قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا يننوۆاتسيالىق جانە سەرۆيستىك سەكتورلاردى دامىتۋعا ەرەكشە نازار اۋدارۋ كەرەكتىگىن باسا ايتقان بولاتىن. تابيعات بايلىعىن ءتيىمدى پايدالانۋ ماقساتىندا سارىسۋ اۋدانىندا «جاڭاتاس جەل ەلەكتر ستانساسىنىڭ» قۇرىلىسى باستالدى. سەبەبى اۋداندا اققىرقا جانە ارىستاندى قاراباس جەلىنىڭ قۋاتى ەرەكشە. وسى ءبىر تابيعات بايلىعىن يگەرۋدىڭ تىڭ جولى رەتىندە قۇرىلىسى باستالعان ستانسانىڭ باستى ماقساتى جەرگىلىكتى تۇرعىنداردى جۇمىسپەن قامتۋ جانە اۋداندا جۇمىسسىزدار سانىن ازايتۋ بولىپ وتىر.
اتالعان ستانسا سارىسۋ اۋدانى تۇركىستان اۋىلدىق وكرۋگىندە ورنالاسقان. قۇرىلىسى باستالعان نىسان 2020 جىلى اقپان ايىندا ىسكە قوسىلاتىن بولادى. اۋدان اكىمدىگىنىڭ مالىمەتىنشە, ەلەكتر قۋاتىن ءبولۋ سحەماسى ازىرلەنىپ, رەسپۋبليكالىق «KEGOG» اكتسيونەرلىك قوعامىنىڭ كەلىسىمى الىنعان. بۇگىنگى تاڭدا اتالعان ستانسانىڭ قۇرىلىسىن جۇرگىزۋشى باس مەردىگەر رەتىندە قىتاي حالىق رەسپۋبليكاسىنىڭ «China Power International Holding» كومپانياسى انىقتالعان. قازىرگى كەزدە كومپانيا وكىلدىگى مەن جۇمىسشىلارى سارىسۋ اۋدانىنا كەلىپ, قۇرىلىس الاڭىندا دايىندىق پەن جوبالاۋ جۇمىستارىن جۇرگىزۋدە. مۇندا جۇمىسشىلارعا قاجەتتى كونتەينەرلەر قويىلىپ, ءتيىستى تەحنيكالار جۇمىلدىرىلعان.
سالىنىپ جاتقان «جاڭاتاس جەل ەلەكتر ستانساسىنىڭ» جالپى قۋاتى 100 مۆت-تى قۇرايدى. بۇگىنگى تاڭدا جەل ەنەرگياسى ەلىمىزدە قارقىندى دامىپ كەلە جاتقان سالا. بۇل كاسىپكەرلەر ءۇشىن جەل كۇشى ارقىلى ەلەكتر ەنەرگياسىن وندىرۋدە ءتيىمدى ينۆەستيتسيالىق جوبالار بولىپ سانالادى. ال سارىسۋ اۋدانىندا سالىنىپ جاتقان جەل ەلەكتر ستانساسى ەلىمىزدىڭ وڭىرلەرى اراسىندا جاڭعىرمالى ەنەرگيا كوزدەرىن دامىتۋعا باعىتتالعان. جالپى, جەل ەلەكتر ستانساسى جەلدىڭ كينەتيكالىق ەنەرگياسىن ەلەكتر ەنەرگياسىنا تۇرلەندىرەتىن قوندىرعى. «جاڭاتاس جەل ەلەكتر ستانساسى» جەل قوزعالتقىشىنان, ەلەكتر توگىنىڭ گەنەراتورىنان, سول جەل قوزعالتقىشى مەن ەلەكتر توگىنىڭ گەنەراتورىن اۆتوماتتى تۇردە باسقاراتىن قۇرىلعىدان تۇرادى. جەلدىڭ كۇشى قوندىرعىنىڭ قالاقتارىن اينالدىرىپ, گەنەراتوردىڭ بىلىگىن قوزعالتادى. ال گەنەراتور ءوز كەزەگىندە ەلەكتر ەنەرگياسىن وندىرەدى.
سارىسۋ اۋدانىنا ارنايى كەلگەن قىتايلىق مەردىگەر كومپانيا وكىلدەرى گو تسيان, چجان ليان, ۋ انتسزيان, ۆەي لي جانە وزگە دە ازاماتتار بۇل جوبانىڭ ءوڭىر ەكونوميكاسى ءۇشىن بارلىق جاعىنان ءتيىمدى ەكەنىن ايتادى. بۇل رەتتە سارىسۋ اۋدانىنىڭ اكىمى قاناتبەك مادىبەك تە ماڭىزدى جوبانىڭ اۋداننىڭ ودان ءارى وركەندەۋىنە قوساتىن ۇلەسىنىڭ مول ەكەنىنە توقتالدى. سونىمەن قاتار اۋدان اكىمى قۇرىلىسقا قاجەتتى بارلىق زاتتاردى جەرگىلىكتى جەردەن الۋدى ۇسىنىپ وتىر. تاعى ءبىر ماسەلە, ستانسا اشىلاتىن تۇركىستان اۋىلدىق وكرۋگىندە تۇراتىن تۇرعىندار مەن وزگە دە مال باققان ازاماتتاردىڭ قاۋىپسىزدىگى. بۇل رەتتە جەرگىلىكتى ازاماتتاردىڭ قاۋىپسىزدىگىنە باسا نازار اۋدارىلىپ وتىر.
جالپى, اتالعان جوبانى «جاڭاتاس جەل ەلەكتروستانساسى» جاۋاپكەرشىلىگى شەكتەۋلى سەرىكتەستىگى ۇسىنعان. بۇگىندە قۇرىلىسى قارقىن العان ستانسا اياقتالعاندا ءتورت مەزگىلدە دە تىنىمسىز سوعاتىن اققىرقا مەن ارىستاندى قاراباس جەلى ءوڭىر ەكونوميكاسىنىڭ دامۋىنا وزىندىك ۇلەسىن قوساتىن بولادى.
جامبىل وبلىسى
