الماتىدا كاسىپكەرلەر زاڭسىز جولمەن اتاۋلى الەۋمەتتىك كومەك الىپ وتىرعان. قالا اكىمدىگى سونداي 1350 وتباسىنى انىقتاپ, ولارعا جاردەماقى بەرۋدى توقتاتتى. بۇل تۋرالى بۇگىن الماتى اكىمى باقىتجان ساعىنتاەۆ بوستاندىق اۋدانىنىڭ تۇرعىندارىمەن كەزدەسۋ كەزىندە ايتتى.
بەلگىلى بولعانداي اتاۋلى الەۋمەتتىك كومەكتى زاڭسىز الىپ وتىرعانداردىڭ اراسىندا كىرىستەرىن جاسىرعاندار كوپ بولىپتى. سونداي-اق, بىرقاتار وتباسىلار ۋاقىتشا تىركەۋگە تۇرۋ ارقىلى كومەككە قول جەتكىزگەن.
ء«بىز قالاعا ۋاقىتشا تىركەۋگە تۇرىپ, بالالارىن وزگە وڭىرلەردەگى اتا-اجەلەرىمەن قالدىرعان وتباسىلاردى انىقتادىق. ەگەر بىزدە 9350 وتباسى اتاۋلى الەۋمەتتىك كومەك الاتىن بولسا, ولاردىڭ 20 پايىزعا جۋىعىنىڭ تۇراقتى تىركەۋى جوق. ءسويتىپ الماتى, تۇركىستان جانە جامبىل وبلىسىنىڭ تۇرعىندارى ءبىزدىڭ قالادان جاردەماقى الىپ جۇرگەن. وسىنداي زاڭسىز جولمەن تولەم الىپ جۇرگەندەردى انىقتاۋ ارقىلى 83 ميلليون تەڭگە ۇنەمدەلدى», دەدى الماتى قالاسىنىڭ اكىمى باقىتجان ساعىنتاەۆ.
شاھار باسشىسى جىل سوڭىنا دەيىن تەكسەرىس جۇمىستارى جالعاساتىنىن جەتكىزدى. ەگەر كومەكتى زاڭسىز العاندار انىقتالسا, ولارعا تولەم بىردەن توقتاتىلادى. بۇدان بولەك باقىتجان ساعىنتاەۆ كوپبالالى وتباسىلاردى قولداۋعا رەسپۋبليكالىق بيۋدجەتتەن قالاعا قوسىمشا 3 ميلليارد 450 ميلليون تەڭگە بولىنگەنىن مالىمدەدى.
الماتى
