ماتچ باستالاردان ءبىر ساعات بۇرىن ەكى كوماندانىڭ قۇرامى قولىمىزعا تيگەندە قانداي دا ءبىر وزگەرىس بار-جوعىن ءبىلۋ ءۇشىن بىردەن وتكەن ويىنمەن سالىستىردىق. سويتسەك ەكى كوماندانىڭ دا باس باپكەرلەرى نەگىزگى قۇرامعا ازداعان وزگەرىس جاساعان ەكەن. ەلوردادا وتكەن ماتچتا ءبىرىنشى مينۋتتان باستاپ الاڭعا شىققان فيرمين مۋبەلەنىڭ ورنىنا نەگىزگى قۇرامدا رومان مۋرتازاەۆ شىقتى. ال باتە ساپىنان ەرۆەن مۋكام مەن سلوبودان ءسيموۆيچتىڭ ورنىنا بوريس كوپيتوۆيچ پەن انتون ساروكا العاشقى مينۋتتان جاسىل الاڭدا ونەر كورسەتتى.
كەزدەسۋدىڭ العاشقى بەس مينۋتى تەڭ دارەجەدە باستالعانىمەن, التىنشى مينۋتتا الاڭ يەلەرى جىلدام گول سوعۋعا مۇمكىندىك الدى. گول اۆتورى – ماكسيم سكاۆىش. جانكۇيەرلەردىڭ قىزۋ قولداۋىنا يە بولعان باتە فۋتبولشىلارى العا قاراي لاپ قويدى. دەگەنمەن «استانا» ويىنشىلارى جىلدام وزدەرىنە كەلىپ, ءۇش مينۋتتا ەكى بىردەي قاۋىپتى شابۋىل ۇيىمداستىرىپ ۇلگەردى. بىراق ەشقايسىسى ناتيجە بەرگەن جوق. سونداي-اق جەرلەستەرىمىز العاشقى 15 مينۋت ىشىندە باتە قاقپاسىنا ەكى بىردەي بۇرىشتاما دوبىن ورىنداعانىمەن, قارسىلاس كوماندانىڭ قورعاۋشىلارى قىراعىلىق تانىتىپ, دوپتى ءوز ايىپ الاڭىنان الىپ شىعا ءبىلدى. ءارى قاراي ويىن ەكى كوماندانىڭ الما-كەزەك شابۋىلىمەن ءوربىدى. كەزدەسۋدىڭ 21-مينۋتىندا مارين توماسوۆ باتە-ءنىڭ ەكى بىردەي قورعاۋشىسىن وڭاي الداپ ءوتىپ, قاقپاعا باعىتتاعان سوققىسى قيىس كەتسە, 35-مينۋتتا الاڭ يەلەرى ويىنشىسىنىڭ الىستان شىرەنە تەپكەن دوبى ەريچ قورعاعان قاقپانىڭ ءدال جانىنان ءوتتى. ارادا ءبىر مينۋت وتەر-وتپەستەن «استانا» قورعاۋشىسى لۋكا شيمۋنوۆيچ ءوز ايىپ الاڭىندا قاتەلەسىپ, قارسىلاس ويىنشىسىنىڭ سوققى جاساۋىنا مۇمكىندىك بەرىپ قويدى. الايدا ەريچ ءوز ورنىنان تابىلا ءبىلدى. ءبىرىنشى تايمنىڭ سوڭعى مينۋتتارىندا باتە فۋتبولشىلارى ءبىزدىڭ قاقپامىزدىڭ الدىن تورۋىلداپ, ۇزىلىسكە دەيىن ەكىنشى گولىن سوعۋعا ۇمتىلدى. ابىروي بولعاندا قورعاۋشىلارىمىز ءساتتى قورعانىپ, قاۋىپتىڭ بەتىن قايتاردى.
العاشقى تايم باتە-ءنىڭ ازداعان باسىمدىعىمەن وتكەنىمەن, «استانانى» ناشار وينادى دەپ ايتا المايمىز. دورين روتاريۋ مەن مارين توماسوۆ قوس قاپتالدان قارسىلاستاردى قىسپاققا الىپ, قاۋىپتى شابۋىل ۇيىمداستىردى. سونداي-اق ەريچتىڭ قىراعىلىعىن دا ايتا كەتكەن ءجون. ءۇش بىردەي گول سوعاتىن 100 پايىزدىق شابۋىلدىڭ بەتىن قايتارىپ, قاقپاسىن گولدان امان ساقتاپ قالدى. وسىلايشا, كەزدەسۋدىڭ العاشقى تايمى 0:1 ەسەبىمەن باتە-ءنىڭ پايداسىنا اياقتالدى.
