ارينە ەۋروپا ليگاسىندا «استاناعا» جەرەبە جولداس بولدى دەپ جاتقاندار دا جوق ەمەس. چەمپيوندىق جولدا سىنعا ءتۇسىپ جاتقان ەلوردا كومانداسى الدىمەن اندوررا چەمپيونى «سانتا كولوما» كلۋبىن جەڭسە, ءۇشىنشى ىرىكتەۋدە مالتانىڭ ۇزدىك كومانداسى «ۆاللەتتانىڭ» تاس-تالقانىن شىعاردى.
وتكەن بەيسەنبى كۇنى «استانا» مالتاعا ساپار شەگىپ, «ۆالەتتا» كومانداسىمەن ءۇشىنشى ىرىكتەۋدىڭ قارىمتا ماتچىن وتكىزدى. العاشقى ويىندا 5:1 ەسەبىمەن جەڭىسكە جەتكەن وتانداستارىمىز بۇل جولى دا 0:4 ناتيجەسىمەن باسىم ءتۇستى. وتكەن ويىنمەن سالىستىراتىن بولساق, قارىمتا كەزدەسۋدە «استانا» ساپىندا ازداعان وزگەرىس بولعانىن بايقادىق. بۇگىنگە دەيىن كوماندانىڭ نەگىزگى ويىنشىسى اتانىپ كەلگەن سەرىكجان مۇجىقوۆ ءبىر ايدان بەرى نەگىزگى قۇرامنان ورىن الا الماي, قوسالقى قۇرامدا قالعان بولاتىن. ماتچ الدىندا باس باپكەر رومان گريگورچۋك قازاقستاندىق فۋتبولشىنى ءبىرىنشى مينۋتتان الاڭعا شىعاردى. سونداي-اق رومان مۇرتازاەۆ تا بۇل جولى نەگىزگى قۇرامنان ورىن الدى. بۇل كەزدەسۋدە مۇجىقوۆ-مۇرتازاەۆ تاندەمى كوپ كۇتتىرمەي-اق ءوز جەمىسىن بەردى. ماتچتىڭ 25-مينۋتىندا سەرىكجاننان تاماشا پاس العان رومان مۇرتازاەۆ قورعاۋشىلاردان وڭاي سىتىلىپ شىعىپ, ەسەپتى اشتى. ارادا 12 مينۋت وتكەندە كوماندانىڭ اقتانگەرى مارين توماسوۆ ەسەپتى 2:0-گە جەتكىزدى. جالپى, اتالعان ويىن مۇرتازاەۆ پەن توماسوۆتىڭ بەنەفيسىنە اينالدى دەسەك قاتەلەسپەيتىن شىعارمىز. ماتچتىڭ ەكىنشى بولىگىندە دە قوس فۋتبولشى ءبىر-ءبىر گولدان سوعىپ, «استاناعا» ءىرى جەڭىس سىيلادى. 68-مينۋتتا مۇرتازاەۆ كومانداسىنىڭ ءۇشىنشى گولىن سوقسا, 89-مينۋتتا توماسوۆ كەزدەسۋدىڭ نۇكتەسىن قويدى. ەسەپ – 0:4. ەكى ويىننىڭ قورىتىندىسى بويىنشا جەرلەستەرىمىز 9:1 ەسەبىمەن جەڭىپ, پلەي-وفف كەزەڭىنە جولداما الدى.
«استانا» كومانداسى ەلوردادا وتكەن ماتچتا قارسىلاس قاقپاسىنا بەس گول سوعىپ, وزىندىك رەكوردتى جاڭارتسا, بۇل جولى سىرت الاڭدا جاۋاپسىز ءتورت گول جانە ەكى ويىننىڭ قورىتىندىسى بويىنشا 9 گول سالىپ, تاعى ءبىر رەكوردقا وزگەرىس ەنگىزدى. ەلوردا كومانداسىنىڭ بۇعان دەيىنگى ەڭ ءىرى ەسەبى 2014/2015 جىلعى ەۋروپا ليگاسىنىڭ ءبىرىنشى ىرىكتەۋ كەزەڭىندە تىركەلگەن بولاتىن. سول جولى «استانا» ارمەنيانىڭ «پيۋنيك» كومانداسىمەن كەزدەسىپ, ەكى ويىن ناتيجەسى بويىنشا 6:1 (4:1, 2:0) ەسەبىمەن باسىم ءتۇسىپ ەدى.
مالتاداعى جەڭىستەن كەيىن «استانا» قازاقستاننىڭ ۋەفا رەيتينگىندەگى جاعدايىن جاقسارتىپ, وعان قوسا ءوزىنىڭ كلۋبتار اراسىنداعى رەيتينگتەگى ورنىن بەكەمدەي ءتۇستى. قازاقستان – 18,500 (2,625) ۇپايمەن 25-ورىندا بولسا, «استانا» 28,500 ۇپاي كورسەتكىشىمەن 50-ورنىن ساقتاپ قالدى.
