ەكونوميكا سالاسىندا شاعىن جانە ورتا بيزنەستى قولداۋ جۇيەسىن «قايتا جۇكتەۋ» ماسەلەلەرىنە ايرىقشا نازار اۋدارىلدى. باسىمدىق جاڭا جۇمىس ورىندارىن قۇرۋى ءتيىس, قوسىمشا سالىق تۇسىمدەرىن ۇلعايتاتىن جاڭا جوبالارعا بەرىلۋى قاجەت. سونىمەن قاتار وتباسىلىق شاعىن جانە ميكروبيزنەستەر قۇرۋدى ىنتالاندىرۋعا, كوپ بالالى انالارعا ۇيدە وتىرىپ جۇمىس ىستەۋ مۇمكىندىگىن بەرۋگە كۇش سالىنۋى ءتيىس.
شوب-تى, اسىرەسە ونىمدىلىگى جوعارى, ەكسپورتقا باعدارلانعان وتاندىق وندىرۋشىلەردى قارجىلىق, سالىقتىق جانە اكىمشىلىك ىنتالاندىرۋ شارالارىن جۇزەگە اسىرۋ قاراستىرىلعان. اوك سەكتورىندا سۋارمالى القاپتاردى ۇلعايتۋ, اۋىل شارۋاشىلىعى شيكىزاتتارىن وڭدەۋ ۇلەسىن ارتتىرۋ, سونداي-اق ەكونوميكالىق اينالىمعا تارتۋ ءۇشىن پايدالانىلماي جاتقان جەرلەردى الىپ قويۋ جونىندەگى جۇمىستاردى بەلسەندىرۋگە تاپسىرما بەرىلدى.
پرەزيدەنت كۆازيمەملەكەتتىك سەكتوردىڭ تيىمدىلىگىن ارتتىرۋ, مەملەكەتتىك كاسىپورىندار سانىن قىسقارتۋ, مەملەكەتتىك ساتىپ الۋ ۇدەرىستەرىن ودان ءارى جەتىلدىرۋ, باعا قالىپتاستىرۋ, اسىرەسە تابيعي مونوپوليالاردىڭ قىزمەتىن جانە الەۋمەتتىك ماڭىزى بار تاۋارلار نارىعىن تارتىپكە كەلتىرۋ ماسەلەلەرىنە ايرىقشا توقتالدى.
ازاماتتار مەن بيزنەستىڭ رەيدەرلىك ارەكەتتەردەن, جەكەلەگەن شەنەۋنىكتەردىڭ بەيباستاقتىعى مەن ارەكەتسىزدىگىنەن قورعالۋىن كۇشەيتۋگە باعىتتالعان زاڭنامالىق نورمالاردىڭ ەنگىزىلەتىنىن اتاپ وتكەن ءجون. ناقتىلىق پەن بىركەلكىلىك بولماعان ساتتەردىڭ ءبارى ازاماتتار مەن كاسىپكەرلەردىڭ پايداسىنا شەشىلۋى ءتيىس.
الەۋمەتتىك قامتاماسىز ەتۋ سالاسىندا مۇگەدەكتەردى قولداۋدى, بالالار قۇقىعىن قورعاۋدى كۇشەيتۋ, بۇقارالىق سپورتتى دامىتۋ, حالىقتىڭ از قامتىلعان توپتارى ءۇشىن باسپانا قولجەتىمدىلىگىن ارتتىرۋ, ءاربىر ەلدى مەكەندەگى ەڭ وزەكتى ينفراقۇرىلىمدىق ماسەلەلەردى شەشۋ ماڭىزدى باستامالار قاتارىندا. 2020 جىلى پەداگوگتاردىڭ ەڭبەكاقىسى 25 پايىزعا وسەدى, ۇكىمەت مادەنيەت قىزمەتكەرلەرىنىڭ ەڭبەكاقى كولەمىن ارتتىرۋ ولشەمدەرىن انىقتايدى. ۇكىمەت پەن ۇلتتىق بانكتىڭ الدىنا بانكتەردىڭ ەكونوميكانى نەسيەلەۋ دەڭگەيىن ۇلعايتۋ, تۇتىنۋ نەسيەسى نارىعىندا قاتەلىكتەرگە جول بەرمەۋ, زەينەتاقى اكتيۆتەرىن باسقارۋ تيىمدىلىگىن ارتتىرۋ مىندەتتەرى قويىلدى. مەملەكەت باسشىسى اتاۋلى الەۋمەتتىك كومەكتىڭ ءادىل ءارى ىنتالاندىرۋ جۇيەسىن قۇرۋ قاجەتتىگىنە جەكە توقتالدى. بۇل كومەك وعان شىنىمەن مۇقتاجدارعا عانا بەرىلۋى ءتيىس.
جالپى, پرەزيدەنت قويعان بارلىق مىندەتتى تابىستى جۇزەگە اسىرۋ ءۇشىن شەشىم قابىلداۋ ۇدەرىسىنىڭ مولدىرلىگىن ارتتىرۋعا, شەشىمدەردى قابىلداۋ بارىسىنا حالىقتى تارتۋ ىسىنە نەگىزگى ەكپىن بەرىلۋى قاجەت. ءبىر مەزگىلدە مەملەكەتتىك قىزمەتشىلەردىڭ قويىلعان مىندەتتەرگە جەتۋدەگى, اسىرەسە ينۆەستيتسيا تارتۋ, ەڭبەك ونىمدىلىگىن ارتتىرۋ, شيكىزاتتىق ەمەس ەكسپورتتى ۇلعايتۋ, جاڭا جۇمىس ورىندارىن اشۋ ماسەلەلەرىندەگى جەكە جاۋاپكەرشىلىگى كۇشەيتىلەدى.
تيمۋر سۇلەيمەنوۆ,
پرەزيدەنت اكىمشىلىگى باسشىسىنىڭ ورىنباسارى
