كەزدەسۋدىڭ العاشقى مينۋتى تەڭ دارەجەدە باستالعانىمەن, ويىننىڭ التىنشى مينۋتىندا الاڭ يەلەرى جىلدام گول سوعۋعا مۇمكىندىك الدى. گول اۆتورى – ماكسيم سكاۆىش. جانكۇيەرلەردىڭ قىزۋ قولداۋىنا يە بولعان باتە فۋتبولشىلارى العا قاراي لاپ قويدى. دەگەنمەن «استانا» فۋتبولشىلار جىلدام وزدەرىنە كەلىپ, ءۇش مينۋتتا ەكى بىردەي قاۋىپتى شابۋىل ۇيىمداستىرىپ ۇلگەردى. بىراق ەشقايسىسى ناتيجە بەرگەن جوق. سونداي-اق جەرلەستەرىمىز العاشقى 15 مينۋت ىشىندە باتە قاقپاسىنا ەكى بىردەي بۇرىشتاما دوبىن ورىنداعانىمەن, قارسىلاس كوماندانىڭ قورعاۋشىلارى قىراعىلىق تانىتىپ, دوپتى ءوز ايىپ الاڭىنان الىپ شىعا ءبىلدى. ارى قاراي ويىن ەكى كوماندانىڭ الما-كەزەك شابۋىلىمەن ءوربىدى. كەزدەسۋدىڭ 21-مينۋتىندا مارين توماسوۆ باتە-ءنىڭ ەكى بىردەي قورعاۋشىسىن وڭاي الداپ ءوتىپ, قاقپاعا باعىتتاعان سوققىسى قيىس كەتسە, 35-مينۋتتا الاڭ يەلەرى ويىنشىسىنىڭ الىستان شىرەنە تەپكەن دوبى ەريچ قورعاعان قاقپانىڭ ءدال جانىنان ءوتتى. ارادا ءبىر مينۋت وتەر-وتپەس «استانا» قورعاۋشىسى لۋكا شيمۋنوۆيچ ءوز ايىپ الاڭىندا قاتەلەسىپ, قارسىلاس ويىنشىسىنىڭ سوققى جاساۋىنا مۇمكىندىك بەرىپ قويدى. الايدا ەريچ ءوز ورنىنان تابىلا ءبىلدى. ءبىرىنشى تايمنىڭ سوڭعى مينۋتتارىندا باتە فۋتبولشىلارى ءبىزدىڭ قاقپامىزدىڭ الدىن تورۋىلداپ, ۇزىلىسكە دەيىن ەكىنشى گولىن سوعۋعا ۇمتىلدى. ابىروي بولعاندا قورعاۋشىلارىمىز ءساتتى قورعانىپ, قاۋىپتىڭ بەتىن قايتاردى.
العاشقى تايم باتە-ءنىڭ ازداعان باسىمدىعىمەن وتكەنىمەن, «استانانى» ناشار وينادى دەپ ايتا المايمىز. دورين روتاريۋ مەن مارين توماسوۆ قوس قاپتالدان قارسىلاستاردى قىسپاققا الىپ, قاۋىپتى شابۋىل ۇيىمداستىردى. سونداي-اق ەريچتىڭ قىراعىلىعىن دا ايتا كەتكەن ءجون. ءۇش بىردەي گول سوعاتىن 100 پايىزدىق شابۋىلدىڭ بەتىن قايتارىپ, قاقپاسىن گولدان امان ساقتاپ قالدى. سونىمەن قاتار قوس كوماندانىڭ باس باپكەرلەرى ءبىر مينۋت تىنىم تاپپاي, 45 مينۋت تىك تۇرعان كۇيى شاكىرتتەرىنە ءوز اقىل-كەڭەستەرىن بەرىپ تۇردى. وسىلايشا, كەزدەسۋدىڭ العاشقى تايمى 0:1 ەسەبىمەن باتە-ءنىڭ پايداسىنا اياقتالدى.
كەزدەسۋدىڭ ەكىنشى بولىگىن باتە فۋتبولشىلارى بەلسەندى باستاپ, ءا دەگەننەن-اق شابۋىلعا كىرىستى. دەگەنمەن «استانا» ويىنشىلارى دا قاراپ قالعان جوق. قارسىلاستىڭ ءاربىر شابۋىلىنا شابۋىلمەن, سوققىسىنا سوققىمەن جاۋاپ بەرىپ وتىردى.
