– ماعجان جۇماباەۆتىڭ اقان سەرى تۋراسىندا: «اقان ونەرىمەن سۇلۋ ەمەس, اقان تاعدىرىمەن سۇلۋ» دەيتىنى بار عوي. وسى ءسوزدى اقىن فاريزاعا دا قاتىستى ايتۋعا بولاتىن سەكىلدى... كەلىسەسىز بە؟
– البەتتە. تاعدىرى سۇلۋ ادامدار بولادى. ولەڭىمەن عانا ەمەس, بولمىسىمەن, تاعدىرىمەن سۇلۋ. مەن ءۇشىن فاريزا سونداي جان.
– اقىن فاريزا درامالىق كەيىپكەرگە قالاي اينالدى؟ جالپى, «فاريزاعا» قالاي كەلدىڭىز؟
– فاريزا وڭعارسىنوۆا ىشكى سىرىن قۇپياسىن ەشكىمگە اشپاعان, جۇمباق... ەت پەن سۇيەكتەن جارالعان ول دا پەندە. قۋاندى دا, جۇباندى دا. بىراق مەن ءوز ۇعىم-تۇيسىگىمدەگى دارا اقىندى, ۇلى فاريزانى كوردىم. فاريزا اپاعا وسى دەڭگەيدە ءۇڭىلدىم. وسىنداي بولمىستاعى فاريزانى تۇسىنگىم كەلدى, ايالاعىم كەلدى. فاريزا ماعان جۇمباعىمەن قىزىقتى بولدى.
– اركىمنىڭ جۇرەگىندە ءوزى تانىپ, عاشىق بولعان «مەنشىكتى فاريزاسى» بار. ءسىزدىڭ فاريزا نەسىمەن ەرەكشە دەپ ويلايسىز؟
– مەن ءومىر سۇرگەن ءداۋىر – الىپتار ءداۋىرى. باردى ۋاقىتىندا باعالاي بەرمەيمىز, قۇنىن دا بىلمەيمىز. ابايدىڭ: ء«ولىنىڭ جامانى جوق, ءتىرىنىڭ جاماندىقتان امانى جوق» دەۋى ءبىزدىڭ حالىقتىڭ مىنەز پيعىلىن اڭعارتسا كەرەك. فاريزانى كوزىنىڭ ءتىرى كەزىندە-اق: «قازاقتا اقىن قىز كوپ, فاريزا جالعىز» دەگەنىم بار. قۇدايعا شۇكىر, ادەبيەتىمىز الىپتاردان كەندە ەمەس. سولاردىڭ ءبىرى ءھام بىرەگەيى – فاريزا! ول كىسىمەن توننىڭ ىشكى باۋىنداي جاقىن بولدىم دەسەم, وتىرىك بولادى. فاريزا اپاي مەنى ىزدەپ وتىراتىن, شاقىرىپ الاتىن, ءتىل شالاتىن. شىن جاقسى كورىپ, بار مەيىرىمىمەن ەركەلەتتى. تىرشىلىكتە كوپ قولداۋ ءبىلدىردى. دەمەك, شىعارماشىلىعىما كوڭىلى تولعان شىعار. ايتپەسە, مەن دە قازاقتىڭ قالام ۇستاعان كوپ قىزىنىڭ ءبىرىمىن عوي. اپاعا مەن دە تارتىلدىم. رۋح جاقىندىعى, جان قالاۋىمىز بولار. ايتەۋىر ءوزىم بۇل اقىندى ەرەكشە ءپىر تۇتقانىم راس. بىراق پەسامدا يدەالدى وبراز جاساۋعا اۋەستەنبەدىم. فاريزانىڭ جانىنا ءۇڭىلدىم, ىشكى قۇپياسىن اشقىم كەلدى. ءوزى كورىپ وتىرسا مىندەتتى تۇردە: «نە بۇلدىرگەنسىڭ؟» دەر مە ەدى, كىم ءبىلسىن...
