قازاقستان رەسپۋبليكاسى پرەزيدەنتىنىڭ جولداۋىندا جۇكتەلگەن مىندەتتەر ءبىزدىڭ ۋنيۆەرسيتەتتىڭ بولاشاق قىزمەتىنە باعدار بولادى دەپ كۇتىلۋدە.
جولداۋدىڭ «الەۋمەتتىك جاڭعىرۋدىڭ جاڭا كەزەڭى» بولىمىندە ءبىلىم بەرۋ ساپاسىن ارتتىرۋ جانە ەڭبەك رەسۋرستارىنىڭ بالانسىن ەسەپكە الۋدىڭ ءتيىمدى ادىستەمەسىن ازىرلەۋ, مامانداردى دايارلاۋدىڭ وتاندىق جۇيەسىن جەتىلدىرۋ, وقۋشىلاردىڭ قابىلەتتەرىن انىقتاۋعا نەگىزدەلگەن كاسىپتىك باعدار بەرۋ ساياساتىنا كوشۋ سياقتى باسىمدىقتارعا ەرەكشە كوڭىل ءبولىندى. بۇل ساياسات ورتا ءبىلىم بەرۋدىڭ ۇلتتىق ستاندارتىنىڭ نەگىزىن قۇراۋى كەرەك. تەحنيكالىق مامانداردى ساپالى دايارلاۋدى كەڭەيتۋ, قالالىق جانە اۋىلدىق مەكتەپتەر اراسىنداعى ورتا ءبىلىم ساپاسىنداعى الشاقتىقتى ازايتۋ, اۋىلدىق جەرلەردە بىلىكتى مۇعالىمدەردىڭ جەتىسپەۋىن ازايتۋ, «ديپلوممەن – اۋىلعا» باعدارلاماسىنىڭ اياسىن كەڭەيتۋ, جۇمىستى جاڭا دەڭگەيدە جالعاستىرۋ جانە وسى باعدارلامانى قارجىلاندىرۋدى 20 ملرد تەڭگەگە دەيىن ارتتىرۋ كەرەك ەكەنىن ايتتى. دارىندى اۋىل جاستارىن ىرىكتەۋ جانە ونى وتاندىق جانە شەتەلدىك ۋنيۆەرسيتەتتەردە وقۋعا دايىنداۋ, از قامتىلعان جانە كوپ بالالى وتباسىلاردان شىققان دارىندى بالالاردى قولداۋ بويىنشا جول كارتاسىن ازىرلەۋ قاجەتتىلىگى اتاپ كورسەتىلدى.
پرەزيدەنت سونىمەن بىرگە جوعارى ءبىلىم بەرۋ مەن مەكتەپ وقۋلىقتارىنىڭ ساپاسى, عىلىمنىڭ تيىمدىلىگىن ارتتىرۋ, تۇلەكتەردىڭ 60 پايىز جۇمىسپەن قامتىلۋىن قامتاماسىز ەتۋ ماسەلەلەرىنە توقتالدى. وقۋشىلاردى ساپالى وقۋلىقتارمەن قامتاماسىز ەتۋ ءتيىستى مينيسترلىكتىڭ تىكەلەي مىندەتى. ەگەر ءبىز مۇعالىمدەر مەن وقىتۋشىلاردىڭ الەۋمەتتىك جاعدايىن جاقسارتپاساق, بۇل شارالار ناتيجە بەرمەيدى. الداعى ءتورت جىل ىشىندە مۇعالىمدەردىڭ جالاقىسىن ەكى ەسەگە ارتتىرۋ جوسپارلانۋدا. بۇل كەلەسى جىلدان باستاپ مۇعالىمدەردىڭ جالاقىسى 25 پايىزعا وسەدى دەگەن ءسوز. ۇلتتىڭ الەمدىك دەڭگەيگە ىلگەرىلەۋىن قامتاماسىز ەتۋ ءۇشىن عىلىمي زەرتتەۋلەردىڭ دەڭگەيىن كوتەرۋ جانە ونى پراكتيكادا قولدانۋ قاجەت ەكەنى ايتىلدى.
اباي اتىنداعى قازۇپۋ پەداگوگيكالىق ۋنيۆەرسيتەت رەتىندە ەڭ الدىمەن جوعارى ءبىلىم مەن وقۋلىقتاردىڭ ساپاسىن جاڭارتۋعا, سونىمەن قاتار عىلىمنىڭ تيىمدىلىگىن ارتتىرۋعا مۇددەلى. ۋنيۆەرسيتەت ۇجىمى جولداۋ عىلىمي زەرتتەۋلەردىڭ ودان ءارى دامۋىنا جانە ولاردى پراكتيكادا قولدانۋ اياسىنىڭ كەڭەيۋىنە نۇسقايتىندىعىن قۋانا قابىلدادى. سونداي-اق قوعامدىق پىكىردىڭ تيىمدىلىگى تۋرالى شارانى قولدايدى. قوعامدىق سۇحبات, اشىقتىق, قىزىعۋشىلىق تانىتقان تۇلعالاردىڭ قاجەتتىلىكتەرىنە جەدەل دەن قويۋ ۋنيۆەرسيتەت جۇمىسىنداعى باستى باسىمدىق بولىپ تابىلادى. ءبىرىنشى باسشىمىز - رەكتور تاكير بالىقباەۆتان باستاپ بارلىق پروفەسسور-وقىتۋشىلار قۇرامى ستۋدەنتتەرمەن جانە ولاردىڭ اتا-انالارىنىڭ ۇسىنىس-پىكىرلەرىن تىڭداۋعا دايىن. رەكتور بلوگى ۇنەمى جۇمىس ىستەيدى.
