بايقاۋ ۆوكال نوميناتسياسى بويىنشا وتكىزىلدى. قاتىسۋشىلار دۋەت, تريو, كۆارتەت رەتىندە جانە ەسترادالىق, اكادەميالىق جانە حالىقتىق جانر تۋىندىلارىن ۇسىندى. كونكۋرستىق باعدارلامالاردىڭ تاقىرىپتىق باعىتى پاتريوتتىق سيپاتقا, قازاقستاندىق جانە شەتەلدىك كومپوزيتورلاردىڭ اندەرىنىڭ ورىندالۋىنا, قازاقستان حالىقتارىنىڭ جالپىۇلتتىق كەلىسىمىنىڭ باسىمدىقتارىنا سايكەس كەلۋى ءتيىس.
فەستيۆالگە وبلىسقا قاراستى اۋداندىق پوليتسيا بولىمدەرى مەن قالالىق پوليتسيا باسقارمالارىنان باس-اياعى 18 ۇمىتكەر قاتىستى. ولاردىڭ ونەرىن قوستاناي وبلىسى پد باستىعىنىڭ ورىنباسارى, پوليتسيا پولكوۆنيگى ارداق ىنتىقباەۆ باستاعان قازىلار القاسى باعالادى. بايقاۋ الدىندا ارداق قابىكەن ۇلى قاتىسۋشىلارعا ساتتىلىك تىلەدى.
- بۇل ءىس-شارا ەلباسىنىڭ «بولاشاققا باعدار: رۋحاني جاڭعىرۋ» جانە جاستار جىلى اياسىندا ۇيىمداستىرىلىپ وتىر. قر ىشكى ىستەر مينيسترلىگى ءۇشىن قر تۇڭعىش پرەزيدەنتى - ۇلت كوشباسشىسى نۇرسۇلتان ءابىش ۇلى نازارباەۆ بەلگىلەگەن باسىم مىندەتتەردىڭ اراسىندا قوعامدا پوليتسيانىڭ بەدەلىن ارتتىرۋعا باعىتتالعان ۇيىمداستىرۋ-تاجىريبەلىك شارالار كەشەنىن جۇزەگە اسىرۋ, جەكە قۇراممەن يدەولوگيالىق جانە تاربيە جۇمىستارىن جۇرگىزۋ باستى نازارعا الىنعان. قاتىسۋشىلارعا قوستاناي وبلىسى پد باستىعى, پوليتسيا گەنەرال-مايورى بەككەت يمان ۇلى ايماعامبەتوۆتىڭ اتىنان شىعارماشىلىق شابىت پەن ساتتىلىك تىلەيمىن! - دەدى پوليتسيا پولكوۆنيگى ا.ىنتىقباەۆ.
جينالعان جۇرتشىلىق ءتارتىپ ساقشىلارىنىڭ ورىنداۋ شەبەرلىگىنە ءتانتى بولدى. كوپشىلىكتىڭ مۇنداي شەبەرلىكتى كۇتپەگەنى انىق, كۇمىس كومەي پوليتسەيلەر بىرىنەن ءبىرى اسىرا شىرقاپ جاتتى. دەگەنمەن, بايقاۋ ەرەجەسىنە سايكەس قازىلار ۇزدىگىن تاڭدادى.
قازىلار شەشىمى بويىنشا وبلىستىق ء«ار جۇرەكتە – تۋعان جەر» اتتى پاتريوتتىق اندەر ارت-فەستيۆالىندە ءۇشىنشى ورىندى فەدوروۆ اۋدانى پوليتسيا ءبولىمىنىڭ ۋچاسكەلىك پوليتسيا ينسپەكتورى راۋان قاليەۆ يەلەندى. ەكىنشى ورىن مەملەكەتتىك كۇزەت قىزمەتى باسقارماسىنىڭ دۋەتى مەن قوستاناي قالالىق پوليتسيا باسقارماسى تەرگەۋ ءبولىمىنىڭ اعا تەرگەۋشىسى, پوليتسيا كاپيتانى گۇلميرا ەسەنعاليەۆاعا بۇيىردى. ءبىرىنشى ورىندى قامىستى اۋداندىق پوليتسيا ءبولىمىنىڭ جول-پاترۋلدىك پوليتسيا توبىنىڭ قىزمەتكەرى, پوليتسيا سەرجانتى ەرلىك سۇراعانوۆ جەڭىپ الدى.
ال بايقاۋدىڭ باس جۇلدەسىن قوستاناي اۋدانى پوليتسيا ءبولىمىنىڭ يۋۆەنالدى پوليتسيا توبىنىڭ كامەلەتكە تولماعاندار ىستەرى جونىندەگى ۋچاسكەلىك پوليتسيا ينسپەكتورى, پوليتسيا اعا لەيتەنانتى امانات كاكىمجانوۆ جەڭىپ الدى. ەندى ول بۇل بايقاۋدىڭ پەتروپاۆل قالاسىندا وتەتىن رەسپۋبليكالىق كەزەڭىندە قوستانايلىق پوليتسەيلەردىڭ نامىسىن قورعايتىن بولادى.
