كەيبىر ازاماتتار دا زاڭ تالاپتارىن تاپ-تۇيناقتاي ەتىپ ورىنداي بەرمەيدى. ءوز ىسىنە نەمكەتتى, شارۋاسىنا شالاعاي. ۋاقىت وتكىزىپ بارىپ ادىلدىك قۋماق. وندايلار كوپ-اق. تەگىن زاڭ قىزمەتىن كورسەتۋ بۇگىنگى كۇنگى كوپشىلىك كوكەيىندە جۇرگەن ويدى ءدوپ باسقانداي. بارلىق شارا ءومىردىڭ وزىنەن تۋىنداعان جايلاردى قامتىپ وتىر. «نەگىزگى زاڭ اپتاسى» جوباسى اياسىندا حالىققا تەگىن زاڭ كومەكتەرىن كورسەتۋ قولعا الىندى.
رەسپۋبليكالىق اكتسيا شەڭبەرىندە اۋماقتىق نوتاريالدىق پالاتا نوتاريۋستەرى جانە وبلىستىق ادۆوكاتتار القاسى ادۆوكاتتارىنىڭ قاتىسۋىمەن وبلىس ورتالىعىندا, سونداي-اق بارلىق اۋدانداردا كەڭ اۋقىمدى جۇمىس جۇزەگە اسىرىلۋدا. الدىمەن باق ارقىلى حالىقتى قۇلاقتاندىرىپ, ءوز قىزمەتتەرى جايىندا حاباردار ەتىپتى.
– كادىمگى قاراپايىم تىرشىلىكتە الەۋمەتتىك نەمەسە قارجىلىق قيىن جاعدايعا تاپ بولعان ازاماتتار ادۆوكاتتار نەمەسە زاڭ كەڭەسشىلەرىنەن ءوزىنىڭ قۇقىقتىق جاعدايىن تولىق سۇيەمەلدەۋ ءۇشىن اقىسىز كومەك الۋ زاڭدا كوزدەلگەن, – دەيدى وبلىستىق ادىلەت دەپارتامەنتى باسشىسىنىڭ مىندەتىن اتقارۋشى باقىتجان ومىرزاقوۆ, – ال بۇل جولعى ءىس-شارالارىمىز زاڭ كومەگىنىڭ اشىقتىعىن, ادىلدىگىن جانە ساپاسىن كوتەرۋ ماقساتىندا بولىپ وتىر.
شىنىندا دا زاڭ كومەگىنە ءزارۋ جاندار از ەمەس ەكەن. قىلمىستىق ىستەر جونىندەگى مامانداندىرىلعان اۋدانارالىق زاڭدىق كەڭەس بەرۋ ورتالىعىنىڭ مەڭگەرۋشىسى اسقار اقپاروۆتىڭ ايتۋىنا قاراعاندا, كومەك سۇراپ كەلەتىندەردىڭ دەنى الدىمەن اليمەنت ءوندىرۋ, م ۇلىك قۇقىعى, نەسيە توڭىرەگىندە ەكەن.
– ءبىز, ادۆوكاتتار اسقار ءامىرجانوۆ, باقىتجان قۇسايىنوۆ ۇشەۋىمىز وبلىستىق Nur Otan پارتياسى فيليالىنىڭ عيماراتىندا قالا تۇرعىندارىن قابىلداپ, كەڭەس بەردىك, – دەيدى اسقار اقپاروۆ, – كوپ جايدا ءالى دە بولسا ازاماتتاردىڭ زاڭ تالاپتارىن جەتىك مەڭگەرە قويماعاندىقتارى بايقالادى. ەكىنشى ءبىر ماسەلە, قۇجاتتارعا ىجداھاتتى بولۋ جايى. نەگىزى كەلىسپەۋشىلىك بولماۋ ءۇشىن كەز كەلگەن ءىستى باستار الدىندا ءوز شارۋالارىنا قاتىستى زاڭ تالاپتارىن جان-جاقتى ءتۇيسىنىپ, مامانداردان كەڭەس الىپ بارىپ باستاۋ قاجەت ەكەندىگىن ەسكەرە بەرمەيمىز. ەگەر بارلىعى زاڭ اياسىندا بولسا, قيىندىققا تاپ بولماس ەدى. قابىلداۋ وتكىزگەن كۇنى زاڭ كومەگىنە جۇگىنگەندەر تولىققاندى كەڭەس الدى.
كەلۋشىلەر ءالى دە از ەمەس ەكەن. كومەك سۇراي كەلگەن ءبىر ازاماتپەن جولىقتىق. ونىڭ ماسەلەسى مۇراعا قالعان پاتەردىڭ كىمگە تيەسىلى بولاتىندىعى جونىندە ەكەن. ۇزاققا سوزىلعان, ءادىل شەشىمىن تابۋ وڭايعا تۇسپەيتىن شىم-شىتىرىق ءىس. ارااعايىننىڭ اقىلىمەن شەشىلمەگەن سوڭ زاڭعا جۇگىنبەك.
اكتسيا بارىسىندا قانشاما ادام كوپتەن بەرى قوردالانىپ قالعان ماسەلەلەرىنىڭ ءمانىسىن انىقتاپ, ءبىر ارىلىپ قالدى.
اقمولا وبلىسى
