وڭىردەگى وقۋشىلاردىڭ ۇبت-عا قاتىسۋ ۇلەسى 5 پايىزعا ارتىپ, 76 پايىزدى قۇرادى. شەتەلدىك جوعارى وقۋ ورىندارىنا وقۋعا كەتەتىن تۇلەكتەر قاتارى دا ءبىرشاما ازايعان. بۇل كورسەتكىش 2016 جىلى 1800 بولسا, بيىل 583-كە تۇسكەن. بيىلعى وبلىس تۇلەكتەرىنىڭ 40 پايىزى تەگىن وقۋعا مۇمكىندىك الىپتى. وبلىس بيۋدجەتىنەن وسى ماقساتقا قوسىمشا 400 گرانت ءبولىنىپتى. وسكەمەندە وتكەن ايماقتاعى ءبىلىم بەرۋ قىزمەتكەرلەرىنىڭ تامىز كونفەرەنتسياسىندا وبلىس اكىمى دانيال احمەتوۆ وسىنداي دەرەكتەردى كەلتىردى. «شىعىس قازاقستانداعى بارلىق 655 مەكتەپتى جاڭا موديفيكاتسيا كومپيۋتەرلەرىمەن جانە ينتەراكتيۆتى پانەلدەرمەن جابدىقتاۋدى اياقتادىق. ەكى جىل ىشىندە 1125 مۇعالىم ءىت ماماندىعىن يگەردى. بيىل سەمەي قالاسىندا الەمنىڭ ۇزدىك تەحنولوگيالارىن وقىتاتىن يننوۆاتسيالىق مەكتەپتىڭ جوباسىن جاسايمىز. وسكەمەندە 700 ورىندىق دارىندى بالالارعا ارنالعان مامانداندىرىلعان ماتەماتيكا مەكتەبىن اشامىز. ونىڭ 320-سى اۋداندار مەن قالالاردان كەلەتىن بالالارعا ارنالاتىن بولادى» دەدى ايماق باسشىسى.
كونفەرەنتسيا بارىسىندا جىلداعى ءداستۇر بويىنشا ءوڭىردىڭ ۇزدىك ءبىلىم وشاقتارى انىقتالدى. كوكپەكتى اۋدانىنداعى ج.بولعانباەۆ اتىنداعى سامار ورتا مەكتەبى «ۇزدىك ورتا ءبىلىم بەرۋ ۇيىمى», سەمەي قالاسىنداعى ەلەكتروتەحنيكالىق كوللەدج «ۇزدىك تەحنيكالىق-كاسىپتىك ءبىلىم بەرۋ ۇيىمى» بايقاۋلارىنىڭ جەڭىمپازى دەپ تانىلىپ, ەكى مەكەمەنىڭ باسشىلارىنا 34 ميلليون تەڭگەنىڭ سەرتيفيكاتى تابىستالدى. ال اياگوزدىك باقتىگۇل اسىلحانوۆا «ۇزدىك ترەنەر» اتانىپ, 500 مىڭ تەڭگە كولەمىندەگى اقشالاي سىيلىققا يە بولسا, 170 مىڭ تەڭگە كولەمىندەگى سەرتيفيكات تكت حالىقارالىق ەمتيحانىنىڭ قورىتىندىسى بويىنشا اعىلشىن ءتىلىنىڭ ادىستەمەسىنەن جوعارى كورسەتكىشكە يە بولعان ءۇرجار اۋدانى ابىلايحان اتىنداعى ورتا مەكتەپ-بالاباقشاسىنىڭ اعىلشىن جانە فرانتسۋز تىلدەرى ءپانىنىڭ مۇعالىمى گۇلجان سوۆەتوۆاعا بۇيىردى.
ءبىر قۋانىشتىسى, دانيال احمەتوۆ شارا بارىسىندا وسكەمەندىك 10 مۇعالىمگە پاتەر كىلتتەرىن تابىس ەتتى. ورايى كەلگەندە ايتا كەتەيىك, وسكەمەن قالالىق تامىز كەڭەسىندە دە 7 ەر مۇعالىمگە پاتەر كىلتى تارتۋ ەتىلگەن-ءدى. «سوندا, جالپى سانى 17 ۇستازىمىز جاڭا وقۋ جىلىندا جاڭا قونىسقا كوشەتىن بولادى. پاتەر يەلەرى اتانعان مۇعالىمدەردىڭ 10-ى ەر ادامدار, كوپشىلىگى جاس ماماندار. بۇل ماماندار تاپشىلىعى ماسەلەسىن شەشۋگە, ەر ادامداردى مەكتەپكە تارتۋ بويىنشا قاعيدامىزدى ىسكە اسىرۋعا ارنالعان قادامدار. ەستەرىڭىزدە بولسا, بىلتىرعى تامىز كەڭەسىندە ەر مۇعالىمدەردى پاتەرمەن قامتۋعا كوڭىل بولەتىنىمىزدى ايتقان ەدىم. ءبىز بۇل باعىتتاعى جۇمىستارىمىزدى جالعاستىرامىز, ەر مۇعالىمدەردى قالا مەكتەپتەرىنە جۇمىسقا شاقىرامىز» دەيدى وسكەمەن قالاسىنىڭ اكىمى جاقسىلىق ومار.
شىعىس قازاقستان وبلىسى