كەزدەسۋدىڭ ەكىنشى بولىگىن باتە فۋتبولشىلارى بەلسەندى باستاپ, ءا دەگەننەن-اق شابۋىلعا كىرىستى. دەگەنمەن «استانا» ويىنشىلارى دا قاراپ قالعان جوق. قارسىلاستىڭ ءاربىر شابۋىلىنا شابۋىلمەن, سوققىسىنا سوققىمەن جاۋاپ بەرىپ وتىردى.
ماتچتاعى قىزىق جاعداي ويىننىڭ 52-مينۋتىندا ورىن الدى. ستاديونعا جينالعان 20 مىڭعا جۋىق جانكۇيەر ءبىر مەزەتتە ورنىنان تۇرىپ, 2-3 مينۋت بويى شاپالاق سوقتى. مۇنىڭ سىرىن بەلورۋسسيالىق ارىپتەستەرىمىزدەن سۇراعاندا, باتە-ءنىڭ 1996-2018 جىلعى باسشىسى اناتولي كاپسكي بىلتىر 52 جاسىندا قايتىس بولعان ەكەن. وسىلايشا, جانكۇيەرلەر ويىننىڭ 52-مينۋتىندا كاپسكيدى ەسكە الىپ, رۋحىنا تاعزىم ءبىلدىردى.
ماتچتىڭ 55-مينۋتىنان باستاپ الاڭ يەلەرى ويىندى تولىق ءوز باقىلاۋلارىنا الدى. ءبىزدىڭ ويىنشىلار قورعانىسقا ءمان بەرىپ, تەك قارسى شابۋىلعا يەك ارتۋعا ءماجبۇر بولدى. بالكىم, ۇزىلىستە گريگورچۋك فۋتبولشىلارعا قورعانىستى مىقتاپ ۇستاۋعا تاپسىرما بەرگەن بولار. ويتكەنى «استاناعا» گول سوققاننان گورى, قاقپاعا گول وتكىزىپ الماۋ ماڭىزدى ەدى.
دۇركىن-دۇركىن شابۋىلدىڭ ءوز جەمىسىن بەرەر ءساتى بولادى عوي. 65-مينۋتتا سونداي ساتتەردىڭ بىرىندە العاشقى گولدىڭ اۆتورى ماكسيم سكاۆىش قاقپامىزعا ەكىنشى گولىن سوققان بولاتىن. ابىروي بولعاندا قاپتالداعى تورەشى جالاۋشاسىن كوتەرىپ, دوپ ويىننان تىس جاعدايدا سوعىلعانىن ءبىلدىردى. ەسەپ وزگەرۋسىز قالدى. كەزدەسۋدىڭ 70-مينۋتىندا رومان گريگورچۋك ويىنداعى العاشقى وزگەرىستى جاسادى. الاڭدا شابۋىلشى قىزمەتىن اتقارعان رومان مۇرتازاەۆتىڭ ورنىنا رانگەلو يانگانى شىعاردى. ماتچ الدىنداعى ءباسپاسوز جيىنىندا گول سوعۋعا تىرىسامىن دەگەن شابۋىلشى العاشقى مۇمكىندىگىندە ءمۇلت كەتتى. ءتىپتى, دوپ توقتاتۋدا قاتەلەسىپ, دوپتى قارسىلاس كوماندا ويىنشىسىنىڭ اياعىنا سالىپ بەردى.