– فاريزا وڭعارسىنوۆانىڭ اقىندىعى عانا ەمەس, ءومىرى دە كوزىنىڭ تىرىسىندە-اق اڭىزعا اينالىپ كەتكەن ادام عوي. ىزىنەن اڭىز ەرگەن تۇلعانىڭ ءسىز جازعان پەسادا نەسىنە باسىمدىق بەرىلدى؟ ومىرىنە مە, الدە ولەڭىنە مە؟
– ءومىرىن دە, ولەڭىن دە بىرگە ءوردىم. فاريزانىڭ وبرازىن جاساۋ ءۇشىن قاقتىعىستار دا, شيەلەنىستەر دە قاجەت. دراماتۋرگيانىڭ تابيعاتى تالاپ ەتەتىن دۇنيەلەر قوسىلدى. فاريزانىڭ ءار ولەڭىنىڭ ءىشى اقتارىلدى. ول كىسىنىڭ ەموتسياسىنان دراما, تراگەدياسىنان فيلوسوفيا ىزدەدىم. جانىنا ۇڭگۋ ارقىلى ىشكى ينتوناتسياسىنا شتريحتار قوستىم. فاريزا – ادام, اقىن. ول ومىردە اشۋلانا دا الدى, جىلاي دا الدى, جالعىزسىرادى دا. ادامعا ءتان قاسيەتتىڭ ءبارى ونىڭ دا بويىندا بولدى. مۇمكىن كەمشىلىگى دە بولعان شىعار. بىراق مەن ونى جاقسى كورىپ جازدىم, ونىڭ تابيعاتىنا قيانات جاسامادىم. ويتكەنى ول – حالىقتىڭ سۇيىكتى اقىنى. ءوز قولتاڭباسىمەن ماعان سىيلاعان ون تومدىعى بار ەدى. فاريزا اپانى سولاردىڭ اراسىنان ىزدەدىم. ءۇنىن ەستىدىم, جانىن ۇقتىم, سويلەستىم, تىرەستىم, ومىردەگىدەي بولدى. ەگەر ول كىسى ومىردە بولسا, بۇل پەسا جازىلماعان بولار ەدى. مەن ونى ىزدەگەن شىعارمىن...
– ىزدەگەنىڭىزدى تابا الدىڭىز با؟
– ونى تاپ باسىپ ايتۋ قيىن... كورەرمەن – تورەشى. بىراق تالپىنىپ كوردىم. راس, «فاريزانى» جازۋ وڭاي بولعان جوق. ول كىسى ومىردەن كەشە عانا ءوتتى. بۇگىنگى كورەرمەن فاريزانى جاقسى بىلەدى. سوندىقتان اقىن وبرازىن قيالعا قۇرىپ, وتىرىك جاساي المايسىڭ. وسىدان ون جىل بۇرىن اقىن وڭايگۇل تۇرجان اپانىڭ 70 جىلدىعى قارساڭىندا «شاشى اعارعان قىز» دەگەن كىتابىن اكەپ بەرىپ تۇرىپ: «وسى سەن ءتۇبى فاريزا اپاي تۋرالى جازاتىن سياقتىسىڭ» دەگەن. وڭايگۇلدىڭ سول ايتقانى كەلىپ, ءساتى ەندى تۋعان شىعار.
– درامادا تاريحي شىندىق پەن كوركەم شىندىقتىڭ ارا سالماعى قاي دەڭگەيدە ساقتالدى؟
– اۆتوبيوگرافيالىق شىعارما بولعاندىقتان تاريحي دەرەككە دە سۇيەندىم. ولەڭ وقۋمەن شەكتەلۋ كورەرمەندى جالىقتىرادى. ونداي قويىلىمدار كوپ قوي. «فاريزا» دراماتۋرگيا جانرى بولعاندىقتان وقىس دەتالدار مەن ەپيزودتارمەن شيرىقتىرىپ وتىرۋعا باسا كوڭىل ءبولدىم.
