جاستار جىلى اياسىندا جۇزەگە اسقان رەسپۋبليكالىق كورمەدە نۇر-سۇلتان, پاۆلودار, اقتاۋ, اقتوبە, پەتروپاۆل قالالارىنىڭ كاسىبي مامان رەتىندە ەندى تانىلىپ كەلە جاتقان جاس سۋرەتشىلەرى ءوز تۋىندىلارىن كوپشىلىك نازارىنا ۇسىندى. اتاپ ايتساق, ليۋدميلا ايتۋاروۆا, ديلوروم اشىربەكوۆا, ءاليا امىرەنوۆا, گۇلبارام اسقاروۆا, تەمىرلان ابەنوۆ, نۇربولات بازارباەۆ, باقىت جوراەۆ, گۇلنارا دايىروۆا, ايگەرىم كارىباەۆا, ازامات نۇرتازين, ناركەس يمانعازى, مەيىرمان ءىلياسوۆ, ايدانا قۇلاحمەتوۆا, ۆالەريا سەرگەەۆا, انەل حاكىموۆا سىندى تالانتتى سۋرەتشىلەر قاتىستى.
شارانىڭ اشىلۋ سالتاناتىندا ءسوز العان ۇلتتىق مۋزەي ديرەكتورى ارىستانبەك مۇحامەدي ۇلى: – ەلباسىمىز ن.ءا. نازارباەۆ 2019 جىلدى جاستار جىلى دەپ جاريالاعان بولاتىن. وسىعان وراي جاستاردى قولداۋ ماقساتىندا ءتۇرلى شارالار ۇيىمداستىرىلىپ جاتىر. جاستار – ءار مەملەكەتتىڭ كەلەشەگى. بۇگىنگى كورمە دە تالانتتى جاستاردى قولداۋ ءۇشىن اشىلىپ وتىر. قازاقستاننىڭ ونەرى دۇنيە جۇزىنە تانىلىپ كەلەدى. جاستاردى دا وسى قاتارعا شىعارعىمىز كەلەدى. بۇگىنگى كورمەدە ولاردىڭ العاشقى قادامىنا كۋا بولدىق. كەلەشەكتە بۇل سۋرەتشىلەردىڭ كارتينالارى ۇلكەن حالىقارالىق كورمەلەردىڭ تورىندە تۇراتىنىنا كامىل سەنەمىن, – دەپ ونەرلى ورەندەرگە اق جول تىلەپ, ارنايى سەرتيفيكات تابىستادى.
كورمە ەكسپوزيتسياسىنا بەينەلەۋ ونەرىنىڭ كەسكىندەمە, ءمۇسىن, ساندىك-قولدانبالى ونەر, تسيفرلى كەسكىندەمە سياقتى ءتۇرلى جانر مەن سان الۋان تاقىرىپتاعى جۇمىستار قويىلدى. ۇسىنىلعان كارتينالاردان ءار سۋرەتشىنىڭ شەبەرلىگىن, وزىنە ءتان قولتاڭبالىق ەرەكشەلىگىن, ءستيلىن ايقىن بايقاۋعا بولادى. دارىندى سۋرەتشىلەردىڭ تۋىندىلارى اتالعان كورمەگە تۇڭعىش رەت ۇسىنىلىپ وتىر.
