قاسىم-جومارت توقاەۆتىڭ جولداۋىنىڭ مازمۇنىنا اقپاراتتىق كەڭىستىكتى تالداۋ نەگىز بولعانداي. ياعني, بۇقارالىق اقپارات قۇرالدارىندا كوتەرىلگەن پروبلەمالاردىڭ بىرقاتارى كورىنىس تاپتى دەپ ويلايمىن. پرەزيدەنت سول پروبلەمالارعا جولداۋ اياسىندا جاۋاپ بەردى.
زەينەتاقى جۇيەسىنە, ەكونوميكالىق وسىمگە, ساياسي جاڭعىرۋعا جانە باسقالارىنا قاتىستى ماڭىزدى ماسەلەلەردىڭ بارلىعى قامتىلدى. ماسەلەن, 5 پايىز كولەمىندەگى قوسىمشا زەينەتاقى تولەمى تاقىرىبى قوعامدا قىزۋ تالقىلانعانى بەلگىلى. ق.توقاەۆتىڭ جولداۋىندا ونى تولەيتىن كاسىپكەرلەر تاراپىنىڭ دا, حالىقتىڭ دا مۇددەسى ەسكەرىلدى. ەكى تاراپ تا وزدەرىنە قاجەتتى جاۋاپ الدى. الەۋمەتتىك تولەمدەرگە قاتىستى تۇرعىنداردى الاڭداتقان جايتتار, اگروونەركاسىپ كەشەنىندەگى پروبلەمالار, مەمقىزمەتتىڭ تيىمدىلىگى سىندى ماسەلەلەردىڭ بارلىعى جاۋاپسىز قالعان جوق.
مەن ساياسي جۇيەنى دامىتۋدى اتاپ وتكىم كەلەدى. پرەزيدەنت ەكونوميكانى دامىتۋدى ساياسي جۇيەنى جاڭعىرتۋدان بولەك جۇرگىزۋ مۇمكىن ەمەستىگىنە ەرەكشە توقتالدى. پارلامەنت مىندەتتى تۇردە كوپپارتيالى بولۋ كەرەك دەگەن پىكىردى قولدايتىنىن ءبىلدىردى. ميتينگ تۋرالى زاڭنامانى جەتىلدىرۋ, ازاماتتاردىڭ ءوز ويىن ەركىن بىلدىرۋىنە مۇمكىندىك بەرۋ, بالاما سىندارلى ساياسي كوزقاراستاردىڭ بولۋى سىندى ماسەلەلەردىڭ ايتىلعانى وتە دۇرىس بولدى دەپ ەسەپتەيمىن.
قازىرگى تاڭدا بيلىك تىم اۋقىمدى دۇنيەلەردەن بۇرىن, تۇرعىنداردىڭ قاجەتتىلىگىنە جەدەل نازار اۋدارۋعا باسىمدىق بەرەتىنى بايقالدى. باسىمدىقتار ايقىندالدى, ەندىگى ماسەلە – پرەزيدەنت كوتەرگەن باستامالاردى, جۇكتەگەن مىندەتتەردى جۇزەگە اسىرۋ. مەنىڭشە, بيلىك ورگاندارىنداعى ءبىراز شەنەۋنىكتىڭ جۇمىس ءستيلىن وزگەرتۋىنە, جاعدايعا بەيىمدەلۋىنە تۋرا كەلەدى. ارينە بۇل ەلىمىزدەگى احۋالدىڭ جاقسى جاعىنا وزگەرۋىنە اسەر ەتەدى.
پرەزيدەنت جولداۋى وتە اۋقىمدى, كوپتەگەن ماسەلەنى قامتىعان اۋقىمدى قۇجات. مەملەكەت باسشىسى ايتقان تاپسىرمالاردىڭ, قولعا الىناتىن جۇمىستاردىڭ ارقايسىسىن جۇزەگە اسىرۋعا ۋاقىت كەرەك. ايتالىق, ميتينگكە رۇقسات بەرۋگە قاتىستى جۇمىستار بىرنەشە اپتادا شەشىلۋى مۇمكىن. ال زەينەتاقى جۇيەسىن وڭتايلاندىرۋعا ودان كوبىرەك, بالكىم جارتى جىلداي ۋاقىت كەرەك بولار. مەملەكەتتىك قىزمەت سالاسى, اكىمدەردىڭ رەيتينگتەرىن انىقتاۋ, جۇمىستارىن باعالاۋ سىندى جۇمىستاردى جۇزەگە اسىرۋعا بىرنەشە جىل كەتۋى مۇمكىن. ارينە مەن بارلىعىن شارتتى تۇردە ايتىپ وتىرمىن. قالاي بولعاندا دا, جولداۋ مازمۇنىنداعى ماسەلەلەر ساتىلاپ ىسكە اسىرىلاتىن بولادى.
عازيز ابىشەۆ,
ساياساتتانۋشى