– ماسەلەن؟
– وسى پەسانى جازىپ وتىرعاندا فاريزا اپايدىڭ كىتاپتارىن كوپ اقتاردىم. قايتا-قايتا وقىدىم. كوپ ويلاندىم. ولەڭدەرىنەن اپايدىڭ ءوزىن ىزدەدىم. سىرلاسقىم كەلدى. سوندا ول كىسى ءوزىنىڭ ۇلكەن وكىنىشىن ايتىپتى. مۇقاعالي اۋىرىپ جاتقاندا اپايدى كوپ ىزدەپتى. اقىرى كەلمەگەن سوڭ اتاقتى «فاريزا» دەگەن ولەڭىن جازىپ, بەرىپ جىبەرىپتى. اپاي ولەڭدى دە وقىعان. بىراق بارا الماعان. «باكۋگە ۇشاتىن كۇنىم جاقىن ەدى» دەپ جازىپتى كىتابىندا. بۇل دا ءبىر جۇمباعى بار اقىن جانىنىڭ قۇپياسى شىعار دەپ ويلايمىن. ءسىرا دا ادامنىڭ اياعى تۇسالاتىن, تابانى تارتپاي, بۇعاۋىن ۇزە المايتىن تۇسىنىكسىز ساتتەرىنىڭ جاۋابىن ەشكىم بىلمەس, تابا دا الماس. بىراق مەن ول كۇيدى جاقسى ءتۇسىندىم. سوندىقتان وسى ءبىر دەتالدى پەساعا ەنگىزدىم. ويتكەنى فاريزا اپام دا ءومىرىنىڭ سوڭعى ساتىندە مەنى ىزدەپتى. تالاي ادامنان سالەم دە ايتىپ جىبەرىپتى. الايدا... مەن دە بارا المادىم. ءوزىم تۇسىنبەيتىن ءبىر كۇش ول جاققا جەتكىزبەدى. بالكىم, اپايدىڭ شارشاعان, قاجىعان, دەرت مەڭدەگەن ءساتىن كورگىم كەلمەگەن شىعار. قاجىرلى, قايراتتى, قايسار قالپىن ەسىمدە ماڭگىلىك ساقتاپ قالۋدى قالاعان بولارمىن. اپاي دۇنيەدەن وتكەن سوڭ, شاڭىراعىنا بارۋ ءتىپتى قيىن بولدى. دەگەنمەن... باردىم. ەڭسەم كوتەرتپەي, ۇيگە ارەڭ كىردىم. ءسىڭلىسى الماگۇل وكپەسىن ايتتى. «سوڭعى ساتكە دەيىن «روزا, روزا» دەپ ىزدەدى عوي. قانشاما ادامنان سالەم ايتتى. سونشا جاقسى كورگەندە ءبىر رەت كەلمەدىڭىز» دەدى. وكپەسى ورىندى ەدى. ءۇنسىز كەتتىم. ءوزىمدى كىنالادىم. بىراق امال قانشا... كەيىن ارادا ءبىراز ۋاقىت وتكەن سوڭ, اپام تۇسىمە كىردى. «روزاجان, توڭىپ ءجۇرمىن» دەيدى. سۇق ساۋساعىمەن ءبىر ساڭلاۋدى كورسەتىپ: «وسى جاقتان ءبىر سۋىق جەل ۇرلەيدى دە تۇرادى» دەيدى جارىقتىق... سول ءتۇنى ۇيىقتاي المادىم. تاڭ قىلاڭ بەرە كوزى تىرىسىندە جانىنا جاقىن تارتاتىن سىڭلىلەرىنىڭ ءبىرى, قازاقتىڭ تالانتتى اقىن قىزى وڭايگۇل تۇرجانعا حابارلاستىم. اپامنىڭ باسىنا بارىپ قۇران وقىتتىق. قۇلپىتاسىنىڭ قاسىندا ۇزاق وتىردىق. رۋحىمەن سىرلاستىق. سول ساتتە «اپام جايلى جازۋىم كەرەك» دەگەن وي كەلدى. ىشتەي نىق بەكىدىم. اللا تىلەگىمدى قابىل ەتىپ, ورايىن كەلتىرگەن شىعار, ارادا كوپ ۋاقىت وتپەي اينۇر كوپباساروۆا دەگەن پروديۋسەر ءسىڭلىم حابارلاسىپ, فاريزا تۋرالى سپەكتاكل قويۋ جوسپارى بارىن جەتكىزدى. «تەلەارنالارداعى سۇحباتتارىڭىزدى تىڭداپ, سونداعى اقىن جايلى ايتقان ويلارىڭىز, ول كىسىگە دەگەن قۇرمەتىڭىز ەرەكشە تولقىتتى. ۇزاق جىل قاسىندا ءجۇرىپسىز. فاريزا اپاي تۋرالى پەسا جازىپ بەرسەڭىز» دەپ قولقا سالدى. جازۋدى باستامادىم دەگەنمەن, اپام جايلى تولعانىستارىم ىشىمدە ءپىسىپ جۇرگەن بولاتىن, بىردەن كەلىستىم. باس-اياعى ءبىر اي ۋاقىتتىڭ ىشىندە پەسانى اياقتادىم.
