شىنىندا دا ءاربىر ادام ءۇشىن باسپانانىڭ باستى ماسەلە ەكەنى راس. بۇگىنگى تاڭدا تۇرعىنداردى باسپانامەن قامتاماسىز ەتۋ ماقساتىندا مەملەكەت تاراپىنان ءتيىستى قولداۋ كورسەتىلىپ كەلەدى. تاۋەلسىزدىك جىلدارى ەلىمىزدە قازاقستاندىقتاردى تۇرعىن ۇيمەن قامتاماسىز ەتۋ بويىنشا اۋقىمدى جۇمىستار اتقارىلعانى دا ەل ەسىندە. ناتيجەسىندە تاراز قالاسىندا دا كوپتەگەن تۇرعىن ۇيلەر سالىنىپ, جەرگىلىكتى جۇرتشىلىقتى باسپانامەن قامتۋ جولعا قويىلدى. ماسەلەن, وسىدان بىرنەشە جىل بۇرىن عانا اشىق دالا بولعان اۋماقتا 15-ءشى شاعىن اۋدان بوي كوتەرىپ, قالا حالقى كوپ شوعىرلانعان ايماققا اينالدى. وسى ماقساتتا «نۇرلى جەر» باعدارلاماسى اياسىندا اعىمداعى جىلى جالپى 17,6 ميلليارد تەڭگەگە بارلىعى 2118 پاتەرلى 30 كوپقاباتتى تۇرعىن ءۇيدىڭ قۇرىلىسى جۇرگىزىلىپ, جىل سوڭىنا دەيىن 1988 پاتەرلى 28 پاتەرلى تۇرعىن ۇيلەردى پايدالانۋعا بەرۋ جوسپارلانۋدا. جامبىل وبلىسى اكىمدىگىنىڭ مالىمەتىنشە, كوپبالالى وتباسىلاردى باسپانامەن قامتاماسىز ەتۋ ماسەلەسىن شەشۋ ءۇشىن اعىمداعى جىلدىڭ ءبىرىنشى جارتىجىلدىعىندا 120 پاتەر بەرىلدى. ونىڭ ىشىندە 93 پاتەر ارەندالىق ۇيلەر ەسەبىنەن بەرىلگەن بولسا, 27 پاتەر دەمەۋشىلەر ەسەبىنەن تابىستالعان. جىل سوڭىنا دەيىن 493 كوپبالالى وتباسىن باسپانامەن قامتۋ جوسپارلانعان.
سونىمەن قاتار, كەزەكتىلىك كەلگەنگە دەيىن كوپبالالى وتباسىلاردىڭ تۇرعىن ءۇي ماسەلەسىن ۋاقىتشا شەشۋ ءۇشىن 612 پاتەرلى 12 جاتاقحانا قۇرىلىسىنا قاراجات قاراستىرىلىپ, ولاردى جىل سوڭىنا دەيىن ەل يگىلىگىنە بەرۋ جوسپاردا بار. ال, كونستيتۋتسيا كۇنى قارساڭىندا پايدالانۋعا بەرىلگەن 80 پاتەرلى, 9 قاباتتى تۇرعىن ءۇي زاماناۋي ۇلگىدە سالىنعان. ايتۋلى مەرەكە قارساڭىندا بىرقاتار تارازدىق تۇرعىندار جاڭا باسپاناعا قول جەتكىزىپ, قونىس تويىن تويلاۋدا.
جامبىل وبلىسى
