كورپوراتيۆتىك ۋنيۆەرسيتەت ۇعىمى ەڭبەك نارىعىندا 1950 جىلدارى قولدانىسقا ەندى. 1914 جىلدان بەرى قىزمەتكەرلەرىن وقىتۋدىڭ ءتيىمدى ادىستەرىن ىزدەپ كەلگەن General Electric كومپانياسى 1956 جىلى جۇيەلەنگەن وقۋ ورنىن اشادى. ودان كەيىن 1961 جىلى ايگىلى McDonald's كورپوراتسياسى رەستوران مەنەدجمەنتىن وقىتاتىن Hamburger University-ءدىڭ جۇمىسىن باستايدى. بۇگىندە 80 000 تۇلەگىمەن ماقتاناتىن وقۋ ورداسى ءالى دە كورپوراتيۆتى ۋنيۆەرسيتەتتەر كوشىن باستاپ تۇر. اقش-تا باستالعان فەنومەن كوپ ۇزاماي الەمنىڭ باسقا دا مەملەكەتتەرىندە جالعاسىن تاپتى. 1988 جىلى اقش-تا كورپوراتيۆتى ۋنيۆەرسيتەتتەر سانى 400 بولسا, بۇگىندە 4000-عا جەتىپتى.
كورپوراتيۆتى ۋنيۆەرسيتەتتەردىڭ مىندەتتەرى ءار الۋان. دەگەنمەن نەگىزگى ماقساتى – قىزمەتكەرلەر مەن باسقارۋ جۇيەسىن ۇزدىكسىز دامىتىپ وتىرۋ. الەمدىك كورپوراتسيالاردان ۇلگى العان كومپانيالار ەلىمىزدە دە بار. بۇگىندە قۇرىلىس سالاسىنداعى ۇزدىك كومپانيالاردىڭ ءبىرى سانالاتىن BI Group پەن «سامۇرىق-قازىنا» ۇلتتىق ءال-اۋقات قورى» اق وزدەرىنە تيەسىلى ۋنيۆەرسيتەتتەرىمەن ماقتانا الادى.
ءار ۋنيۆەرسيتەتتەگى دارىستەردىڭ فورماتتارى مەن وقۋ مەرزىمى ءارتۇرلى. بىراق تەك ءوز قىزمەتكەرلەرىمەن شەكتەلىپ قويماي, مامان دايارلاۋدىڭ قالىپتاسقان ۇلگىسىن باسقا دا كومپانيالارمەن بولىسۋگە ءازىر. «سامۇرىق-قازىنا» كورپوراتيۆتىك ۋنيۆەرسيتەتى العاشىندا «قازمۇنايگاز» كومپانياسىنىڭ باستاماسىمەن كادرلاردى دامىتۋ ورتالىعى رەتىندە اشىلدى. 2009 جىلى «سامۇرىق-قازىنا» كومپانياسىنا ءوتىپ, ۋنيۆەرسيتەت رەتىندە قايتا قۇرىلادى. سودان بەرى وقۋ ورنى 223 سەمينار وتكىزىپ, 19 903 مامان وقىتقان. وعان قوسا قاشىقتىقتان وقىتۋ جۇيەسى دە قولعا الىنعان. ۆيرتۋالدى ۋنيۆەرسيتەت باعدارلاماسى بويىنشا 78 كۋرس ۇسىنادى.
