حالىقارالىق ۇيىمنىڭ مالىمەتىنشە, ەل تۇرعىندارى تاۋلىكتىك مولشەردى 3 ەسەدەن ارتتىرىپ, كۇنىنە 17 گرامم اس تۇزىن پايدالانادى ەكەن. بۇل رەتتە ءتيىستى نورما 5 گرامدى قۇرايتىنىن اتاپ وتكەن ورىندى. ماماندار مولشەردەن ارتىق تۇزدى تۇتىنۋ جۇرەك-قان تامىر اۋرۋلارى, ارتەريالىق گيپەرتونيا, ينسۋلت, ينفاركت, سەمىزدىك, ءىى تيپتەگى قانت ديابەتىنىڭ دامۋى سياقتى سوزىلمالى جۇقپالى ەمەس اۋرۋلارعا, سونداي-اق كەيبىر ونكولوگيالىق سىرقات تۇرلەرىن قوزدىرۋى مۇمكىن ەكەنىن جاسىرعان جوق. وسىنى ەسكەرە كەلە قوعامدىق دەنساۋلىق ساقتاۋ ۇلتتىق ورتالىعى جانە س.سەيفۋللين اتىنداعى قازاق اگروتەحنيكالىق ۋنيۆەرسيتەتى ىنتىماقتاستىق مەموراندۋمىنا قول قويدى. مۇنداعى كوزدەلگەن مەجە – ۇن ونىمدەرىنەن جاسالاتىن تاعامداعى تۇزدىڭ مولشەرىن 1 گرامعا بىرتىندەپ ازايتىپ, رەتسەپتۋرانى وزگەرتۋ. سول سەكىلدى قازاقستاندىقتار اراسىندا دۇرىس تاماقتانۋ مادەنيەتىن قالىپتاستىرۋ قاجەت.
– ادام دەنساۋلىعىنىڭ دۇرىس بولۋى 70%-عا دۇرىس تاماقتانۋىنا بايلانىستى. بۇل باعىتتاعى جۇمىستاردى وتكەن جىلدان باستاپ قولعا الدىق. «اتامەكەن» ۇكپ-مەن بىرلەسىپ نان-توقاش ونىمدەرىن وندىرۋشىلەرمەن ءتۇسىندىرۋ جۇمىستارىن جۇرگىزۋدەمىز. وسى ىسكە قازاق اگروتەحنيكالىق ۋنيۆەرسيتەتى جۇمىلدىرىلعانى قۋانتىپ وتىر. ويتكەنى وقۋ ورنىنىڭ عىلىمي-تەحنيكالىق بازاسى دۇرىس تاماقتانۋ ءىسىن جانداندىرۋعا سەپتەسەدى دەپ ۇمىتتەنەمىز. بۇعان قوسا ەلورداداعى جانە قاراعاندىداعى نان-توقاش ونىمدەرىن وندىرۋشىلەرمەن ورتاق كەلىسىمگە قول جەتكىزۋ جوسپاردا بار. ازىرگە پايدالى تاعام ۋنيۆەرسيتەت قابىرعاسىندا وندىرىلمەك. ءۇش جىل كولەمىندە نان ونىمدەرىندەگى تۇزدى 1 گرامنان ازايتۋ كوزدەلگەن, – دەيدى رۋسلان ساتىۆالدەەۆ.
اتالعان ءبىلىم ورداسىنىڭ تاجىريبەلىك-وندىرىستىك تسەحىندا ستۋدەنتتەر مەن وقىتۋشىلار ءۇشىن قۇرامىندا تۇزى از نان ونىمدەرى ازىرلەنەتىن بولادى. ەكىجاقتى ىنتىماقتاستىق شەڭبەرىندە حالىقارالىق ساراپشىلاردى تارتا وتىرىپ ءتۇرلى ونىمدەردەگى تۇزدى ازايتۋ ماسەلەلەرى بويىنشا كونسۋلتاتسيالار, سەمينارلار, سونداي-اق پايدالى تاماقتانۋ مادەنيەتىن قالىپتاستىرۋ بويىنشا اكتسيالار ۇيىمداستىرۋ جوسپارلانعان.
جاقسىلىق مۇراتقالي,
«Egemen Qazaqstan»
