بەينەلەپ ايتقاندا, ونى جۇمساق كونتەينەر نەمەسە بەرىك قاپشىقتار دەسە دە بولادى. ولاردىڭ جۇك كوتەرۋ قۋاتى 500-دەن 2000 كيلو ارالىعىندا. تۇتاس ءبىر فابريكا قىزمەتىن اتقارا الاتىن بىرەگەي قۇرىلىستىڭ جوباسىن 4 كەزەڭ بويىنشا جۇرگىزۋ كوزدەلگەن. وعان جۇمسالاتىن قاراجاتتىڭ كولەمى 1 ميلليارد تەڭگەنى قۇرايدى.
– العاشقى كەزدە قارجىنىڭ جارتىسى يگەرىلىپ, سوعان سايكەس قاپشىقتاردى تىگەتىن جانە پىشەتىن تسەح ىسكە قوسىلدى. ەلىمىزدە بالاماسى جوق وزگەشە ءونىمدى پايدالانۋ ارقىلى تاعامدار مەن كۇكىرتتى جانە تسەمەنت پەن قۇمدى تاسىمالداۋدىڭ, ساقتاۋدىڭ جاڭا مۇمكىندىكتەرى اشىلدى ءارى وسى تەكتەس تاۋارلاردى تيەۋ مەن ءتۇسىرۋدىڭ ءتيىمدى ءتاسىلى وندىرىسكە ەنگىزىلدى, – دەيدى «اقتوبە اكك» اق باسقارما توراعاسى رۋسلان مامۋنوۆ.
– جاڭا كاسىپورىننىڭ اشىلۋى اقتوبە پوليمەر فابريكاسى قۇرىلىسى ءبىرىنشى كەزەڭىنىڭ اياقتالۋىمەن تۇسپا-تۇس كەلەدى. بۇگىندە مۇندا 30 ادام جۇمىس ىستەيدى. فابريكانىڭ جۇمىسى اۋىر جۇك كوتەرۋگە ءتوزىمدى پوليپروپيلەندى ماتانى ازىرلەۋدەن باستالادى. سوندىقتان دا ءبىز ەڭ الدىمەن جوبانىڭ وسى قىرىن جوسپارلاپ وتىرمىز, – دەدى جاڭا كاسىپورىننىڭ ديرەكتورى بوتاگوز تايبوكەنوۆا.
اقتوبە يندۋستريالىق ايماعىنان تىڭ كاسىپ يەلەرىنە 2 گەكتار جەر بولىنگەن. وعان بارلىق قولايلى جاعداي جاسالىپ, ينجەنەرلىك جەلىلەر تارتىلعان. بۇگىندە كاسىپورىن جەتەكشىلەرىنىڭ ماركەتينگتىك تالداۋلار جۇرگىزۋگە باسا نازار اۋدارىپ وتىرعانى دا ونىمگە دەگەن سۇرانىس كولەمىن كوبەيتۋگە كومەگىن تيگىزەرى انىق. ارينە مۇنداعى نەگىزگى تاپسىرىس بەرۋشىلەر تاۋ-كەن ءوندىرۋ ونەركاسىبى كاسىپورىندارى بولماق.
جاڭا كاسىپورىنداردا ءونىم ساپاسىنا ايرىقشا كوڭىل بولىنگەن. قاجەتتى شيكىزات ازىرگە رەسەيدەگى چەليابى جانە ياروسلاۆل قالالارىنان جەتكىزىلىپ جاتىر.
قازىرگى كەزدە FIBC KAZAKHSTAN كومپانياسىنىڭ نەگىزگى تۇتىنۋشىسى «تەڭىزشەۆرويل» كومپانياسى بولىپ وتىر. مەنشىك يەلەرىنىڭ از ۋاقىت ىشىندە ازۋى التى قارىس كومپانيامەن بىرگە جۇمىس ىستەۋ تاجىريبەسىن ورنىقتىرا بىلگەنى دە اتاپ ايتۋعا تۇرارلىق. بۇگىندە اتالعان ەكى تاراپ ءونىمدى جەتكىزۋ مەن تۇتىنۋ جونىندە ءوزارا كەلىسىمشارت جاساعان.
كاسىپورىن جوبالىق قۋاتىنىڭ 40 پايىزدىق دەڭگەيىندە ىسكە قوسىلعان. قولدا بار جابدىقتار مەن وندىرىستىك ماشينالار جىلىنا 30 مىڭ ۆاگون سىناسى مەن 300 مىڭ جۇمساق كونتەينەر شىعارا الادى. ال جوبا تولىق قۋاتىنا قوسىلعان كەزدە جىلىنا ءبىر ميلليون دانا قاتتى قاپشىق شىعارىلماق. سونداي-اق جوبانى جۇزەگە اسىرۋدىڭ ەكىنشى كەزەڭىندە وندىرىستىك تسەحتىڭ اۋماعى مەن كولەمى ودان ءارى ۇلعايادى دەپ كۇتىلۋدە. ال سوڭعى ءۇشىنشى كەزەڭىندە پوليپروپيلەندى جەتىلدىرۋگە ارنالعان تسەح قۇرىلىسى مەن شيكىزات بازاسىن ازىرلەۋ ءىسى قولعا الىنباق.
اقتوبە