قاتەلىكتى كەشىرمەيتىن باتە ويىنشىلارى ماتچتىڭ 85-مينۋتىندا «استانا» قاقپاسىنا ەكىنشى گولىن سوقتى. بۇل جولى مەرگەندىگىمەن ەۆگەني يابلونسكي كوزگە ءتۇستى. جانكۇيەرلەردىڭ قىزۋ قولداۋىنا يە بولىپ, گولدان رۋحتانعان الاڭ يەلەرى «استانا» قاقپاسىنا شابۋىلدى ءبىر ساتكە دە توقتاتقان جوق. قاقپامىزعا ەكىنشى گول سوعىلعاننان كەيىن گريگورچۋك الاڭعا ەكى بىردەي قورعاۋشىنى شىعاردى. جاركو توماشەۆيچ پەن ابزال بەيسەبەكوۆ كوماندانىڭ قورعانىسىن قىمتاپ تاستادى. فۋتبولشىلار قاقپامىزعا گول وتكىزبەي, ارەڭ دەگەندە تابلوداعى كورسەتكىشتى ساقتاپ قالدى. وسىلايشا «استانا» سىرت الاڭدا جەڭىلسە دە, توپتىق كەزەڭگە جولداما الدى.
جۇما كۇنى موناكودا ەۋروپا ليگاسىنىڭ 2019-2020 جىلعى توپتىق كەزەڭىنىڭ جەرەبە تارتۋ ءراسىمى ءوتتى. جەرەبە قورىتىندىسى بويىنشا قازاقستاننىڭ بەس دۇركىن چەمپيونى اعىلشىننىڭ ازۋلى «مانچەستەر يۋنايتەد», سەربيانىڭ «پارتيزان» جانە گوللانديانىڭ «الكماار» كوماندالارىمەن ءبىر توپقا ءتۇستى. «استانا» L توبىنداعى العاشقى ويىنىن سىرت الاڭدا «مانچەستەر يۋنايتەدكە» قارسى وتكىزەتىن بولدى.
«استانا» كلۋبىنىڭ باس باپكەرى رومان گريگورچۋك پەن كوماندا كاپيتانى نەناد ەريچ ەۋروپا ليگاسىنىڭ جەرەبەسى تۋرالى پىكىر ءبىلدىردى. «مەن جەرەبەگە سالماقتى قارايمىن, ويتكەنى ونى ەشكىم وزگەرتە المايدى. بۇل توپتى وتە قىزىقتى دەپ سيپاتتاۋعا بولادى. ارينە, الدا «مانچەستەر يۋنايتەدپەن» قىزىقتى ويىن كۇتىپ تۇر. «ولد تراففوردتا» بولىپ, ولارمەن ءبىر الاڭدا ويناۋدىڭ ءوزى بارلىعىمىز ءۇشىن ۇلكەن وقيعا. سول سەبەپتى وتە قىزىق بولادى», دەيدى رومان گريگورچۋك.
ال نەناد ەريچ «پارتيزانعا» قارسى وتەتىن ويىن ءوزى ءۇشىن قىزىقتى بولاتىنىن ايتادى. «وتە قىزىقتى توپقا تاپ بولدىق. ءۇش قارسىلاسىمىز دا ورنالاسقان سەبەتتەرىنە قاراماستان توپ كوماندا بولىپ ەسەپتەلەدى. «مانچەستەر يۋنايتەدتى» تانىستىرۋدىڭ ءوزى ارتىق. «پارتيزان» سەربيا چەمپيوناتىنداعى ەكى ۇزدىك كوماندانىڭ ءبىرى. سەربيادا تۋىپ-وسكەن مەن ءۇشىن بەلگراد كومانداسىنا قارسى ويناۋ قىزىقتى بولماق. توپتاعى سوڭعى قارسىلاسىمىز – «الكماار» ەۋروپاداعى ەڭ مىقتى چەمپيوناتتاردىڭ ءبىرى رەتىندە سانالاتىن نيدەرلانديانىڭ ۇزدىك كومانداسى. سوندىقتان ەۋرودودانىڭ كۇزگى ماۋسىمىندا ءبىزدى تارتىستى ءارى قىزىقتى ويىن كۇتۋدە. ءبىز ءوز كەزەگىمىزدە جاقسى ناتيجە ءۇشىن ويناپ, ءوزىمىزدىڭ جوعارى دەڭگەيدەگى ويىنىمىزدى كورسەتەمىز دەگىم كەلەدى».
ايتا كەتەيىك, ەلوردا كومانداسى اتالعان كوماندالارمەن ەۋرودودا ويىندارىندا ءبىرىنشى رەت كەزدەسكەلى تۇر.
ءالي بيتورە,
«Egemen Qazaqstan» – بوريسوۆتەن (بەلارۋس)