– ادەتتە, تۇلعا جايىندا جازىلار دراماتۋرگيالىق شىعارمالاردىڭ كوپشىلىگىندە داتا مەن تاريحي حرونولوگياعا باسىمدىق بەرىلەدى دە, سيۋجەت جەلىسى كوركەم وقيعا, ادام جانىنىڭ تەرەڭ تولعانىسى ەمەس, قۇرعاق ەسەپ بەرۋگە ۇلاسىپ كەتكەنىنە تالاي مارتە كۋا بولىپ ءجۇرمىز. ءوز «فاريزاڭىزدى» بۇگىنگى دراماتۋرگياعا ءتان وسى ءبىر «دەرتتەن» ساقتاي الدىڭىز با؟
– ءيا, اۆتوبيوگرافيالىق شىعارمانىڭ حرونولوگياعا اينالۋى كوركەمدىك كەڭىستىگىن ولتىرۋمەن بىردەي. وندا دراماتۋرگيا ەمەس, بيبليوگرافيا بولىپ شىعادى دا. اۆتوبيوگرافيادان كوركەم شىعارما تۋدىرۋدىڭ دا ءوز كۇردەلىلىگى بار. وسى جاعىن بارىنشا ەسكەرۋگە تىرىستىم.
– بۇل «فاريزانى» كەزىندەگى ءوزىڭىز جازعان «مۇقاعالي» شىعارماسىنىڭ, اكىم تارازي اعامىز دراماعا اينالدىرعان «اقىن... پەرىشتە... ماحاببات...» پەساسىنىڭ يدەيالىق جالعاسى دەۋگە بولا ما؟
– اكىم اعاڭنىڭ اتالعان سپەكتاكلى م.اۋەزوۆ تەاترىندا ءجۇرىپ جاتىر. مەنىڭ «مۇقاعاليىمدى» رەجيسسەر بايتەن اعا وماروۆ ساحناعا قويامىن دەپ, رەپەتيتسياسىنا شاقىرعان ەدى. پرەمەراسىن جاساي الماي ومىردەن ءوتىپ كەتتى. كەيىننەن شاكىرتتەرى ساحناعا قويدى دەپ ەستىدىم. مەن مۇقاعاليدى كورگەن ادام ەمەسپىن. ال فاريزانى ومىردە كوردىك, ەمەن-جارقىن ارالاستىق. فاريزا اپا ومىردە باسقا, شىعارماشىلىعىندا باسقا ادام. فاريزا قوعامعا, ورتاعا ىڭعايلاندى, بەيىمدەلدى. دەمەك, وزگەرگەن فاريزا. سۋرەتكەردىڭ شىندىعى – شىعارماسىندا عانا. سۋرەتكەر بولىپ ءومىر ءسۇرۋ كۇردەلى, سوندىقتان ومىردەن ەرتە وزاتىندار دا بولادى. ل.ن.تولستويدىڭ «پۋشكين تالانتتى بولماسا ءجۇز جاسايتىن ەدى, بىراق ودان نە پايدا؟..» دەگەنىندەي نەمەسە ءوزى تۋرالى «يا ۆ بىتۋ – مەلوچنيك» دەيتىنى بار. سۋرەتكەر باسقالارمەن سالىستىرعاندا ءوز-وزىمەن كۇرەسىپ جۇرەدى. شىندىعى – شىعارماسىندا دەگەنىم وسى. جازۋ – قيىن... قۇدايدىڭ الدىندا ەسەپ بەرىپ وتىرعانداي بولاسىڭ. سەبەبى جازۋ – اقيقاتتى ايتادى. سوندىقتان ومىردە ءوزىم كورگەن فاريزادان گورى, ولەڭدەگى اقىن فاريزانى ىزدەدىم.
– پەسالارىڭىزعا رەجيسسەردى ءوزىڭىز تاڭدايسىز با, الدە ءسىزدى رەجيسسەرلەردىڭ ءوزى ىزدەي مە؟
– وسى جولعى رەجيسسەردى مەن تاڭدادىم. پروديۋسەر اينۇر كوپباساروۆا قولداۋ كورسەتتى. پروديۋسەر اۋەلگىدە رەجيسسەردى شەتەلدەن الدىرتپاق بولدى. وسى ءداستۇردى اسا قۇپتامايمىن. شەتەلدىك رەجيسسەر بىرىنشىدەن, ءتىلىمىزدى بىلمەيدى, ۇلت مەنتاليتەتىنەن دە حابارسىز. دەمەك, اۆتوردىڭ ينتوناتسياسى جوعالادى. رەجيسسەر وزىنشە سۇرلەۋ ىزدەيدى, ول «جاڭالىعىن» قازاق كورەرمەنى تۇسىنبەي دە جاتادى. سول سەبەپتەن الىسقا بارمادىق, تالانتتى جاس رەجيسسەر فارحات مولداعاليەۆكە تاڭداۋ جاسادىق. فارحات شەتەلگە كوپ بارادى, شەبەرلىك سىنىپتارىنا ءجيى قاتىسىپ تۇرادى. ۇنەمى ىزدەنۋ ۇستىندە.
