اتا زاڭ – اتا-بابالار ارمانداعان ازاتتىعىڭدى ايقىندايتىن, ەگەمەندىگىڭدى ايگىلەيتىن, تاۋەلسىز ەل ەكەندىگىڭدى تانىتاتىن, دەربەس مەملەكەتتىگىڭدى كورسەتەتىن قاستەرلى قۇجات. ول – ەلدىگىمىزدىڭ تىرەگى, ازاماتتىڭ ارقاسۇيەر التىن ارقاۋى. ءبىزدىڭ كۇللى تىنىس-تىرشىلىگىمىزدى, ءومىر سالتىمىز, قوعامنىڭ تامىر بۇلكىلى – بارلىعى سول نەگىزگى زاڭنان باستاۋ الاتىندىعى راس. اتا زاڭ – تال بەسىكتەن جەر بەسىككە دەيىنگى ۋاقىت ارالىعىندا ءسىزدىڭ قۇقىعىڭىزدى ساقتايتىن, سورەدە قاراۋسىز جاتپايتىن التىن تۇعىر. ول – ەل ازاماتىنىڭ كونستيتۋتسيالىق قۇقىن تانىتاتىن, ءار وتانداسىمىز بۇلجىتپاي ورىندايتىن زاڭداردىڭ التىن ارقاۋى, تەمىرقازىعى. سونداي-اق – بابالار اماناتى. كەشەگى قاسىمنىڭ «قاسقا جولى», ەسىمنىڭ «ەسكى جولى», ءاز-تاۋكەنىڭ «جەتى جارعىسىنىڭ» جالعاسى, زاڭدى مۇراگەرى.
اتا زاڭ – ۇلتارالىق تاتۋلىقتىڭ التىن دىڭگەگى. بۇكىل حالىقتىڭ يگىلىگىن كوزدەيتىن كونستيتۋتسيا قوعام مەن بيلىكتىڭ تۇراقتىلىعىن قامتاماسىز ەتىپ قانا قويماي, قازاقستاننىڭ الەم تانىعان مەملەكەتكە اينالۋىنا وڭ ىقپال ەتتى. قازاقستان – زايىرلى مەملەكەت. ايقارا اشىلعان قۇشاعىنا, كەڭ قولتىعىنا سان تاعدىرلى مىڭداعان ۇلتتى بىرىكتىرىپ جاتىر. «بەرەكە باستاۋ بىرلىك, ەل ءىشى تاتۋ تىرلىك» دەمەكشى, ەل باسىنا كۇن تۋىپ, ەر ەتىگىمەن سۋ كەشكەن قيىن-قىستاۋ زامانداردا كيىز تۋىرلىقتى قازاق ۇلتىن ۇلت رەتىندە ساقتاپ قالعان بىرلىگى مەن ىنتىماعى دەسەك, ارتىق ايتقانىمىز ەمەس. دوستىق پەن ىنتىماق بار جەردە بەرەكە مەن ىرىس بولارى ايدان انىق. «بىرلىك بار جەردە – تىرلىك بار» دەيدى ءبىزدىڭ حالىق. دانا جۇرت مۇنى تەگىننەن-تەگىن ايتپاسا كەرەك. اۋىزبىرلىك پەن تۇسىنىستىك, قاراپايىم سىيلاستىق ۇستەمدىك قۇرعان جەرلەرگە قاشاندا ناتيجەلى ىستەردىڭ ءۇيىر بولاتىنى بەلگىلى. ەلىمىزدە قالىپتاسقان ۇلتارالىق تاتۋلىقتىڭ ارقاسىندا بۇگىندە مەملەكەتىمىز وركەندەپ, ىلگەرى باسىپ كەلەدى. وتانىمىزداعى تۇسىنىستىك, حالىق دوستىعى – ەڭ باستى بايلىعىمىز. ونى كوزدىڭ قاراشىعىنداي ساقتاۋعا تىرىسۋىمىز كەرەك.
