قازاقستان • 30 تامىز، 2019

قورىقشى ەرلان نۇرعاليەۆتىڭ ءولىمى: ءىس پروكۋراتۋراعا قايتارىلدى

67 رەتكورسەتىلدى

زارداپ شەگۋشىلەردىڭ وكىلدەرى مەن سوتتالۋشىلاردىڭ قورعاۋشىلارى «وحوتزووپروم» ينسپەكتورى ەرلان نۇرعاليەۆتىڭ ءولىمى بويىنشا ءىستى پروكۋراتۋراعا قايتارۋدى سۇرادى. سەبەبى، ەكى تاراپ تا سوتقا دەيىنگى تەرگەۋدىڭ ساپاسىنا كوڭىلدەرى تولماعان. سۋديا وسى ءىستى پروكۋرورعا قايتارۋ تۋرالى ۇكىم شىعاردى دەپ حابارلايدى قازاقپارات ءتىلشىسى.

ب.مۇسابەكوۆ، ب.قايىربەكوۆ، ج.مىرزاباەۆ، ا.اكىموۆ، ب.احمەتوۆ، ن.شۇكىلدىكوۆ، ك.اقشانوۆقا قاتىستى قىلمىستىق ءىس باستى سوت تالقىلاۋىن تاعايىنداۋعا كەدەرگى كەلتىرەتىن قىلمىستىق ءىس جۇرگىزۋ زاڭناماسىنىڭ ەلەۋلى بۇزۋشىلىقتارىنىڭ انىقتالۋىنا بايلانىستى پروكۋرورعا الدىن الا تىڭداۋ ساتىسىنان قايتارىلدى. سايكەس ۇكىمدى قاراعاندى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى بەكزات شالعىمباەۆ شىعاردى.

الدىن الا تىڭداۋ بارىسىندا جابىرلەنۋشىلەردىڭ وكىلى پ.نيتسيك پەن ن.نۇرعاليەۆا - ادۆوكات الماس قاسقىرباي قىلمىستىق ءىستى پروكۋرورعا قايتارۋ تۋرالى ءوتىنىش ءبىلدىرىپ، سوتقا دەيىنگى تەرگەۋ بارىسىندا سوتتالۋشىلار ب.بازاروۆ، ب.كايىربەكوۆ، ج.مىرزاباەۆ، ا.اكىموۆتىڭ ارەكەتتەرىندە اسا اۋىر قىلمىستى جاسىرۋ جانە اسا اۋىر قىلمىس تۋرالى حابارلاماۋ تۋرالى پروتسەسسۋالدىق شەشىم قابىلدانباعان، بۇل فاكتىلەر تەكسەرىلمەگەن. سونىمەن قاتار سوتتالۋشى  ك.اقشانوۆتىڭ قورعاۋشىسى تەرگەۋ ورگانىنىڭ ايىپتاۋ اكتىسىندە قىلمىس ورنىنىڭ تولىق مالىمەتتەرىن كورسەتپەگەنىن جانە زاڭسىز اڭ اۋلاۋ سالدارىنان كەلتىرىلگەن زالالدىڭ مولشەرىمەن كەلىسپەيتىنىن ايتىپ، قىلمىستىق ءىستى پروكۋرورعا قايتارۋ تۋرالى ءوتىنىش ءبىلدىردى.

ءبىر توپ ادام قاساقانا ادام ءولتىردى دەپ ايىپتالعان سوتتالۋشىلاردىڭ قورعاۋشىلارى قىلمىستىق باپتى قايتا كۆاليفيكاتسيالاۋدى تالاپ ەتۋدە. ولاردىڭ پىكىرىنشە، كۇدىكتىلەر ادام ولىمىنە اكەپ سوقتىرعان اسا اۋىر تۇردە دەنساۋلىققا زيان كەلتىرگەن. سەبەبى، قورىقشى ەرلان نۇرعاليەۆ وقيعا ورنىندا قازا تاپپاعان، اۋرۋحاناعا جەتكىزگەندە ءتىرى بولعان.  سونداي-اق ادۆوكاتتار پوليتسەيلەردىڭ اڭشىلاردىڭ كيىكتى اتقاندارىن دالەلدەي الماعانىن ايتتى. الايدا، «وحوتزووپروم» ينسپەكتورلارى دالادان زاڭمەن  قورعالاتىن اتىلعان 17 جانۋاردى تاۋىپ، ولاردىڭ زالالىن 45 ملن تەڭگە دەپ ەسەپتەدى. بىراق، قورعاۋشىلاردىڭ پىكىرىنشە، بۇل سوما اسىرا سىلتەلگەن، زالالدىڭ شىن مانىندەگى سوماسى 17 ملن تەڭگەدەن ءسال اسادى.

سوتتالۋشى قايرات اقشانوۆتىڭ قورعاۋشىسىنىڭ ءوتىنىشىن بەرىك احمەتوۆ پەن نۇرلان شۇكىلدىكوۆتىڭ ادۆوكاتتارى قولداپ وتىر. بۇدان بولەك، سوت الدىن الا تىڭدالىم بارىسىندا باسقا دا زاڭ بۇزۋشىلىقتاردى انىقتادى، اتاپ ايتقاندا، ايىپتاۋدا قاراما-قايشىلىقتار انىقتالدى، زارداپ شەگۋشىلەرگە قاي جەردە جانە قاي ورىندا دەنە جاراقاتتارى جاسالعانى كورسەتىلمەگەن، كۇدىكتىلەردىڭ ارەكەتتەرىن سارالاۋ تۋرالى شەشىمدە قىلمىستاردىڭ وبەكتيۆتى جاعى سيپاتتالماعان. سونداي-اق اتالعان قىلمىستىق ءىس بويىنشا سوت ءوندىرىسىنىڭ ءتىلى قازاق ءتىلى دەپ تاڭدالعان، الايدا، قۇجاتتاردىڭ ءبىر بولىگى زارداپ شەگۋشى پەتر نيتسىك ءۇشىن ورىس تىلىنە اۋدارىلماعان. «الدىن الا تىڭدالىم بارىسىندا انىقتالعان وسى بۇزۋشىلىقتاردىڭ بارلىعى باستى سوت تالقىلاۋىن تاعايىنداۋعا كەدەرگى كەلتىرىپ وتىر. سوندىقتان سوت قىلمىستىق ءىستى پروكۋرورعا قايتارۋ تۋرالى شەشىم شىعاردى»، - دەپ حابارلادى وبلىستىق سوتتىڭ ءباسپاسوز قىزمەتى.

 

سوڭعى جاڭالىقتار

ۇقساس جاڭالىقتار