ايماقتار • 21 تامىز، 2019

باۋىرجان بايبەك قوعام بەلسەندىسى بايان جالماعانبەتوۆانى قابىلدادى

28 رەتكورسەتىلدى

Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك كوپتەن بەرى پارتيا مۇشەسى بولۋدى ارمانداپ جۇرگەن اقتاۋلىق قوعام بەلسەندىسى بايان جالماعانبەتوۆانى ارنايى قابىلداپ، وعان پارتيالىق بيلەتىن سالتاناتتى تۇردە تاپسىردى.

بايان جالماعانبەتوۆا ەلىمىزدە مۇمكىندىگى شەكتەۋلى جانداردىڭ مۇددەسىن قورعاپ، الەۋمەتتىك جەلىلەر مەن باسقا دا الاڭداردا وسى ماسەلەنى ءجيى كوتەرىپ جۇرگەن بەلسەندىلەردىڭ ءبىرى. ءوزى دە تاعدىردىڭ سىناعىنا تاپ بولعانىمەن، وعان ەش مويىماي، العا ۇمتىلىپ، يگى ىستەرىمەن تانىلىپ كەلەدى. الداعى ۋاقىتتا وسى باعىتتاعى باستامالارىن Nur Otan پارتياسىمەن بىرلەسىپ جۇزەگە اسىرۋدى ماقسات تۇتقان ول پارتيا مۇشەسى بولۋدى كوپتەن بەرى كوزدەپ جۇرگەن.

سوندىقتان دا وتكەن جۇما كۇنى نۇر-سۇلتان قالاسىنداعى «بايتەرەك» مونۋمەنتى ماڭىندا پارتيا توراعاسىنىڭ ءبىرىنشى ورىنباسارى باۋىرجان بايبەكپەن كەزدەيسوق كەزدەسىپ قالعان كەزدە بىردەن وسى ويىن جەتكىزگەن. سول كەزدە پارتيا توراعاسىنىڭ ءبىرىنشى ورىنباسارى الداعى ۋاقىتتا ارنايى كەزدەسىپ، پارتياعا سالتاناتتى تۇردە قابىلدايتىنىن ايتقان ەدى.

پارتيا

– سول كەزدە بەرگەن ۋادەمىزگە بايلانىستى بۇگىن ۋاقىت ءبولىپ، وزىڭىزبەن ارنايى كەزدەسىپ وتىرمىز. Nur Otan پارتياسى وسىدان 20 جىل بۇرىن قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆ قۇرعان ەلىمىزدەگى جەتەكشى ساياسي كۇش. سول ۋاقىتتان بەرى پارتيا حالقىمىزدىڭ بىرلىگى مەن ەل ىرگەسىنىڭ بەرىكتىگىن قامتاماسىز ەتىپ كەلەدى. سوندىقتان قاتارىمىزعا ءوزىڭىز سياقتى ەلىمىزدىڭ ەرتەڭىنە بەي-جاي قارامايتىن، ناعىز پاتريوت ازاماتتاردى قابىلدايمىز، – دەگەن باۋىرجان بايبەك قازىرگى تاڭدا پارتيا جۇمىسىن قايتا جانداندىرۋ ءىسى قارقىندى جۇرگىزىلىپ جاتقانىن جانە الداعى ۋاقىتتاعى باعىت-باعدارىن تىلگە تيەك ەتتى.

سونىمەن قاتار ول ومىردە ءتۇرلى قيىندىقتار مەن سىناقتاردىڭ بولاتىنىن، ونداي كەزدە ادام ساعى سىنباي، الدىنا ناقتى ماقساتتار قويىپ، سوعان تالپىنۋ قاجەت ەكەنىن ايتىپ، بايان جالماعانبەتوۆانىڭ بەلسەندىلىگى بارشا قازاقستاندىقتارعا ۇلگى ەكەنىن جەتكىزدى.

– ءبىزدىڭ پارتيا قيىندىقتارعا قاراماستان جولدان جاڭىلماي، ارمان-ماقساتىنا جەتۋ جولىندا ايانباي ەڭبەك ەتىپ كەلە جاتقان ءسىز سياقتى ازاماتتاردى قولدايدى. بۇل – پارتيا توراعاسىنىڭ تىكەلەي تاپسىرماسى. سوندىقتان ءبىز ءسىزدىڭ قاتارىمىزعا قوسىلىپ، پارتيا مۇشەسى اتانۋىڭىزدى زور قۋانىشپەن قابىلدايمىز. سوعان بايلانىستى بۇگىن ءوزىڭىزدى ارنايى قابىلداپ، پارتيالىق بيلەتىڭىزدى سالتاناتتى جاعدايدا تاپسىرۋدى ۇيعاردىق، – دەدى باۋىرجان بايبەك.

