوتسياتسيالارىنىڭ توراعالارى سىندى 70-كە جۋىق شەتەل قالامگەرلەرى بار.

مارجان ءابىش

ادەبي فورۋمنىڭ پلەنارلىق وتىرىسىندا نوبەل سىيلىعىنىڭ نومينانتتارى كو ىن (وڭتۇستىك كورەيا)، موزا ءال-مالكي (قاتار)، مەند-ووەو (موڭعوليا)، وڭتۇستىك ازيا حالىقارالىق سىيلىعىنىڭ لاۋرەاتى امار ميترا (ينديا)، ءازىربايجاننىڭ حالىق جازۋشىسى انار راسۋل رزاەۆ جانە ت.ب. سپيكەرلەر بايانداما جاسادى.

حالىقارالىق «مانحە» ادەبي سىيلىعىنىڭ، «گريففين» پوەزيا سىيلىعىنىڭ لاۋرەاتى، ادەبيەت سالاسى بويىنشا نوبەل سىيلىعىنىڭ نومينانتى كورەيالىق كو ىن ارقا توسىندەگى اۋقىمدى شارانىڭ ازيا ادەبيەتى تاريحىندا بالاماسى جوق ەكەنىن اتادى.

«بۇگىنگى جاعدايدى زەردەلەي وتىرىپ، ازيانىڭ ءاربىر بولىگى، ءاربىر ەلى، مادەنيەتى ءوزىنىڭ تۇپنۇسقا بەينەسىن تاپسا دەگەن ويعا كەلدىم. ازيا ەۋروپا سياقتى ءبىرتۇتاس ەمەس ەكەنى انىق. ەۋروپا ەرتە بىرىگىپ، جالپى العاندا ءبىر دىنگە باس ۇردى. بىراق ءبىزدىڭ كەيبىر كورشىلەر ەۋروپا ەلدەرىمەن تۋىستاسىپ كەتتى. ازيادا مۇنداي تۇتاستىق مۇمكىن ەمەس. ازيا تابيعي ەرەكشەلىكتەردىڭ، تاۋ مەن دالانىڭ، ءشول مەن كولدىڭ استاسىپ جاتقان الەمى. وسى اركەلكىلىك ادەبيەتكە دە ءتان. ازيانىڭ دىندەرى مەن فيلوسوفيالىق جۇيەسى دە تەرەڭ ءارى كۇردەلى. ەڭ العاش ازيا وركەنيەتى سكيفتەردەن تارادى. كەيىن ول قارا تەڭىز ارقىلى بۇكىل الەمگە تارادى. ازيا قايتادان تۇلەپ، جاڭا نۇكتەدەن باستاۋى كەرەك دەگەن ويلار دا ايتىلادى. مەنىڭشە، ارقايسىمىز ەركىن بولۋىمىز كەرەك. باتىسقا باعدار رەتىندە قاراۋدان باس تارتۋىمىز قاجەت. ءتىپتى كەي جاعدايدا ازيا ادەبيەتى ەۋروپا ادەبيەتىن جاسارتتى، تىڭ لەپ قوستى. باۋىرلاس جاۋزشىلارعا قاراپ وتىرىپ، ازيا ادەبيەتى – بۇگىننىڭ ادەبيەتى، ازيانىڭ ادەبيەتى – جاڭا عالامشارلىق ادەبيەت دەگەن ويعا كەلدىم»، – دەدى كورەيالىق اقىن.

كونگرەسس-ورتالىقتا ءوتىپ جاتقان جيىن اياسىندا «ازيا ادەبيەتىنىڭ جاۋھارلارى» اتتى كىتاپ كورمەسى ۇيىمداستىرىلدى. فورۋم باعدارلاماسىندا TED فورماتىنداعى «ASIAN LitTALKS» فورسايت سەسسياسى، كورنەكتى جازۋشىلاردىڭ جەكە شەبەرحاناسى، «قالامگەرلەر اللەياسىنىڭ» اشىلۋى، ورتالىق ازيا قالامگەرلەرى مەن جاس اقىن-جازۋشىلاردىڭ شىعارماشىلىق كەزدەسۋى، ت.ب. ءىس-شارالار بار.

ەلوردانىڭ تورىندە جينالعان قالامگەرلەر قاۋىمى ءۇش كۇنگە سوزىلاتىن فورۋمدا ازيا ادەبيەتىنىڭ دامۋ ۇدەرىسى، ازيالىق اۆتورلاردىڭ قۇقىقتارىن قورعايتىن ورتاق بىرلەستىك قۇرۋ، ازيا ەلدەرى قالامگەرلەرى اراسىندا حالىقارالىق كولەمدى سىيلىق تاعايىنداۋ سىندى ماسەلەلەردى تالقىلاماق.

ادەبي جيىننىڭ قورىتىندىسىندا دەلەگاتتار ازيا ادەبيەتىنىڭ دامۋىنا بايلانىستى ۇندەۋ جاريالايدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز