قازاقتىڭ قايسار وعلانى كەزدەسۋدى ستاديوننان تاماشالاپ قانا قويماي, ماتچ سوڭىندا ۋەفا پرەزيدەنتى الەكساندر چەفەرينمەن بىرگە جەڭىمپاز كومانداعا التىن مەدال مەن كۋبوكتى تاپسىردى.
وسىنداي ايتۋلى شاراعا قاتىسقان وتانداسىمىزدىڭ ەرلىگى قازاقستان پرەزيدەنتى قاسىم-جومارت توقاەۆتىڭ دا نازارىنان تىس قالعان جوق. مەملەكەت باسشىسى ءوز كەزەگىندە اليگە جىلى لەبىزىن ءبىلدىردى. «جاس قازاقستاندىق ءالي تۇرعانبەكوۆ ۋەفا سۋپەر كۋبوگى ءۇشىن «ليۆەرپۋل» مەن «چەلسي» اراسىندا وتكەن ماتچتىڭ جەڭىمپازىن ماراپاتتاۋ سالتاناتىنا قاتىستى. ء«الي, سەنىڭ ماقساتقا جەتۋ جولىنداعى كۇش-جىگەرىڭ الەمدە تالاي ادامدى العا جەتەلەيدى. بارلىق ارماندارىڭ ورىندالسىن!», دەپ جازدى پرەزيدەنت Twitter-دەگى پاراقشاسىندا.
ومىرگە ەكى اياقسىز كەلگەن ءاليدىڭ قۋانىشىن, كەشەگى كەشتەن العان اسەرىن ءبولىسۋ ماقساتىندا اناسى اقمارالمەن تىلدەسۋدىڭ دە ءساتى ءتۇستى.
– ءاليدىڭ كەشەگى كەشتەن العان اسەرىن سوزبەن ايتىپ جەتكىزۋ مۇمكىن ەمەس. بالامنىڭ قۋانىشىن كورگەندە توبەم كوككە ەكى ەلى جەتپەي قالدى. بۇل ءسات ۇلىمنىڭ دا, مەنىڭ دە جادىمدا ماڭگى باقي ساقتالىپ قالادى. وسى ورايدا بىزگە وسىنداي مۇمكىندىكتى جاساعان جانە ىستانبۇلعا بارۋعا كومەك قولىن سوزعان ۋەفا باسشىلىعى مەن اتالعان ۇيىمنىڭ قورىنا, قازاقستان ۇلتتىق پاراليمپيادا كوميتەتىنىڭ باسشىسى قايرات بورانباەۆقا, سونداي-اق «مەيىرىم» بالالاردى وڭالتۋ ورتالىعىنا ەرەكشە العىس ايتقىم كەلەدى.
سونداي-اق ول ۇلىنىڭ كۋبوكتى جەڭىمپاز كومانداعا تاپسىرىپ تۇرعان ساتتە ونە-بويىن تولقىنىس سەزىمى بيلەپ, كوز جاسىنا ەرىك بەرگەنىن جەتكىزدى. ء«بارىڭىز كورگەندەي, ۋەفا پرەزيدەنتى الەكساندر چەفەرين مىرزا ءاليدىڭ قولىن الىپ, كۋبوكتى بىرگە تاپسىرعاندا كوز جاسىما قالاي ەرىك بەرگەنىمدى بىلمەي قالدىم. ءتىپتى كامەرانى ۇستاي المادىم, قولدارىم دىرىلدەپ تۇردى. ويتكەنى بۇل ۇلكەن وقيعا, ونى بارلىق ادامدار, بالالار, ميلليونداعان ادام كورەدى. ۇلىمنىڭ اياعى جوق بولسا دا فۋتبول ويناۋ, فۋتبولدى سونشا جاقسى كورىپ, ارمانىنا ۇمتىلۋ ۇلكەن ەرلىك ەكەنىن ءتۇسىنۋىمىز كەرەك. ول ەرەكشە بالالار مەن ادامدارعا سەنىمدىلىك ۇيالاتىپ وتىرعان مەنىڭ كىشكەنتاي عانا موتيۆاتورىم», دەيدى اقمارال.
«ليۆەرپۋل» مەن «چەلسي» اراسىنداعى ماتچ الدىندا ءالي ايگىلى فۋتبولشى موحاممەد سالاحپەن بىرگە جاتتىعۋ جاساپ, ەستەلىك سۋرەتكە دە تۇسكەن بولاتىن. سونىمەن قاتار ول الەمدىك دەڭگەيدەگى فۋتبولشىلارمەن ءبىرىنشى رەت كەزدەسىپ تۇرعان جوق.
11 جاستاعى بالاقاي بۇعان دەيىن ارگەنتينالىق فۋتبول اڭىزى ديەگو مارادوننا مەن ليونەل مەسسي, اۋستراليالىق موتيۆاتور نيك ۆۋيچيچ, 2014 جىلعى «التىن دوپ» يەگەرى ۋكراينالىق اندرەي شەۆچەنكو مەن الەكساندر زينچەنكو سەكىلدى فۋتبولشىلارمەن بىرگە دوپ تەپكەن. تاعى ءبىر ايتا كەتەرلىگى, ءالي بىلتىر ءوزى كۋمير سانايتىن برازيليالىق فۋتبولشى نەيمارمەن كەزدەسۋ ءۇشىن فرانتسيانىڭ «پاري سەن-جەرمەن» كلۋبىنىڭ جابىق جاتتىعۋىنا دا قاتىسۋعا مۇمكىندىك العان. وسىلايشا ءالي تۇرعانبەكوۆ تاعدىرعا مويىماي, توزىمدىلىك پەن تاباندىلىقتىڭ ارقاسىندا العا قويعان ماقساتىنا جەتىپ, الەمدەگى مۇمكىندىگى شەكتەۋلى جانداردىڭ مۇمكىندىگى مول ەكەنىن ىسىمەن دالەلدەپ جۇرگەن بۇگىنگى كۇننىڭ باتىرى.
ايتا كەتەيىك, «ليۆەرپۋل» مەن «چەلسي» اراسىندا وتكەن ماتچتىڭ نەگىزگى ۋاقىتى 2:2 ەسەبىمەن تەڭ اياقتالىپ, جەڭىمپاز كوماندا كەزدەسۋ سوڭىنداعى پەنالتي سەرياسىندا انىقتالدى. بەس پەنالتيدىڭ ءبارىن ءساتتى ورىنداعان «ليۆەرپۋل» كومانداسى جەڭىمپاز اتانىپ, ءوز تاريحىندا ءۇشىنشى مارتە (1977, 2001 جانە 2005) ۋەفا سۋپەركۋبوگىن جەڭىپ الدى. ال «چەلسي» كومانداسى ەكىنشى رەت (2012 جانە 2013) سۋپەركۋبوكتا جەڭىلدى.
