مەموراندۋم قازاقستانداعى بالالاردىڭ قۇقىقتارى مەن ءال-اۋقاتىن جاقسارتۋ ءۇشىن جۇيەلى جۇمىستاردى قۇرۋعا باعىتتالعان جانە ۇزاق مەرزىمدى ستراتەگيالىق ماقساتتاردى قامتيدى. وسى قۇجاتتىڭ اياسىندا بالالار جانە جاستاردىڭ باستامالارىن قولداۋدا بيزنەستىڭ ءرولىن نىعايتۋ, بىرلەسكەن اقپاراتتىق ناۋقاندار ۇيىمداستىرۋ, بالالاردىڭ قۇقىقتارىن جۇزەگە اسىرۋداعى حالىقارالىق ستاندارتتار مەن وڭ جوبالار تۋرالى اقپاراتپەن حالىقتى دەر كەزىندە قامتۋ. سونداي-اق دونورلارعا قولايلى جاعداي جاساپ, وسى سالاداعى مادەنيەتتى ناسيحاتتاۋ كوزدەلگەن.
يۋنيسەف-ءتىڭ قازاقستانداعى وكىلى ارتۋر ۆان ديزەن سەرىكتەستىك بايلانىستىڭ ماڭىزدىلىعىن جانە بالالاردىڭ جاعدايىن جاقسارتۋدا بيزنەستىڭ ىقپالى ايرىقشا ەكەنىن ايتادى.
– ءبىز بالالاردىڭ ساپالى قىزمەتتەرگە, ونىڭ ىشىندە دەنساۋلىق ساقتاۋ, ءبىلىم بەرۋ جانە الەۋمەتتىك قورعاۋعا تەڭ مۇمكىندىگىن جاقسارتۋ ءۇشىن جۇيەلى وزگەرىستەردى جاساۋعا دايىن كومپانيالاردى قولدايمىز. بۇگىن قازاقستان بويىنشا پوشتا, قارجىلىق جانە ەلەكتروندى قىزمەتتەردى ۇسىناتىن «قازپوشتا» اق-مەن ىنتىماقتاستىق تۋرالى مەموراندۋمعا قول قويۋعا قۋانىشتىمىز. بۇل ەلدەگى بالالاردىڭ جاعدايىن جاقسارتۋعا نەگىزدەلگەن كەلىسىم, - دەيدى ارتۋر ۆان ديزەن.
«قازپوشتا» اق باسقارما توراعاسى ساكەن سارسەنوۆ, كومپانيا بالالار مەن جاستاردىڭ جوبالارىن اقپاراتتىق تۇرعىدا قولداۋعا دايىن ەكەندەرىن ءبىلدىردى. سول سەكىلدى ول قازاقستاننىڭ بالا قۇقىقتارى تۋرالى كونۆەنتسياعا قول قويعانىنا 25 جىل تولۋىنا وراي مەرەيتويلىق پوشتا ماركاسى شىعارىلاتىنى جونىندە حابارلادى.
