تسەلينوگراد اۋداندىق كىتاپحانا جۇيەسىنە اۋداندىق ورتالىق كىتاپحانا مەن شالقار, نۇرەسىل, تاستى, جالعىزقۇدىق, ورازاق ءتارىزدى 13 ەلدى مەكەندەگى كىتاپحانا كىرەدى. ونىڭ ىشىندە «رودينا» سەلوسى مەن نۇرەسىل اۋىلىنداعى كىتاپحانالار جوعارى مارتەبەگە يە. الدىمەن, بارلىق كىتاپحانالاردىڭ كومپيۋتەرلەندىرىلىپ, ينتەرنەت جەلىسىنە قوسىلعاندىعىن ايتا كەتۋگە بولادى. اۋداندىق ورتالىق كىتاپحانادا 2010 جىلدان باستاپ كىتاپ قورىن ەكشەيتىن Rabis باعدارلاماسى جۇمىس ىستەيدى. 2018 جىلى جاڭعىرتۋ جۇمىستارى جۇرگىزىلىپ, قوسىمشا تاعى دا 6 جاڭا WEB-Rabis باعدارلاماسى ەنگىزىلدى. وقىرماندار تاراپىنان سۇرانىستىڭ كوپ بولۋىنا وراي كىتاپحانالارداعى كىتاپ قورىن ەسەلەي تولىقتىرۋ ءىسى ۇزبەي جۇرگىزىلەدى. ماسەلەن, 2018 جىلى اۋداندىق بيۋدجەتتىڭ ەسەبىنەن 1145,6 ميلليون تەڭگەگە 1031 دانا كىتاپ ساتىلىپ الىندى. وعان قوسا ءار جىل سايىن وبلىستىق بيۋدجەتتەن بولىنگەن قاراجاتقا ادەبيەت الەمىندەگى تاتىمدى, سۇيەكتى دۇنيەلەر الىنىپ, قور كولەمى مولايا ءتۇستى.
كىتاپحانا جۇيەسىندەگى ەلدى ىنتىماققا باستايتىن, اسقارالى مىندەتتەر توڭىرەگىندە توپتاستىراتىن بار جۇمىس الەۋمەتتىك جەلى ارقىلى كوپشىلىككە جەدەل تاراتىلىپ وتىرىلادى. ال ونداي يگىلىكتى ءىس مۇندا جەتەرلىك. ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى جارىق كورگەننەن كەيىن كىتاپحانا جۇيەسى جەرگىلىكتى تۇرعىندار اراسىندا جۇيەلى جۇمىس جۇرگىزگەن. اسىرەسە «تۋعان جەر» جوباسى بويىنشا قولعا الىنعان قىرۋار جۇمىس كوپشىلىك كوڭىلىنەن شىعارلىق. حالىق ءوز توپىراعىنىڭ قۇنىن بىلەدى, قاسيەتىن قاپەرىنەن شىعارمايدى. ويتكەنى توسكەيىن وزدەرى ادال ەڭبەكتەرىمەن تۇلەتىپ, بار عۇمىرىن قوعامنىڭ بايلىعىنا ارناپ كەلەدى ەمەس پە؟ اسىرەسە شالقار اۋىلدىق كىتاپحاناسىندا سان عاسىر بويى حالقىمىزبەن بىرگە جاساسىپ كەلە جاتقان عاجايىپ ادەت-عۇرىپتى, سالت-ءداستۇردى ناسيحاتتاپ, ونىڭ ىشكى ءمان-ماڭىزىن تۇسىندىرۋگە, قايتادان جارقىراتا جاساندىرىپ, حالىق كادەسىنە جاراتۋعا ۇلكەن ۇمتىلىس جاسالسا, ارايلى اۋىلىنداعى كىتاپحانادا «اتامەكەن» باعدارلاماسى بويىنشا وقىرمانعا وي سالارلىق مازمۇندى جۇمىستار وتكىزىلدى. ال «رودينا» سەلوسىنداعى كىتاپحانادا «سيقىرلى قىلقالام», ورازاق اۋىلدىق كىتاپحاناسىندا ء«بىزدىڭ مۇرا» ايدارلارىمەن اركىمنىڭ كوكىرەگىندەگى تۋعان جەرگە دەگەن ءموپ-ءمولدىر ماحابباتتى جارقىراتىپ كورسەتەتىن سىرشىل دا سىندارلى يگىلىكتى ىستەر قولعا الىندى.
