قورداي شەكارا وتريادىنا قاراستى «قاراسۋ» زاستاۆاسىنىڭ اۋماعىندا شەكارا ناريادى وتكەن تۇندە وزدەرىنەن 150 مەتردەي قاشىقتىقتا بەيتانىس ەكى ادامنىڭ جاسىرىنىپ, شەكارانىڭ ارعى جاعىن بارلاي قاراپ تۇرعانىن بايقاپ قالعان. لەزدە زاستاۆاعا حابار بەرىلىپ, جەكە قۇرام كوتەرىلىپ, قارۋلاندىرىلدى. بەيتانىس ادامدار بايقالعان جەرگە شۇعىل تۇردە كەلىپ جەتكەن دابىل توبى 39 جاستاعى ايەل مەن 19 جاستاعى بويجەتكەندى (ەكەۋى دە قىرعىز رەسپۋبليكاسىنىڭ ازاماتتارى) ۇستادى. تەكسەرۋ جۇمىستارى جۇرگىزىلىپ جاتىر.
ەسىرتكىنىڭ سالماعى 20 كگ ەمەس, 45 كگ ەكەن. كەشە كەشكىلىك قر ۇقك شەكارا قىزمەتىنىڭ وڭتۇستىك وڭىرلىك باسقارماسىنا قاراستى «قورداي-اۆتو» تەكسەرىپ-وتكىزۋ بولىمشەسىندە كورشىلەس ەلدەن قازاقستانعا قاراي Toyota Land Cruiser Prado اۆتوكولىگىمەن ءىرى كولەمدە «گاشيش» ەسىرتكىسىن الىپ كىرمەك بولعان 56 جاستاعى قازاقستاندىقتىڭ ۇستالعاندىعى تۋرالى حابارلاعان بولاتىنبىز. ءسال اسىعىستىق تانىتقانىمىزعا كەشىرىم وتىنەمىز, ءبىز حابارلامانى جىبەرگەننەن سوڭ بەلگىلى بولعانداي, كولىكتەن تابىلعان ەسىرتكى زاتىنىڭ جالپى سالماعى 45 كگ-عا جۋىق ەكەن. ۇستالعان ازامات ايعاق زاتىمەن قۇقىق قورعاۋ ورگاندارىنا تاپسىرىلدى.
مەركە تەكسەرىپ-وتكىزۋ پۋنكىتىنىڭ «ايشا ءبيبى» بولىمشەسىندە شەكاراشىلار قىرعىز رەسپۋبليكاسىنان ەلىمىزگە قاراي «داف» جۇك كولىگىمەن كەلە جاتقان 1967 جىلعى رەسەيلىكتى ۇستادى. بۇل ازاماتتى ۇستاۋعا سەبەپ بولعان – اۆتوكولىك تىركەمەسىندەگى قاپتار, دالىرەك ايتقاندا قاپتاردىڭ ىشىندەگى ۇزىن سانى 1000-عا جۋىق قولدان جاسالىنعان پىشاقتار. ۇستالعان ازامات جۇگىمەن جامبىل اۋداندىق پوليتسيا بولىمىنە تاپسىرىلدى.