كومپانيا مامانداردى دايارلاۋ مىندەتىن تولىقتاي ۋنيۆەرسيتەتكە جۇكتەگەن. ويتكەنى وقۋ ورنىنىڭ كۋرستارى باسشىلارعا ارنالعان باعدارلامادان باستاپ, «HR Qyzmet» دەپ اتالاتىن كادر ماماندارى كۋرستارى, كوماندا قۇرۋعا ارنالعان شارالاردى دا قامتىعان. سونىمەن بىرگە كورپوراتيۆتى سەمينارلار وتكىزىپ تۇرادى. جىل سايىن ۋنيۆەرسيتەت تۇلەكتەرى اراسىندا كونكۋرس جاريالانىپ, ۇزدىكتەرىن ۋنيۆەرسيتەتتە تەگىن وقىتىپ, كومپانياعا جۇمىسقا ورنالاسۋعا مۇمكىندىك بەرەدى. ال BI Group كومپانياسىنا تيەسىلى BI University ەلىمىزدە عانا ەمەس, رەسەيدىڭ يركۋتسك قالاسىندا دا مامان دايارلايدى. وقۋ ورنى ءتورت باعىتتا جۇمىس ىستەيدى. كاسىبي باعىت سالا بويىنشا مامانداردىڭ ءبىلىمىن جەتىلدىرسە, كورپوراتيۆتى باعدارلامالار كومپانيا ەتيكاسى, بيزنەس ستراتەگياسى سياقتى داعدىلاردى ۇيرەتەدى. باسقارۋ باعدارلامالارى كوشباسشىلاردى دايارلاپ, ەڭبەك نارىعىنداعى قاجەتتى بىلىكتىلىكتەردى وقىتىپ, تەك كومپانيا مەنەدجەرلەرىمەن شەكتەلمەي, باسقا دا ۇيىمداردىڭ باسشىلارىنا قابىلەتىن ارتتىرۋعا مۇمكىندىك بەرەدى. سونىمەن بىرگە تۇلعالىق دامۋ باعدارلامالارى ادام بويىنداعى جەكە قاسيەتتەر, كاسىبي دامۋعا قاجەتتى داعدىلاردى وقىتىپ, ستۋدەنتتەرگە باعىت-باعدار بەرەتىن ترەنينگتەردەن تۇرادى. ۋنيۆەرسيتەت بۇگىندە نۇر-سۇلتان, الماتى جانە يركۋتسك قالالارىندا جۇمىس ىستەيدى. BI University دە وتاندىق جوو ستۋدەنتتەرىن ىرىكتەپ, ولارعا كومپانيانىڭ قالىپتاسقان ەرەجەلەرى مەن مادەنيەتىن ۇيرەتىپ, كەلەشەكتە قۇرىلىس سالاسىنداعى ۇزدىك كومپانياعا جۇمىسقا ورنالاسۋعا مۇمكىندىك بەرەدى. وقۋ ورنى 2012 جىلى اشىلعاننان بەرى 7000-نان استام مامان دايارلاعان. ولاردىڭ 58-ءى بۇگىندە كورپوراتيۆتى ۋنيۆەرسيتەت ترەنەرلەرى.
ەلىمىزدە كورپوراتيۆتى ءبىلىم بەرۋدى قولعا الۋعا مۇمكىندىگى بار كومپانيالار بارشىلىق. ماسەلەن, «قازمۇنايگاز», «قازاقمىس», «قازاقستان تەمىر جولى» نەمەسە جىلىنا 19,2 ملرد تەڭگە تابىس كورەتىن 2000 جۇمىسشىسى بار «بايان سۇلۋ» كونديتەرلىك كومپانياسى ءوز ماماندارىن وزدەرى دايارلاۋعا مۇمكىندىكتەرى بار. كورپوراتيۆتىك ۋنيۆەرسيتەتتەر, ياعني ءوز كادرلارىن وزدەرىنىڭ قالىپتاستىرىپ ۇلگەرگەن ەرەجەلەرى, جۇيەسىنە ساي وقىتۋ كومپانيا شىعىنىن ازايتپاق. ويتكەنى ونسىز دا ءجيى وزگەرەتىن ەڭبەك نارىعىنىڭ سۇرانىسىنا سايكەس مامانداردى قايتا وقىتۋ, بىلىكتىلىگىن ارتتىرۋ كومپانيانىڭ ءوسۋىنىڭ العىشارتى. Training Magazine حالىقارالىق جۋرنالى 2017 جىلى شاعىن كاسىپورىندار قىزمەتكەرلەرىن قايتا وقىتۋ ءۇشىن ادام باسىنا 1 886 اقش دوللارىن جۇمساعانىن انىقتاعان. وعان قوسا, ءار قىزمەتكەرگە قايتا دايارلاۋ كۋرستارى ءۇشىن ورتاشا ەسەپپەن 33,5 جۇمىس ساعاتى قاجەت ەكەن. Patriot Software كومپانياسى جۇمىسشىلار جالاقىسىنىڭ 21,4 پايىزىن قايتا دايارلاۋ كۋرستارىنا جۇمسايتىنىن ايتادى. ەلىمىزدەگى ستاتيستيكاعا كوز جۇگىرتسەك, 2017 جىلى 89 مىڭ وتاندىق مۇعالىمدى قايتا دايارلاۋعا 13,3 ملرد تەڭگە بولىنگەن. ءدال سول جىلى رەسپۋبليكا بويىنشا مۇعالىمدەردىڭ جالپى سانى 325 مىڭ بولعانىن ەسكەرسەك, قالعان مۇعالىمدەردى جاڭا باعدارلاماعا ساي قايتا دايارلاۋ ءۇشىن تاعى دا 35 ملرد تەڭگە قاجەت ەكەن.
