«بۇگىن, نەگىزگى زاڭنىڭ جانە مەملەكەت باسشىسى جۇرگىزىپ وتىرعان ساياساتتىڭ تالاپتارىنا سايكەس, ءبىز ەلدەگى قىلمىسقا قارسى كۇرەستە ءىىم-ءنىڭ بارلىق قىزمەتتەرى مەن بولىمشەلەرىنىڭ جۇمىسىن جوعارى دەڭگەيدە, جاڭا فورماتتا ۇيىمداستىرىپ, قوعامدىق قاۋىپسىزدىكتى قامتاماسىز ەتۋىمىز قاجەت. وسىعان بايلانىستى مينيسترلىك ازاماتتىق قوعاممەن, ۇكىمەتتىك ەمەس ۇيىمدارمەن جانە بۇقارالىق اقپارات قۇرالدارىمەن تىعىز قارىم-قاتىناس ورناتىپ, بەلسەندى جۇمىس جۇرگىزۋدە», دەدى ە.تۇرعىمباەۆ.
سالتاناتتى شارادا ءوز مىندەتتەرىن ادال اتقارعانى ءۇشىن جانە كونستيتۋتسيا كۇنىنە وراي ىشكى ىستەر ورگاندارىنىڭ بىرقاتار قىزمەتكەرىنە مەملەكەتتىك جانە ۆەدومستۆولىق ناگرادالار تاپسىرىلدى. اتاپ ايتقاندا, پرەزيدەنتتىڭ ارنايى جارلىعىمەن قىزمەتتىك بورىشىن ورىنداۋ كەزىندە كورسەتكەن ەرلىگى مەن قايسارلىعى ءۇشىن قاراعاندى وبلىسى تجد ءورت ءسوندىرۋ جانە اپاتتىق-قۇتقارۋ جۇمىستارى قىزمەتىنىڭ ءبولىم كومانديرلەرى داۋلەت الشىمبەكوۆ, تالعات مەدەۋباەۆ, اتالعان قىزمەتتىڭ جەدەل كەزەكشىلىگىنىڭ كومەكشىسى دارحان رايىمبەكوۆ, قاراعاندى وبلىسىنداعى ءورت ءسوندىرۋ ءبولىمى باستىعىنىڭ مىندەتىن اتقارۋشى بەرىك راحىمجانوۆ «ەرلىگى ءۇشىن» مەدالىمەن ناگرادتالدى.
بۇل ءورت سوندىرۋشىلەر جالاڭتاس اۋىلى مەن «جاس قانات» بالالار لاگەرى جانىنداعى ءورتتى ءسوندىرۋ كەزىندە باتىلدىق پەن كاسىبي شەبەرلىك كورسەتتى. ءورت ءسوندىرۋ كەزىندە اۋىل شارۋاشىلىعى القاپتارى مەن ەلدى مەكەندەردىڭ قىزىل جالىنعا ورانۋىنا جول بەرگەن جوق. ولاردىڭ ەرلىك ارەكەتتەرى ناتيجەسىندە جۇزدەگەن ادام ورتتەن قۇتقارىلدى.
سونداي-اق ىشكى ىستەر ءمينيسترى ەرلان تۇرعىمباەۆتىڭ بۇيرىعىمەن قىزمەتتىك مىندەتتەرىن ۇلگىلى ورىنداپ, جۇمىسىندا جوعارى ناتيجەلەرگە قول جەتكىزگەنى ءۇشىن ىشكى ىستەر ورگاندارى مەن ۇلتتىق ۇلاننىڭ بىرقاتار قىزمەتكەرى ماراپاتتالدى. جالپى, كونستيتۋتسيا كۇنىن مەرەكەلەۋگە وراي ىشكى ىستەر ورگاندارىنىڭ 560 قىزمەتكەرى ءارتۇرلى ماراپاتقا يە بولدى. مەرەكەلىك جيىننىڭ سوڭىندا نۇر-سۇلتان قالاسى پوليتسيا دەپارتامەنتىنىڭ كوركەمونەرپازدار ۇجىمى دايىنداعان مەرەكەلىك كونتسەرتتىك باعدارلاما كورەرمەندەر نازارىنا ۇسىنىلدى.