كەزدەسۋدەگى قىزىق جاعداي ويىننىڭ 52-مينۋتىندا ورىن الدى. ستاديونعا جينالعان 15 مىڭعا جۋىق جانكۇيەر ءبىر مەزەتتە ورنىنان تۇرىپ, 2-3 مينۋت بويى شاپالاق سوقتى. مۇنىڭ سىرىن بەلارۋس ارىپتەستەرىمىزدەن سۇراعاندا, باتە-ءنىڭ 1996-2018 جىلعى باسشىسى اناتولي كاپسكي بىلتىر 52 جاسىندا قايتىس بولعان ەكەن. وسىلايشا, جانكۇيەرلەر ويىننىڭ 52-مينۋتىندا كاپسكيدى ەسكە الىپ, رۋحىنا تاعزىم ءبىلدىردى.
ماتچتىڭ 55-مينۋتتان باستاپ الاڭ يەلەرى ويىندى تولىق ءوز باقىلاۋلارىنا الدى. ءبىزدىڭ ويىنشىلار قورعانىسقا ءمان بەرىپ, تەك قارسى شابۋىلعا يەك ارتۋعا ءماجبۇر بولدى. بالكىم, ۇزىلىستە گريگورچۋك فۋتبولشىلارعا قورعانىستى مىقتاپ ۇستاۋعا تاپسىرما بەرگەن بولار. ويتكەنى, «استاناعا» گول سوققاننان گورى, قاقپاعا گول وتكىزىپ الماۋ ماڭىزدى ەدى.
دۇركىن-دۇركىن شابۋىلدىڭ ءوز جەمىسىن بەرەر ءساتى بولادى عوي. 65-مينۋتتا سونداي ساتتەردىڭ بىرىندە باتە ويىنشىلارى قاقپامىزعا ەكىنشى گولىن سوققان بولاتىن. ابىروي بولعاندا قاپتالداعى تورەشى جالاۋشاسىن كوتەرىپ, دوپ ويىننان تىس جاعدايدا سوعىلعانىن ءبىلدىردى. ەسەپ وزگەرۋسىز قالدى. كەزدەسۋدىڭ 70-مينۋتىندا رومان گريگورچۋك ويىنداعى العاشقى وزگەرىستى جاسادى. الاڭدا شابۋىلشى قىزمەتىن اتقارعان رومان مۇرتازاەۆتىڭ ورنىنا رانگەلو يانگانى شىعاردى. كەشەگى ءباسپاسوز جيىنىندا گول سوعۋعا تىرىسامىن دەگەن شابۋىلشى العاشقى مۇمكىندىگىندە ءمۇلت كەتتى. ءتىپتى, دوپ توقتاتۋدا قاتەلەسىپ, دوپتى قارسىلاس كوماندا ويىنشىسىنىڭ اياعىنا سالىپ بەردى.
قاتەلىكتى كەشىرمەيتىن باتە ويىنشىلارى ماتچتىڭ 85-مينۋتىندا «استانا» قاقپاسىنا ەكىنشى گولىن سوعىپ كەتتى. بۇل جولى مەرگەندىگىمەن ەۆگەني يابلونسكي كوزگە ءتۇستى. جانكۇيەرلەردىڭ قىزۋ قولداۋىنا يە بولىپ, گولدان رۋحتانعان فۋتبولشىلار «استانا» قاقپاسىنا شابۋىلدى ءبىر ساتكە دە توقتاتقان جوق. ەكىنشى تايمعا قوسىلعان قوسىمشا ۋاقىتتا گريگورچۋك الاڭعا بەسىنشى قورعاۋشى ابزال بەيسەبەكوۆتى مارين توماسوۆتىڭ ورنىنا شىعارىپ, قورعانىستى قىمتاپ تاستادى. وسىلايشا, قاقپامىزعا گول وتكىزبەي, تابلوداعى كورسەتكىشتى ساقتاپ قالدى.
انە, تورەشىنىڭ ويىن اياقتالعانىن بىلدىرەتىن ىسقىرىعى شالىندى. سونىمەن «استانا» بەسىنشى جىل قاتارىنان ەۋروپا ليگاسىنىڭ توپتىق كەزەڭىنە شىعىپ وتىر.
بۇگىنگى ويىندا باتە جانكۇيەرلەرىنە ەرەكشە ريزا بولدىق. كومانداسىنىڭ ءاربىر قيمىلىنا شاپالاقپەن باعا بەرىپ, العا قاراي ۇمتىلۋعا قولداۋ ءبىلدىرىپ وتىردى. كەي ساتتەردە «استانا» ويىنشىلارى ۋاقىت سوزدى دەپ, تورەشىلەرگە ءوز نارازىلىعىن ءبىلدىرىپ جاتتى.