ءوز كەزەگىندە بايان جالماعانبەتوۆا پارتيا توراعاسىنىڭ ءبىرىنشى ورىنباسارىنا جەكە قابىلداپ، زور قوشەمەت كورسەتكەنى ءۇشىن شەكسىز العىسىن ءبىلدىرىپ، Nur Otan پارتياسىنىڭ مۇشەسى اتانعانىنا ەرەكشە قۋانىشتى ەكەنىن جەتكىزدى.

– بۇل مەنىڭ كوپتەن بەرى ويلاپ جۇرگەن ارمانىم بولاتىن. ويتكەنى ەلباسى پارتياسىنىڭ الەۋمەتتىك باعىتتاعى باستامالاردى تابىستى جۇزەگە اسىرىپ كەلە جاتقانىن جانە مۇمكىندىگى شەكتەۋلى جانداردى قولداۋعا ارنالعان «كەدەرگىسىز كەلەشەك» جوباسىنىڭ بار ەكەنىن جاقسى بىلەمىن. سوندىقتان ءوزىم وسى پارتيانىڭ مۇشەسى بولىپ، ەلىمىزدەگى مۇمكىندىگى شەكتەۋلى ازاماتتاردىڭ جاعدايىن جاقسارتۋعا پارتيامەن بىرگە ءوز ۇلەسىمدى قوسسام دەيمىن، – دەدى ب.جالماعانبەتوۆا.

سونداي-اق ول كەزدەسۋدە ءوزىنىڭ ۇسىنىستارىنا توقتالىپ، كەلەشەكتە مۇمكىندىگى شەكتەۋلى بالالاردى وڭالتۋ، وقىتۋ جانە پسيحولوگيالىق قولداۋ كورسەتۋ ورتالىعىن اشقىسى كەلەتىنىن ايتتى.

ايتا كەتەيىك، ەلباسى، پارتيا توراعاسى نۇرسۇلتان نازارباەۆ قازاقستان حالقىنا ارناعان جولداۋلارىنىڭ بىرىندە Nur Otan پارتياسىنا ەلىمىزدەگى مۇمكىندىگى شەكتەۋلى ازاماتتاردىڭ ءومىر ءسۇرۋ ساپاسىن ارتتىرۋ جۇمىستارىن قولعا الۋدى تاپسىرعان بولاتىن. سونىڭ بارىسىندا كەدەرگىسىز ورتا قالىپتاستىرىپ، مۇمكىندىگى شەكتەۋلى ازاماتتاردىڭ كاسىپكەرلىكپەن اينالىسۋىنا جاعداي جاساۋ ماسەلەسىنە ەرەكشە باسىمدىق بەردى. وسىعان وراي پارتيا 2014 جىلدان بەرى «كەدەرگىسىز كەلەشەك» جوباسىن جۇزەگە اسىرىپ كەلەدى. جوبا اياسىندا اتالعان ازاماتتاردى جۇمىسپەن قامتۋ، ولاردىڭ قوعامدىق جانە الەۋمەتتىك ومىرگە بەلسەندى ارالاسۋىنا جاعداي جاساۋ، ينكليۋزيۆتى ءبىلىم الۋ ءىسىن دامىتۋ، قۇقىقتارىنىڭ قورعالۋىن قامتاماسىز ەتۋ جانە تاعى دا باسقا وزەكتى ماسەلەلەر وڭ شەشىمىن تاۋىپ كەلەدى.

سونىمەن قاتار قابىلداۋ بارىسىندا وسى سالادا بەلسەندى ەڭبەك ەتىپ جۇرگەن ازامات جانىبەك ورىنباساروۆقا دا پارتيالىق بيلەتى سالتاناتتى تۇردە تاپسىرىلدى.

سوڭعى جاڭالىقتار

انا ءتىلى – ارىڭ بۇل...

رۋحانيات • كەشە

اباي مۇراسى ماڭگىلىك

اباي • 22 اقپان، 2020

قىلمىستىق ءىس قوزعالدى

ايماقتار • 22 اقپان، 2020

ماڭعىستاۋدا «ANTIKOR ORTALYGY» اشىلدى

رۋحانيات • 22 اقپان، 2020

تەننيس: ەلەنا رىباكينا فينالدا

تەننيس • 22 اقپان، 2020

باستى اقپارات (21.02.2020)

ۆيدەو • 21 اقپان، 2020

ۇقساس جاڭالىقتار