جۇمىستار بيىلدان باستالماق. بۇل تۋرالى بۇگىن قالا اكىمى باقىتجان ساعىنتاەۆ المالى اۋدانىنىڭ تۇرعىندارىمەن كەزدەسۋ كەزىندە مالىمدەدى.
الماتىدا قوعامدىق كولىك جولاۋشىلارىنىڭ سانىن ارتتىرۋ ءۇشىن, تۇرعىندارعا كورسەتىلەر قىزمەت ساپاسىن دا كوتەرۋ كوزدەلۋدە. بۇدان بىلاي الىپ شاھار حالقى ايالدامادا اۆتوبۋستاردى ۇزاق كۇتپەيدى. ءجۇرۋ جيىلىگىن جىلدامداتۋ ءۇشىن اۆتوبۋستاردىڭ سانىن 2000-عا جەتكىزۋ جوسپارلانۋدا. سونداي-اق قالا كوشەلەرىندە جۇيتكيتىن ترولەيبۋستاردىڭ دا قاتارى كوبەيەدى. الداعى ۋاقىتتا قوعامدىق كولىكتىڭ بۇل ءتۇرىنىڭ تاعى 4 جاڭا باعىتى اشىلادى. كۇن سايىن تروللەيبۋس جەلىلەرى شامامەن 30 رەت ءۇزىلىپ, جولاۋشىلاردى ابىگەرگە سالادى ەكەن. سوندىقتان بيىلدان قالدىرماي ەكولوگيالىق كولىكتىڭ جەلىلەرىن جوندەۋ باستالادى. اۋەلى تيميريازەۆ كوشەسىندەگى ەلەكتر جەلىسى جاڭارتىلسا, كەلەر جىلى قالا اۋماعىنداعى تروللەيبۋس سىمدارى تۇگەل اۋىستىرىلادى.
«قالا تۇرعىندارى تروللەيبۋستاردىڭ سانىن كوبەيتۋ تۋرالى ۇسىنىستى ءجيى ايتادى. سوندىقتان جاڭادان 4 باعىت اشامىز جانە قوسالقى ستانتسيالار سالامىز. بەكەتتەر ەكولوگيالىق كولىكتەردىڭ ءجۇرىسىن جەدەلدەتىپ, جەلىلەردىڭ ۇزىلۋىنە جول بەرمەيدى. مەترونىڭ قۇرىلىسى دا تۇرالامايدى. «سارىارقا» مەن «دوستىق» بەكەتتەرىن ىسكە قوسۋ جۇمىستارى ۋاقىتىندا اياقتالادى. ال «جەڭىل رەلستى كولىكتەر» – شامامەن 360 ملرد تەڭگە جۇمسالاتىن ۇلكەن جوبا. قازىر جوباعا جان-جاقتى ساراپتاما جاساپ, ۇكىمەتكە ۇسىنىس بىلدىردىك. ەگەر قولداۋ تاۋىپ, قارجى بولەتىن بولسا, لرت قۇرىلىسى باستالادى»,- دەدى الماتى قالاسىنىڭ اكىمى باقىتجان ساعىنتاەۆ
وسىلايشا شاھار باسشىسى المالى اۋدانى تۇرعىندارىمەن قالانى دامىتۋ جوسپارلارىمەن تۇگەلدەي ءبولىستى. ءبىلىم, ساپالى مەديتسينالىق كومەك, قاۋىپسىزدىك ماسەلەلەرىنىڭ بارلىعى قامتىلدى. كەلەر جىلدىڭ سوڭىنا دەيىن قالانىڭ بارلىق كوشەسى جارىقتاندىرىلاتىن بولسا, 2025 جىلدىڭ اياعىنا دەيىن الماتىدا كورىكتەندىرىلمەگەن ءبىر دە ءبىر ءۇي اۋلاسى قالمايدى. ارمەن قاراي اكىم ءار تۇرعىننىڭ ارقالاعان ارىزىن تىڭدادى. جۇرتتى پاتەر يەلەرى كووپەراتيۆىنىڭ قىزمەتى, اۆتوتۇراق, بالا باقشالاردى جوندەۋ جانە مەكتەپتەر جانىنان قوسالقى نىساندار سالۋ, سونداي-اق ەسكى ۇيلەردى ءسۇرۋ الاڭداتىپ وتىر ەكەن.
جالپى 2018-2030 جىلدار ارالىعىندا 948 ءۇي الماتىداعى تۇرعىن ۇيلەردى كەشەندى قايتا جاڭارتۋ باعدارلاماسىنا ەنگىزىلدى. ولار ءۇش كەزەڭدە, ياعني 2018-2020 جىلدارى- 267, 2021-2025 جىلدارى – 284, 2026-2030 جىلدارى-397 ءۇي سۇرىلەتىن بولادى. ەڭ كوپ «تازارتىلاتىن» اۋدان - تۇركسىب اۋدانى. قالانىڭ بۇل بولىگىندە 482 ءۇي سۇرىلەدى. ال ەڭ از سۇرىلەتىن ۇيلەر ناۋرىزباي اۋدانىندا.
«قالادا شامامەن 1000 ەسكى ءۇي بار. ولاردى سۇرسەك, ورنىنا 1 ملن 300 شارشى مەتر پاتەر تۇرعىزۋعا بولادى ەكەن. سوندىقتان «ەسكى ۇيلەردى» ءسۇرۋ باعدارلاماسىن مىقتاپ قولعا الامىز. مۇنداي باعدارلاما ارقىلى تۇرعىن ءۇي كەزەگىن جىلجىتپاساق, قالادا ءۇي سالاتىن بوس جەر جوق. ال ەسكى ۇيلەردىڭ ينجەنەرلىك جەلىلەرى تارتىلعان. تەك قۇرىلىس جۇمىستارىن عانا تالاپ ەتەدى. ول ۇيلەردەگى تۇرعىنداردى ۋاقىتشا كوشىرە تۇرامىز, باسپانا تۇرعىزىلعاندا ولار قايتىپ ءوز ۇيلەرىنە كەلەدى», دەدى باقىتجان ساعىنتاەۆ.
الماتى
