ءىس-شارانىڭ اشىلۋىندا سويلەگەن سوزىندە سىرتقى ىستەر ءمينيسترىنىڭ ورىنباسارى ەرجان اشىقباەۆ تۇڭعىش پرەزيدەنت – ەلباسى نۇرسۇلتان نازارباەۆتىڭ يادرولىق قارۋدان ازات ايماقتار اراسىندا ديالوگ قالىپتاستىرۋ باستاماسىن ىلگەرىلەتۋدەگى ءرولىن جانە قازاقستاننىڭ بۇۇ باس حاتشىسى انتونيۋ گۋتەرريشتىڭ قارۋسىزدانۋ جونىندەگى كۇن ءتارتىبىن ىسكە اسىرۋعا قوسقان ۇلەسىن اتاپ ءوتتى. سونداي-اق حالىقارالىق قاۋىپسىزدىك ءۇشىن جاھاندىق قاۋىپ-قاتەرلەردىڭ كوبەيۋى جاعدايىندا ياقاا قاتىسۋشى-مەملەكەتتەر اراسىنداعى ىنتىماقتاستىقتىڭ ماڭىزدىلىعىنا نازار اۋدارىلدى.
وسى رەتتە قازاقستاندىق ديپلومات ەلىمىزدىڭ جاھاندىق انتيادرولىق قوزعالىس كوشباسشىلارىنىڭ ءبىرى رەتىندە يادرولىق قارۋدان ازات ايماقتاردى نىعايتۋدى جانە ولاردىڭ گەوگرافياسىن كەڭەيتۋدى قولداپ كەلگەندىگى تۋرالى جاريالادى.
سەمينار جۇمىسىنا يادرولىق قارۋدان ازات ايماقتار, ولاردىڭ اراسىندا افريكالىق (پەليندابا كەلىسىمى), لاتىن امەريكالىق (تلاتەلولكو كەلىسىمى), وڭتۇستىك-تىنىق مۇحيت (راروتونگا كەلىسىمى), ورتالىق ازيالىق (سەمەي كەلىسىمى) جانە وڭتۇستىك-شىعىس ازيالىق (بانگكوك كەلىسىمى) ايماقتارى وكىلدەرى قاتىسۋدا.
ءىس-شارا سەمەي يادرولىق سىناق الاڭىنىڭ جابىلۋىنىڭ تاريحي كۇنى بولىپ تابىلاتىن 29 تامىزدا, الەمدىك دەڭگەيدە اتالىپ وتەتىن يادرولىق سىناقتارعا قارسى ءىس-قيمىلداردىڭ حالىقارالىق كۇنىمەن ۇشتاستىرىلعان. قازاقستاننىڭ ءوز اۋماعىندا وسىنداي ءىس-شارانى ۇيىمداستىرۋ تۋرالى شەشىمى تۇڭعىش پرەزيدەنت – ەلباسى ن.نازارباەۆتىڭ باستاماسىنا نەگىزدەلەدى, ول ەلىمىزدىڭ اتالعان ءىس-شارانى جۇزەگە اسىرۋ نيەتى تۋرالى 2017 جىلعى 29 تامىزدا, اەحا تومەن بايىتىلعان ۋران بانكى عيماراتىنىڭ اشىلۋ راسىمىندە جاريالاعان بولاتىن.
سەمينارعا قاتىسۋشىلار, بۇعان دەيىن قۇرىلعان جانە جاڭادان پايدا بولاتىن زونالار اراسىنداعى ۇزاق مەرزىمدى ساياسي ىنتىماقتاستىقتىڭ ناقتى مەحانيزمدەرىن قالىپتاستىرۋ ماقساتىندا, يادرولىق قارۋدان ازات ايماقتاردى ينستيتۋتسيوناليزاتسيالاۋدىڭ بىرلەسكەن جوسپارلارىن تالقىلاۋدى جوسپارلاپ وتىر.
