جيىندا وبلىس اكىمى اماندىق باتالوۆ سالا ماماندارىن كاسىبي مەرەكەلەرىمەن قۇتتىقتاپ, ۇزدىك قۇرىلىسشىلارعا ماراپات تاپسىردى. وبلىس اكىمى ءوز سوزىندە ايماقتاعى وڭ كورسەتكىشتەرگە توقتالا كەلە, ءوڭىر قۇرىلىسشىلارىنىڭ جاڭادان قۇرىلعان رايىمبەك اۋدانىن كوركەيتۋگە, ارىس قالاسىن قالپىنا كەلتىرۋ ىسىنە ءوز ۇلەستەرىن قوسىپ جاتقاندارىن دا تىلگە تيەك ەتىپ, بارشا قۇرىلىسشىلارعا مىقتى دەنساۋلىق, تولاعاي تابىس, ەڭبەكتە جەتىستىكتەر تىلەدى.
جالپى, وبلىستا بيىلعى جىلى قۇرىلىس سالاسىنا 101,3 ملرد تەڭگە بولىنگەن. بۇل قارجىعا 784,5 مىڭ شارشى مەتر تۇرعىن ءۇي سالۋ جوسپارلانسا, سونىڭ 364,8 مىڭ شارشى مەترى ءبىرىنشى جارتىجىلدىقتا پايدالانۋعا بەرىلدى. ال رەسپۋبليكالىق جانە جەرگىلىكتى بيۋدجەتتەن قارجىلاي قولداۋدىڭ ارقاسىندا بيىلعى جىلى 8 ءبىلىم بەرۋ مەكەمەسى, 10 دەنساۋلىق ساقتاۋ نىسانى, 4 دەنە شىنىقتىرۋ-ساۋىقتىرۋ كەشەنى, ىشكى ىستەر ورگاندارىنىڭ 18 نىسانى پايدالانۋعا بەرىلەتىن بولادى. ەلباسىنىڭ 5 الەۋمەتتىك باستاماسىندا ايتىلعان ستۋدەنت جاستاردى جاتاقحانامەن قامتۋ تاپسىرماسىنا سايكەس وبلىستا 1930 ورىندىق قۇرىلىسى جوسپارلانعان. سونداي-اق, وبلىستا ورتالىقتاندىرىلعان سۋمەن قامتۋ دەڭگەيى بيىلعى جىلدىڭ سوڭىندا 91 پروتسەنتكە جەتكىزىلەدى. ال گازداندىرۋ جۇمىستارى 20 اۋداننىڭ 15-ىندە جۇرۋدە. سونىڭ ىشىندە وبلىس ورتالىعى تالدىقورعان قالاسىنداعى جۇمىس 2020 جىلى اياقتالىپ, 55 مىڭ ابونەنت كوگىلدىر وتىنعا قوسىلادى.
مەرەكەلىك شارادا بىرقاتار مەملەكەتتىك مەكەمەلەردىڭ, جاۋاپكەرشىلىگى شەكتەۋلى سەرىكتەستىكتەردىڭ قىزمەتكەرلەرىنە «قۇرمەتتى قۇرىلىسشى» توسبەلگىسى, قر يندۋستريا جانە ينفراقۇرىلىمدىق دامۋ ءمينيسترىنىڭ جانە وبلىس اكىمىنىڭ قۇرمەت گراموتالارى جانە العىس حاتتارى تابىستالدى.
الماتى وبلىسى
