ارىستاعى جامبىل وبلىسىنىڭ شتابىنا قاراستى 3-سەكتورعا 11 كوشە بەكىتىلگەن بولاتىن. وندا 312 جەكە تۇرعىن ۇيلەرمەن قاتار 14 الەۋمەتتىك جانە كوممەرتسيالىق نىسان بارى انىقتالعان ەدى. زەردەلەۋدەن وتكەن جەكە تۇرعىن ءۇيدىڭ ءبارىنىڭ دە اقاۋ اكتىلەرى تولتىرىلىپ, سمەتالاۋ جۇمىستارى جاسالدى. ناتيجەسىندە قيراعان 4 ءۇيدىڭ ەكەۋى قايتادان بوي كوتەرىپ, ەكەۋى تولىق جاڭعىرتىلدى. قالعان 309 ۇيگە ءارتۇرلى جوندەۋ جۇمىستارى جۇرگىزىلدى. بۇل جۇمىستارعا 4 مەردىگەر كومپانيا مەن 500-دەن اسا قۇرىلىسشى تارتىلدى. ءتيىستى شىعىندار رەسپۋبليكالىق بيۋدجەت پەن ارنايى قورعا جيناقتالعان قارجىدان قاراستىرىلدى. وتكەن ايدا جامبىل وبلىسىنىڭ اكىمى اسقار مىرزاحمەتوۆ ارىس قالاسىنا ارنايى بارىپ, تۇرعىندارمەن كەزدەسكەن ەدى. سونىمەن قاتار, اكىم جامبىلدىق مەردىگەرلەرگە قۇرىلىس جۇمىسىن ساپالى ورىنداۋدى ناقتى تاپسىرعان بولاتىن. ناتيجەسىندە ەلىمىزدە العاشقىلاردىڭ ءبىرى بولىپ جامبىل ءوڭىرى ارىستاعى قۇرىلىس جۇمىستارىن ابىرويمەن اياقتادى.
ارىس قالاسىندا قالاداعى جامبىل وبلىسىنا تيەسىلى 3-سەكتورداعى قۇرىلىس جۇمىستارىنىڭ اياقتالۋىنا وراي سالتاناتتى شارا ءوتتى. وعان جەرگىلىكتى تۇرعىندارمەن قاتار جۇمىس جۇرگىزگەن بىرقاتار قۇرىلىسشىلار دا قاتىستى. جامبىلدىق دەلەگاتسيانى ارىسقا جامبىل وبلىسى اكىمىنىڭ ورىنباسارى ەركەبۇلان داۋىلباەۆ باستاپ باردى. اتالعان جيىندى تۇركىستان وبلىسى اكىمىنىڭ ءبىرىنشى ورىنباسارى قوسمان ايتمۇحامەتوۆ ءسوز سويلەپ اشتى. بۇدان كەيىن ەركەبۇلان داۋىلباەۆ جامبىل وبلىسى شتابىنىڭ قارقىندى جۇمىسى مەن ارىستىقتاردىڭ بەلسەندىلىگى تۋرالى ايتىپ ءوتتى. سونداي-اق, قالانى قالپىنا كەلتىرۋگە اتسالىسقان كوپشىلىككە العىسىن ءبىلدىرىپ, مۇنداي توتەنشە جاعداي ەندى ەلىمىزدە ورىن الماۋىن تىلەدى. سونىمەن قاتار, جيىندا جامبىل وبلىستىق ءماسليحاتىنىڭ حاتشىسى باعلان قاراشولاقوۆ, ارىس قالاسىنىڭ اكىمى مۇرات قادىربەك جانە وزگە دە ازاماتتار ءسوز الىپ, جامبىلدىق قۇرىلىسشىلاردىڭ ەلەۋلى ەڭبەگىن اتاپ ءوتتى.
سالتاناتتى جيىندا «ارىستى تەربەتكەن اۋليەاتا اۋەندەرى» اتتى كەنەن ازىرباەۆ اتىنداعى جامبىل وبلىستىق فيلارمونياسىنىڭ كونتسەرتتىك باعدارلاماسى كوپشىلىك نازارىنا ۇسىنىلدى. باعدارلاما بارىسىندا ارىسقا ارناۋ ايتىلىپ, اسەم اندەر شىرقالدى. سونىمەن قاتار, شتاب جۇمىسىنىڭ باسى-قاسىندا جۇرگەن بىرقاتار ازاماتتار مەن قۇرىلىسشىلار ماراپاتتالدى.
سونداي-اق, بۇل كۇنى جارىلىس كەزىندە قيراعان 4 ءۇي قايتادان بوي كوتەرىپ, سالتاناتتى تۇردە پايدالانۋعا بەرىلدى. ول ۇيلەردىڭ ەكەۋى باسىنان قايتا سالىنسا, ەكەۋى تولىق جاڭعىرتىلعان. باسپانا قۇرىلىسىن جۇرگىزگەن مەردىگەر كومپانيا اتالعان ءۇي يەلەرىنە ءوز سىي-سياپاتتارىن جاسادى.
اۋليەاتالىقتار ارىستىقتارعا توتەنشە جاعداي ورىن العان كۇننەن باستاپ قولۇشىن سوزىپ كەلەدى. ماسەلەن, ونداعى زارداپ شەككەن ازاماتتارعا كومەك كورسەتۋ بويىنشا «ارىس. ءبىز بىرگەمىز!» رەسپۋبليكالىق اكتسياسى اياسىندا تاراز قالاسىندا 4 قابىلداۋ پۋنكتى اشىلعان بولاتىن. «Nur Otan» پارتياسىنىڭ وبلىستىق جانە اۋداندىق فيليالدارىنداعى ارنايى پۋنكتتەردە جينالعان كومەك ماتەريالدارى, ازىق-ت ۇلىك پەن ءبىرىنشى قاجەتتىلىكتەگى زاتتار ارىسقا جەتكىزىلگەنىن جۇرتشىلىق جاقسى بىلەدى. سونىمەن قاتار, ارىسقا بارلىعى 400 توننادان استام گۋمانيتارلىق كومەك, ازىق-ت ۇلىك, تۇرمىسقا قاجەتتى بۇيىمدار جونەلتىلگەن. تۇرعىندارعا مەديتسينالىق كومەك كورسەتۋ ءۇشىن 2,2 ميلليون تەڭگەگە قاجەتتى ءدارى-دارمەكپەن قامتىلعان ارنايى جاساقتالعان 4 رەانيموبيلمەن 8 فەلدشەر ارىس قالاسىنا جىبەرىلدى. سونداي-اق, ارىس قالاسىنىڭ 400-گە جۋىق بالاسى جامبىل وبلىسىنداعى «تاۋ سامالى», «جۇرىندىساي», «جۇلدىز» سىندى جازعى ساۋىقتىرۋ لاگەرلەرىندە دەمالدى.
جامبىل وبلىسى