ستاتيستيكالىق دەرەكتەر بويىنشا, ەلىمىزدە 140 ەتنوس پەن 46 ءدىني قاۋىمداستىق بار ەكەن. وسىلاردىڭ اراسىندا ەشقانداي دا كەلىسپەۋشىلىك, دۇردارازدىق جوق. ولار قازاقستاندى ورتاق وتانى سانايدى. ەلىمىزدە ىنتىماق پەن بىرلىكتىڭ قايماعى بۇزىلماي ساقتالۋىندا بىرەگەي قوعامدىق ينستيتۋت – قازاقستان حالقى اسسامبلەياسىنىڭ الاتىن ورنى ەرەكشە. قازاقستان حالقى اسسامبلەياسى – حالقىمىزدىڭ ادامگەرشىلىگى مەن تولەرانتتىلىعىنىڭ تاڭعاجايىپ ۇلگىسى. مۇنداي قاسيەت تۇتاس ۇلتتىڭ باسىنا ءبىر كۇندە ورناي سالمايتىنى بەسەنەدەن بەلگىلى. بۇل – حالىقتىڭ سانا-سەزىمىنىڭ, سالت-ءداستۇرىنىڭ, رۋحاني بايلىعىنىڭ كەمەلدەنگەنىنىڭ ايقىن نىشانى.
وسى تۇرعىدان الىپ قاراساق, قازاقستانداعى قوعامدىق قارىم-قاتىناستاردىڭ بەلگىلى ءبىر دارەجەگە كوتەرىلگەنىن انىق اڭعارامىز. قازاقستان حالقى اسسامبلەياسى قۇرىلعاننان بەرى رەسپۋبليكاداعى ۇلتارالىق قارىم-قاتىناستار ەكونوميكالىق جانە ساياسي رەفورمالار وتكىزۋ بارىسىندا جاڭالاندى. قوعامدا ەركىن ويلاۋ مەن تولەرانتتىلىق نىعايىپ, ەتنومادەني بىرلەستىكتەر تابىستى دامۋ ۇستىندە. ازاماتتاردىڭ, اسىرەسە جاستاردىڭ اراسىندا مەملەكەتتىك ءتىلدى ۇيرەنۋدىڭ تابيعي پروتسەسى ءجۇرىپ جاتىر. قازاقستاننىڭ تىلدىك بايلىعى – جالپىقازاقستاندىق مادەنيەتتىڭ مايەگى. مەملەكەتتىڭ قولداۋىمەن 11 تىلدەگى گازەت-جۋرنال تابىستى شىعارىلۋدا, 44 تەلەارنا 12 تىلدە, 18 راديوستانسا 7 تىلدە حابار تاراتادى, عالامتوردا ۇسىنىلعان كونتەنت سانى ءوسىپ كەلەدى.
ەلىمىزدىڭ ساليقالى ساياساتىنىڭ ارقاسىندا ءبىز قازىرگى كۇنى ەكونوميكالىق جەتىستىكتەردى, الەۋمەتتىك يگىلىكتەردى, ساياسي تۇراقتىلىق پەن مادەني وركەندەۋدى باستان كەشىرىپ وتىرمىز. ەلدىڭ قول جەتكەن تابىستارىنا, بىزدەگى ورىن العان تاتۋلىق پەن تۇسىنىستىك جاعدايلارىنا الەمدىك وركەنيەت قىزىعۋشىلىق تانىتۋدا. وسىنىڭ ءوزى كوڭىلدى مارقايتىپ, تۋعان ەلگە, وتانعا دەگەن سۇيىسپەنشىلىك سەزىمىڭدى ارتتىرا تۇسەدى.
ارينە دوس سۇيسىنە, دۇشپان كۇيىنە قارايتىن جەتىستىكتەر وڭايلىقپەن كەلىپ جاتقان جوق. بۇل – ەڭ الدىمەن قازاق حالقىنىڭ ءوز ىشىندەگى اۋىزبىرشىلىكتىڭ, جالپى, قازاقستاندىقتاردىڭ ىنتىماقتاستىعى مەن بىرلىگى ارقاسىندا جەتىپ وتىرعان يگىلىكتى ناتيجەلەر. ءبىزدىڭ ماقساتىمىز – قازاق جەرىن مەكەن ەتكەن كوپۇلتتى حالىقتىڭ اۋىزبىرلىگىن بۇزباي, مەملەكەتتىڭ الەۋەتىن ارتتىرا وتىرىپ الەمنىڭ دامىعان 30 ەلىنىڭ قاتارىنان كورىنۋ.
گاۋھار الدامبەرگەنوۆا,
قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى, پەداگوگيكا عىلىمدارىنىڭ دوكتورى, پروفەسسور
الماتى