– سپەكتاكلگە اكتەرلىك قۇرام قالاي تاڭدالدى؟
– كوممەرتسيالىق تۋىندى بولعاندىقتان, بۇل جاعى ەندى تىكەلەي پروديۋسەردىڭ تالعامىنا تاۋەلدى بولدى. مەن ارالاسپادىم. رەجيسسەر ەكەۋىنىڭ ۇندەستىگى مەن ورتاق كەلىسىمىنىڭ ناتيجەسىندە شەشىلگەن بولار. اينۇر كوپباساروۆا ونەردىڭ ىشىندە جۇرگەندىكتەن, وزىندىك تالعامى مەن تاڭداۋى بار ادام. كەلىسە وتىرىپ تاڭدالدى دەۋگە بولادى.
– قۇپيا بولماسا, باستى رولدەردە كىمدەر وينايدى؟
– بۇل سپەكتاكلدە بۇگىنگى قازاق ساحناسىنىڭ «مەن» دەگەن تالانتتى اكتەرلەرىنىڭ باسى قوسىلدى دەپ ويلايمىن. پرەمەرا كۇنى كورەرمەن قاۋىم لەيلو-حانينگا بەكنازار, قۋاندىق قىستىقباەۆ, نازگۇل قارابالينا, ەرلان كارىباەۆ سىندى ءدۇلدۇل ارتىستەردىڭ ويىنىنا, ىزدەنىسىنە كۋا بولادى. سپەكتاكلگە مۋزىكانى بەلگىلى كومپوزيتور رينات گايسين جازدى. كەيبىر ماماندار شەتەلدەن شاقىرىلدى. كورەرمەن كوڭىلىنەن شىعاتىن ساپالى, ءساتتى, كوركەمدىك دەڭگەيى جوعارى قويىلىم بولادى دەپ كۇتەمىز.
– مەملەكەتتىك تاپسىرىس ەمەس, كوممەرتسيالىق تۋىندى بولعاندىقتان, «فاريزانىڭ» الداعى «تاعدىرى» قالاي بولماق؟ سپەكتاكلدى ىزدەگەن كورەرمەن قاي جەردەن كورە الادى؟
– ول جاعى اينۇر كوپباساروۆا باستاعان پروديۋسەرلىك ورتالىقتىڭ قۇزىرىنداعى شارۋا. ءبىر بىلەرىم – 5-6 قىركۇيەكتە الماتىداعى م.اۋەزوۆ اتىنداعى تەاتردا وتەتىن پرەمەرادان كەيىن «فاريزا» ماسكەۋگە جول تارتادى. قازاقتىڭ قايراتكەر ۇلى, رەسەيدەگى ەلشىمىز يمانعالي تاسماعامبەتوۆتىڭ قولداۋىمەن ايگىلى «سوۆرەمەننيك» تەاترىندا قويىلادى. ودان ءارى سپەكتاكلدى فاريزا اپامىزدىڭ تۋعان جەرىنە اپارىپ, جەرلەستەرىنە كورسەتۋ جوسپارى بار. ەلوردامىز بەن رەسپۋبليكانىڭ باسقا دا قالالارىنداعى پرەمەرانى اسىعا توسقان كورەرمەندەردى دە بۇل قۋانىش كوپ كۇتتىرمەيدى دەپ ويلايمىن.