پلەي-وفف كەزەڭىندە ەلوردا كومانداسى قازاقستاندىق جانكۇيەرلەرگە جاقسى تانىس بەلورۋسسيانىڭ باتە كلۋبىمەن كەزدەسەدى. بەلارۋس كومانداسى بۇعان دەيىن قازاقستاندىق كوماندامەن ەكى رەت كەزدەسىپ, ەكەۋىندە دە جەڭىلىپ قالعان. ەڭ العاش چەمپيوندار ليگاسىنىڭ 2013/2014 جىلعى ماۋسىمنىڭ العاشقى ىرىكتەۋ كەزەڭىندە قاراعاندىنىڭ «شاحتەرىمەن» ويناپ, ەۋروكۋبوكتاعى جورىعىن ەرتە اياقتاۋعا ءماجبۇر بولعان-دى. ەكى ويىن قورىتىندىسى بويىنشا باتە 2:0 ەسەبىمەن جەڭىلگەن. ال 2016/2017 جىلعى ەۋروپا ليگاسىنىڭ پلەي-وفف كەزەڭىندە «استانامەن» كەزدەسىپ, توپتىق كەزەڭنەن تىس قالعان ەدى. ەلوردادا وتكەن ماتچتا جەرلەستەرىمىز 2:0 ناتيجەسىمەن باسىم تۇسسە, سىرت الاڭداعى ويىندا 2:2 ەسەبىمەن تەڭ تۇسكەن بولاتىن. ياعني, باتە ءۇشىن قازاقستان كوماندالارى الىنبايتىن قامال بولىپ تۇر. بۇل جولى دا «استانا» ەسكى داستۇردەن جاڭىلماي, ەۋروپا ليگاسىنىڭ توپتىق كەزەڭىنە شىعادى دەگەن ۇمىتتەمىز.
ەۋروپا ليگاسىنىڭ ءۇشىنشى ىرىكتەۋ ماتچىنان كەيىن «استانا» باس باپكەرى رومان گريگورچۋك باتە تۋرالى العاشقى پىكىرىمەن ءبولىستى. «باتە ەۋروپا فۋتبولىندا بىرقاتار جەتىستىككە جەتكەن ءىرى كوماندا. بىلايشا ايتقاندا, بەلارۋس فۋتبولىنىڭ برەندى. قۇرامىندا ەۋروكۋبوك ويىندارىندا ابدەن ىسىلعان, تاجىريبەسى تولىسقان بىرنەشە ويىنشى بار. باپكەرى دە وتە تاجىريبەلى. سوندىقتان ءبىزدى الدا تارتىسقا تولى ەكى ويىن كۇتىپ تۇر. الداعى ويىنعا تىڭعىلىقتى دايىندالىپ, ەۋروپا ليگاسىنىڭ توپتىق كەزەڭىنە شىعۋ ءۇشىن بارىمىزدى سالامىز», دەيدى ر.گريگورچۋك.
سونداي-اق باتە باس باپكەرى الەكسەي باگا دا «استانا» تۋرالى از-كەم پىكىر ءبىلدىردى. ««استانا»؟ مەن قورقىنىشتى ەشتەڭە كورىپ تۇرعان جوقپىن. وزگە ەلدىڭ كەز كەلگەن كومانداسىن جەڭۋ ءۇشىن ادەتتەگىدەي دايىندالامىز. ەۋروكۋبوك كەزەڭدەرىندە قازاقستاندىق «شاحتەر», «استانا» كوماندالارىنان ۇنەمى جەڭىلىپ كەلەمىز. بۇل – تاريح. بىراق قازىرگى «استانا» جاڭا كوماندا, جاڭا قارسىلاس. وتكەنمەن ەشقانداي ۇقساستىعى جوق», دەدى باگا.
ال وتاندىق فۋتبول مامانى بولات ەسماعامبەتوۆ بۇعان دەيىن ەلوردا كومانداسى وزدەرىنەن ءبىر باس تومەن كلۋبتارمەن ويناپ كەلسە, بۇل جولعى قارسىلاس «استانامەن» دەڭگەيلەس ەكەنىن ايتادى. «شىنىمدى ايتسام, «ۆالەتتاعا» قارسى العاشقى ويىننىڭ بەس مينۋتىن كورىپ, كوماندانىڭ دەڭگەيىن بىردەن ءبىلدىم. بۇل كوماندانى قپل-ءدىڭ كەز كەلگەن كلۋبى جەڭە الادى دەپ ويلايمىن. «استانانىڭ» سىنالاتىن ءساتى ەندى كەلدى. باتە – وتە مىقتى كوماندالاردىڭ ءبىرى. ونى جىل سايىنعى ەۋروكۋبوكتاعى ويىندارىنان-اق بايقاۋعا بولادى. مەنىڭشە, كوماندالار كوپ گول سوقپاۋى مۇمكىن. «استانا» دا, باتە دە ءوز الاڭدارىندا ءساتتى وينايدى. سوندىقتان بۇل جۇپتىڭ جەڭىمپازى سىرت الاڭداعى ويىندا انىقتالادى. «استانانىڭ» باتە-گە قارسى وتەتىن ويىنى وسى ماۋسىمداعى ەڭ قىزىقتى ماتچ بولماق», دەيدى فۋتبول مامانى.
ءدال قازىرگى ۋاقىتتا ەكى كوماندا دا ءوز ەلدەرىنىڭ ىشكى بىرىنشىلىگىندە ەكىنشى ورىندا كەلەدى. سونداي-اق ەكەۋى دە ەۋروماۋسىمنىڭ ىرىكتەۋ كەزەڭىن چەمپيوندار ليگاسىندا باستاپ, ەۋروپا ليگاسىنىڭ پلەي-وفف كەزەڭىندە جولىعىپ وتىر. قوس كوماندا اراسىنداعى العاشقى ماتچ 22 تامىزدا «استانا ارەنا» ستاديونىندا, قارىمتا ماتچ ءبىر اپتادان سوڭ بەلارۋس ەلىندە وتەدى.