كىتاپحانالاردىڭ مول مۇمكىندىگى «قازاقستاننىڭ كيەلى جەرلەرى» باعدارلاماسى شەڭبەرىندە قولعا الىنعاندىعىن اتاپ كەتەلىك. تاريح عىلىمدارىنىڭ دوكتورى جامبىل ارتىقباەۆتىڭ جەتەكشىلىگىمەن ارنايى ەكسپەديتسيا جاساقتالدى. جۇمىس توبىنىڭ قۇرامىنا تاريحشىلار مەن ولكەتانۋشىلار, وسى توڭىرەكتەگى كوكىرەگىنە كوپ سىر جيناعان قازىنالى قارتتار, اقىندار مەن جازۋشىلار ەنگىزىلدى. بۇل توپ ەڭ الدىمەن التايدان اتىراۋعا دەيىنگى كەڭ كوسىلگەن قازاق دالاسىنداعى كيەلى جەرلەرگە شولۋ جاساسا, كەيىن ءوز توپىراقتارىنداعى, تاياۋ ماڭداعى تاريحى جەرلەر توڭىرەگىندە ارقيلى دەرەكتەردى جيناستىرىپ, بايتاق دالانىڭ بار بولمىسىن, قيساپسىز قاسيەتىن زامانداستاردىڭ كوكىرەكتەرىنە قۇيىپ بەرۋ باعىتىندا باعالى ىستەر اتقاردى.
ءسوز اراسىندا حالىققا وسىنشالىقتى قىزمەت كورسەتىپ وتىرعان كىتاپحانانىڭ مۇمكىندىگىن سالماقتاي-سارالاۋ ءۇشىن ماتەريالدىق-تەحنيكالىق بازاسىن دا ايتا كەتەلىك. ماسەلەن, اۋداندىق ورتالىق كىتاپحانانىڭ كەڭ دە جارىق وقۋ زالى بار. كىتاپ قورى 20 000 دانادان استام. 2018 جىلى 1200 وقىرمانعا قىزمەت كورسەتكەن. كىتاپحانا تورىندە «رۋحاني جاڭعىرۋ» ءمۇيىسى تۇر.
كىتاپحانا قىزمەتىنىڭ ءبىر كورسەتكىشى – وقىرماندار سانى ەكەندىگى بەلگىلى. بۇل ارادا ءتاپ-ءتاۋىر ءوسىم بار. ءسوزىمىزدى ءتىرىلتۋ ءۇشىن دەرەك كەلتىرە كەتەلىك. ماسەلەن, 2018 جىلى وقىرماندار سانى 1633-كە كوبەيگەن. كىتاپحانا قىزمەتىن پايدالانۋشىلار سانى 2854 ادامعا ۇلعايعان. ءبىر جۇيەدەگى 13 كىتاپحانانىڭ كىتاپ قورى 155132-گە جەتكەن. ونىڭ 50636-سى مەملەكەتتىك تىلدەگى كىتاپتار.
قورىتا ايتقاندا, اۋدانداعى كىتاپحانالار جۇيەسى كىتاپ – ءبىلىمنىڭ كەنى ەكەندىگىن, ال ءوز وردالارى جاسامپازدىقتى جىرلايتىن جەر ەكەندىگىن دالەلدەپ-اق كەلەدى.
اقمولا وبلىسى,
تسەلينوگراد اۋدانى