– وزىڭىزبەن اڭگىمەلەسە قالعاندا دا, جازعان ەستەلىكتەرىڭىز, سۇحباتتارىڭىز بەن الەۋمەتتىك جەلىدەگى جازبالارىڭىزدى وقىپ وتىرىپ تا فاريزا وڭعارسىنوۆاعا دەگەن ايرىقشا قۇرمەتىڭىزدى سەزىنىپ, قالام ۇستاعان قىزدار اراسىنداعى اپالى-سىڭلىلىك تاماشا ءبىر سىيلاستىق پەن قۇرمەتكە قىزىعامىز, باس يەمىز... اقىن فاريزا ەمەس, ءسىز تانىعان ادام فاريزا قانداي ەدى؟
– مەن ومىردە دە پەندە فاريزادان الىس, اقىن فاريزامەن جاقىن بولدىم. بىردە ءابىش كەكىلباەۆ پەن جۇبايى كلارا اپاي, وڭايگۇل تۇرجان, ايبار ( ۇلى), الماگۇل ء(سىڭلىسى) عانا بولىپ ماڭعىستاۋعا باردىق. اپاي ماعان ءبىر اي بۇرىن قولقا سالدى. «ەڭ جاقىندارىمدى عانا جانىما ەرتىپ ەلگە الىپ بارا جاتىرمىن, ءوزىڭنىڭ بىرگە بارعانىڭدى قالايمىن», – دەدى. مەن بالالاردىڭ ءالى كىشكەنتاي ەكەنىن, ءبىر اپتا تىم ۇزاق بولاتىنىن, اكىمنىڭ قينالىپ قالاتىنىن ايتىپ باقتىم. سويتسەم, مەن جوقتا فاريزا اپاي اكىم اعاسىنا ءتىل شالىپ, مەنى سۇراپتى. اكىم اعاڭ: – فاكو, ءتىل شالدى. سەن بالالارعا الاڭ بولما! ماڭعىستاۋعا بارىپ كەل! – دەدى. سودان كەشكە قاراي فاريزا اپام حابارلاستى. اندەتىپ تۇر. «مەن ساعان باسىبايلى بول دەمەيمىن, جۇرسەيشى ازىن-اۋلاق جانىما ەرىپ» دەپ اقان سەرىنىڭ ءانىن قوڭىر داۋسىمەن ىرعاققا سالىپ قويادى. ءسويتىپ تارازيدان اتتاي قالاپ سۇراپ الىپ, ماڭعىستاۋدا ءبىر جۇما ساۋىق قۇردىق. ءان دە ايتىلدى, دومبىرا دا شەرتىلدى, سىر دا اقتارىلدى. ول كەزدەگى وبلىس اكىمى قىرىمبەك ەلەۋ ۇلى كوشەرباەۆ ەدى. مەن ول كىسىنىڭ شەشەندىگىن سول كەزدە كوردىم. عاجاپ قارسى الدى, اپايدىڭ تابانىن جەرگە تيگىزبەدى. ارنايى تىكۇشاقپەن بەكەت اتانىڭ باسىنا اپاردى, زور قۇرمەت كورسەتتى. ءبىر جاعىمدا – ءابىش اعام, ءبىر جاعىمدا – فاريزا اپام. قارت ماڭعىستاۋدىڭ تاريحىن ءابىش اعا ءوزى ەرتىپ ءجۇرىپ تانىستىردى. قانداي عاجاپ دەسەيشى سول كۇن... سول جولى اپاي ەلىنە ريزا بولىپ اتتاندى. وزىنە سىيعا تارتقان كادە-سىيدىڭ بارلىعىن, ءتىپتى يىعىنا جاپقان شاپانىن دا ساحناعا شاقىرىپ, مەنىڭ يىعىما جاپتى. ءوزى دە, جانى دا جومارت, ءمارت ەدى عوي اپامنىڭ!
– فاريزا وڭعارسىنوۆامەن تانىستىق, شىعارماشىلىق-رۋحاني تۋىستىقتىڭ جازۋشى روزا مۇقانوۆانىڭ قالام قارىمىنا, سۋرەتكەرلىك سۇرلەۋىنە قانداي اسەر-ىقپالى بولدى دەپ ويلايسىز با؟
– مەن ۇلى ادامداردىڭ جانىندا ءجۇردىم, قازاقتىڭ ەڭ تاڭداۋلى تۇلعالارىنىڭ ديدارىن جاقىننان كوردىم. ولارمەن ارالاستىم, جاقسى كورەتىنىمدى ءبىلدىرىپ, ولار تۋرالى جازىپ تا ءجۇردىم. مەنى ۇلكەن ورتا تەز ەسەيتتى, كەمەلدەندىردى. ولاردىڭ عاجايىپ ورتاسىن, مەكتەبىن كوردىم. جۇمىر باستى پەندەنىڭ بارلىعىنا جازىلا بەرمەيتىن عاجايىپ ساتتەردى باستان كەشتىم دەۋىمە ابدەن بولادى.
– اڭگىمەڭىزگە راحمەت.
اڭگىمەلەسكەن
نازەركە جۇماباي