ساراپشىلار كورپوراتيۆتىك ۋنيۆەرسيتەتتەر ارقىلى كومپانيانىڭ كادرلاردى وقىتۋعا كەتەتىن شىعىنىن 10 پايىزدان 50 پايىزعا دەيىن قىسقارتۋعا بولاتىنىن ايتادى. كورشىلەس رەسەيدە كورپوراتيۆتىك ۋنيۆەرسيتەتتەر سانى جىل ساناپ ارتىپ كەلەدى. «گازپروم», «يۋكوس», «روسينتەر رەستورانس», «ينگوسستراح», «ەۆروسيب», «سبەربانك» كومپانيالارىنىڭ باسشىلارى كورپوراتيۆتىك ۋنيۆەرسيتەت ماتەريالدىق شىعىنداردىڭ ازايۋىمەن قاتار, مەكەمە جۇمىسىنىڭ تيىمدىلىگىنىڭ ارتقانىن ايتادى. «ينگوسستراح» كومپانياسىنىڭ مامانداردىڭ بىلىكتىلىكتىلىگىن ارتتىرۋ ورتالىعىنىڭ باسشىسى ليۋبوۆ گۆوزديلينا قىزمەتكەرلەردى كومپانيا ىشىندە وقىتۋ ارقىلى ءبىر جىلدا 76 000 اقش دوللارىن ۇنەمدەگەنىن ايتادى. ونىڭ ايتۋىنشا, 2000 جىلى كومپانيا قىزمەتكەرلەرىنىڭ 76 پايىزى ەرىكتى تۇردە قايتا دايارلاۋ كۋرستارىنا جازىلۋدى باستاعان.
جوعارىداعى ستاتيستيكا مەن الەمدىك كومپانيالاردىڭ مىسالدارى مامانداردى كومپانيا ىشىندە وقىتۋ تەك ەكونوميكالىق تۇرعىدان بولەك, قىزمەتكەرلەردى ىنتالاندىرۋ, جاڭا تەحنولوگيالارعا قىزىقتىرۋ, ۋاقىت ۇنەمدەۋ جاعىنان دا ءتيىمدى ەكەنىن دالەلدەپ وتىر. جاڭا دەڭگەيدى باعىندىرعان ماماننىڭ جاڭا لاۋازىمعا كوتەرىلەرى ءسوزسىز. بۇل قىزمەتكەرگە جىگەر مەن سەنىم بەرىپ, ۇزدىكسىز دامۋعا جەتەلەيدى. ەكونوميكالىق شىعىنى بىلاي قالعاندا, ۋنيۆەرسيتەت تۇلەكتەرىنىڭ اراسىندا ۇزدىكتەرىن تاڭداۋعا, ولاردى قالىپتاسىپ ۇلگەرگەن ەرەجەلەر مەن جۇيەدە وقىتىپ, كومپانيانىڭ ءداستۇرى مەن مادەنيەتىن, ماقساتى مەن مىندەتىن ەڭبەك نارىعىنا ەندى قادام باسقان جاس مامانعا سىڭىرۋگە, بەيىمدەۋگە مۇمكىندىك بەرەدى. ۋنيۆەرسيتەت تۇلەكتەرى ءوز تۇيگەندەرىن ارىپتەستەرىنە ۇيرەتىپ, مەكەمە ىشىندە قىزمەتكەرلەردىڭ ءبىرىن ءبىرى قولداۋ سياقتى ماڭىزدى ءارى جاقسى ءداستۇر قالىپتاستىرادى. باسقاشا ايتقاندا, كورپوراتيۆتى ۋنيۆەرسيتەت مەكەمە شىعىنىن ازايتىپ قانا قويماي, جۇمىس تيىمدىلىگىن ارتتىرۋ, ەڭبەك نارىعىنداعى سۇرانىسقا دايىن بولۋ, مەكەمە ىشىندەگى اتموسفەرانى جاقسارتۋ, قىزمەتكەرلەر اراسىنداعى, جۇمىس بەرۋشى مەن جۇمىسشى اراسىنداعى بايلانىستى نىعايتۋعا سەبەپ بولاتىن ورتا.
