جاستار جىلى اياسىندا ۇيىمداستىرىلعان ايتۋلى جوبا تامىز ايى بويى ءار سەنبى سايىن ەكسپو الاڭىن ءتۇرلى قىزىق تا توسىن تاڭعاجايىپتاردىڭ ورداسىنا اينالدىرادى دەپ كۇتىلۋدە. جۇلدىزدى جوبانىڭ شىمىلدىعىن قايرات نۇرتاس, ەرجان ماكسيم جانە Mad Men توبى باستاعان انشىلەر اشسا, كوڭىلدى مۋزىكا كەشىن الداعى اپتالاردا ودان ءارى ەركە ەسماحان, نۇرجان كەرمەنباەۆ, M’Dee, Say Mo, Dequine جانە تاعى دا باسقا تالانتتى انشىلەر مەن توپتاردىڭ ونەرى جالعايتىن بولادى.
– ايتۋلى كونتسەرت نۇر-سۇلتان قالاسى تۇرعىندارى مەن قوناقتارىنا ەستەن كەتپەس ەرەكشە كوڭىل كۇي سىيلايدى دەپ سەنەمىز. ءۇش ساعاتتىڭ كولەمىندە انشىلەر جانكۇيەرلەرىن حيت بولعان جاڭا اندەرىمەن قوسا, ارنايى دايارلانعان قايتالانباس حورەوگرافيالىق باعدارلامالارىمەن دە قۋانتاتىن بولادى, – دەيدى بۇل جونىندە «استانا ەكسپو-2017 ۇك» اق باس-
ءپاسوز قىزمەتى وكىلدەرى.
ايتا كەتەيىك, كونتسەرتتىك باعدارلاما ەكسپو حالىقارالىق كورمەسى اۋماعىندا 24 تامىزعا دەيىن ءار سەنبى سايىن ساعات 20.00-دە تەگىن وتەدى. كەلەم دەۋشىلەرگە ەسىك اشىق. مۋزىكالىق كەش باعدارلاماسىنا قايرات نۇرتاس, ەركە ەسماحان, نۇرجان كەرمەنباەۆ, ەرجان ماكسيم باستاعان انشىلەردىڭ ورىنداۋىنداعى تىڭدارماندار اراسىندا كەڭىنەن تانىمال حيت اندەرى ەنگىزىلدى. سونداي-اق كونتسەرت اياسىندا ونەرسۇيەر قاۋىم انشىلەردىڭ ءالى سياسى كەۋىپ ۇلگەرمەگەن جاڭا مۋزىكالىق تۋىندىلارىنىڭ دا تۇساۋكەسەرىنە كۋا بولادى.
