يندۋستريا جانە ينفراقۇرىلىمدىق دامۋ مينيسترلىگى يندۋستريالىق دامۋ جانە ونەركاسىپتىك قاۋىپسىزدىك كوميتەتىنىڭ توراعاسى قانات بايتوۆ ىشكى جالپى ءونىمنىڭ شامامەن 6,7%-ى تاۋ-كەن مەتاللۋرگيا كەشەنىنە تيەسىلى ەكەنىن, سونداي-اق ونەركاسىپتىك ءوندىرىستىڭ 25%-ىن, ەكسپورتتىڭ 24%-ىن وسى سالا الىپ جاتقانىن ايتتى. بۇگىندە سالاداعى كاسىپورىنداردىڭ سانى 800-دەن اسىپ, 185 مىڭ ادام جۇمىسپەن قامتىلعان. كوميتەت توراعاسى سوڭعى 10 جىلدا يندۋستريالاندىرۋ باعدارلاماسى ارقىلى تاۋ-كەن مەتاللۋرگيا كەشەنىندە 114 جوبا ىسكە قوسىلعانىن جەتكىزدى.
– 2015-2019 جىلدار ارالىعىندا ەلىمىزدە ءتورتىنشى ونەركاسىپتىك رەۆوليۋتسيا تالاپتارىنا ساي كەلەتىن جاڭا قوندىرعىلارمەن جاراقتالعان زاماناۋي تاۋ-كەن مەتاللۋرگيا كەشەندەرى ىسكە قوسىلدى. جۋىردا عانا YDD فەرروقورىتپاسىن وندىرەتىن اۆتوماتتاندىرىلعان زاۋىت جۇمىس ىستەي باستادى. ونىڭ وندىرىستىك قۋاتى جىلىنا 180 مىڭ توننا. 2021 جىلعا قاراي بۇل كولەمدى 240 مىڭعا ۇلعايتۋ جوسپارلانعان. ەرەكشەلىگى سول, وندىرىستە جاڭا تەحنولوگيالار قولدانىلادى. اتاپ ايتقاندا, كومىردىڭ ورنىن ەلەكتر ەنەرگياسى الماستىرعان. بۇل اتموسفەراعا تارايتىن زياندى قالدىقتاردى ازايتۋعا سەپتەسىپ وتىر, – دەدى قانات بايتوۆ.
مەكەمە وكىلى 2025 جىلعا دەيىن كەن ءوندىرۋ جانە وڭدەۋ ونەركاسىبىن تسيفرلاندىرۋ شەڭبەرىندە 1,7 ترلن تەڭگە سوماسىنا 192 جوبانى جۇزەگە اسىرۋ جوسپارلانعانىنان حاباردار ەتتى. ونىڭ ەكونوميكالىق پايداسى 2, 2 ترلن تەڭگەنى قۇرايدى دەپ كۇتىلۋدە.
ال «قازمىرىش» كاسىپورىنى تسيفرلاندىرۋدىڭ تيىمدىلىگىن ارتتىرۋ ءۇشىن ارنايى جول كارتاسىن ازىرلەپ, وعان 7 جوبا ەنگىزدى. شىعىستاعى الپاۋىت كومپانيا اسىرەسە جاساندى ينتەللەكتىگە ەرەكشە دەن قويماق. وسى ارقىلى ەڭبەك ونىمدىلىگىن ۇلعايتىپ, جاڭا مامانداردىڭ بۋىنىن قالىپتاستىرۋ ماقساتى قويىلعان.
– Big data – ياعني ۇلكەن دەرەكتى باسقارۋدى ەنگىزۋ قارقىن الىپ, نەگىزگى كەزەڭگە كەلدى. بۇل جوبا ءوندىرىستى ىلگەرىلەتۋمەن قاتار, ەكونوميكالىق مودەلگە وڭ اسەر بەرۋى ءتيىس. ەڭ باستىسى, بارلىق شارۋانى ءبىر ورتالىقتان باسقارىپ, شەشۋگە كومەكتەسەتىنىنە سەنىمدىمىز. تاعى ءبىر اۋقىمدى يننوۆاتسيالىق جوبامىز – ءوزىن-ءوزى وقىتۋ جۇيەسىنە نەگىزدەلگەن جاساندى ينتەللەكتىمەن بايلانىستى زاۋىتتىڭ ىسكە قوسىلۋى. يندۋستريا 4.0-ءدى نەگىزگە الساق, ويىمىزعا بىردەن كيبەرفيزيكالىق جۇيەلەر ورالادى. قاراپايىم تىلمەن ايتقاندا, جاڭا تەحنولوگيالار وپەراتورعا ۇلكەن كولەمدەگى دەرەكتەردى يگەرۋگە ىقپال ەتۋگە ءتيىس, – دەيدى «قازتسينك» جشس باس ديرەكتورىنىڭ تسيفرلى ترانسفورماتسيا بويىنشا كەڭەسشىسى ماكسيم گايفۋلين.
دەگەنمەن بۇل سالادا دا شەشىلمەگەن ماسەلەلەر بار دەيدى سپيكەرلەر. بۇل ءبىرىنشى كەزەكتە بىلىكتى مامانداردىڭ تاپشىلىعىنا قاتىستى. قازىر ەلدەگى اۋىر ءوندىرىس ورىندارىندا سالانى جەتىك بىلەتىن IT-ماماندار تاپشى.
