قۋات كوزى ارتادى
سەيسەنبى, 21 مامىر 2013 1:07
ونىڭ نەگىزى بولاتىن ەنەرگيا بلوگى جۇمىسقا تولىق دايىن
ەلىمىزدىڭ يندۋستريالاندىرۋ كارتاسىنداعى ءىرى جوبالاردىڭ ءبىرى بولىپ تابىلاتىن «ەەك» اق-قا قاراستى اقسۋ جىلۋ ەلەكتر ستانتسياسىنىڭ №6 ەنەرگيا بلوگىن قالپىنا كەلتىرۋ جۇمىستارى اياقتالۋعا جاقىن. نىسانداعى ەڭ ءىرى ءارى كۇردەلى بولىكتى ورناتۋدى «ەكيباستۋزتەپلوەنەرگومونتاج» جشس (ەتەم) جۇزەگە اسىرىپ, جۇزدەرى مەرەيلەندى.
سەيسەنبى, 21 مامىر 2013 1:07
ونىڭ نەگىزى بولاتىن ەنەرگيا بلوگى جۇمىسقا تولىق دايىن
ەلىمىزدىڭ يندۋستريالاندىرۋ كارتاسىنداعى ءىرى جوبالاردىڭ ءبىرى بولىپ تابىلاتىن «ەەك» اق-قا قاراستى اقسۋ جىلۋ ەلەكتر ستانتسياسىنىڭ №6 ەنەرگيا بلوگىن قالپىنا كەلتىرۋ جۇمىستارى اياقتالۋعا جاقىن. نىسانداعى ەڭ ءىرى ءارى كۇردەلى بولىكتى ورناتۋدى «ەكيباستۋزتەپلوەنەرگومونتاج» جشس (ەتەم) جۇزەگە اسىرىپ, جۇزدەرى مەرەيلەندى.
«ەتەم» جشس جۇمىسكەرلەرى №6 ەنەرگيا بلوگىندا كەزەڭدى مونتاجداۋ جانە بولشەكتەۋ جۇمىستارىن ءجىتى جۇرگىزىپ, ونداعى قوسىمشا قۇبىرلاردى الماستىرۋمەن اينالىسىپ, اقىرى ۇلكەن اسۋعا ابىرويمەن شىعىپ وتىر.
كاسىپورىن ENRC قۇرامىنداعى «ەۋروازيالىق ەنەرگەتيكالىق كورپوراتسياسى» اق-مەن بىرنەشە جىلدان بەرى قويان-قولتىق جۇمىس ىستەيدى. ماماندار كەزىندە №2 ەنەرگيا بلوگىن دا قالىپقا كەلتىرىپ, قاتارعا قوسۋمەن دە اينالىسقان.
– «ەەك» اق سياقتى ءىرى كاسىپورىندا جۇمىس ىستەۋ – زور جاۋاپكەرشىلىك جۇكتەيدى, – دەيدى «ەتەم» جشس ۋچاسكە باستىعى نۇرلان قايىرباەۆ. – ءبىزدىڭ كومپانيا 2007 جىلدان باستاپ ەەك-كە قىزمەت كورسەتىپ كەلەدى. باستاپقىدا ورتاشا جوبالاردى ورىنداپ جۇردىك. قازىر №6 ەنەرگيا بلوگىندا, ماڭىزدى ءارى جاۋاپتى نىساندا جۇمىس اتقارامىز. مۇندا جىل بويى مىڭداعان ادام ەڭبەك ەتىپ, ونەگە تانىتتى. ءبىزدىڭ ۇجىم بارلىق جۇمىستى بەلگىلەنگەن مەرزىمدە ءبىتىردى.
سالا ماماندارى ەەك-ءتىڭ ەنەرگيا بلوكتارىن جاڭارتۋ جونىندەگى باعدارلاماسىن بىرەگەي سانايدى, سەبەبى ول نەگىزگى ءوندىرىستى توقتاتپاي جۇزەگە اسىرىلۋ ۇستىندە. تولىق تەحنيكالىق قايتا جاراقتاندىرۋ جۇرگىزىلىپ, تۋربواگرەگات, ترانسفورماتورلار, گەنەراتورلار مەن ەلەكتر سۇزگىلەر ورناتىلادى. اۆتوماتتاندىرىلعان باسقارۋ جۇيەسى ەنگىزىلەدى.
№6 ەنەرگيا بلوگىن قالىپقا كەلتىرۋ 2011 جىلى باستالدى. جوبا ستانتسيانىڭ بارلىق ەنەرگيا بلوكتارىن اۋىستىرۋ جونىندەگى 2001 جىلعى باعدارلاما اياسىندا جۇزەگە اسىرىلىپ جاتىر. №1,2,3 جانە 4 ەنەرگيا بلوكتارىن قايتا قالىپقا كەلتىرۋ ىسكە اسىرىلىپ, ەل يگىلىگىن كورۋدە. بۇل جوبا مەملەكەتتىك يندۋستريالىق-يننوۆاتسيالىق باعدارلاماسىنا ەنگىزىلگەن. سول جۇمىستاردىڭ ناتيجەسىندە ەنەرگيا بلوگىنىڭ قۋاتى 325 مۆت قۇراپ, ستانتسيانىڭ كۇشى 2 450 مۆت-قا جەتەدى.
ورناتىلعان جاڭا قۇرال-جابدىقتار بولاشاقتا قايتا قالىپقا كەلتىرۋ جۇمىستارىنىڭ زالالدارىن ازايتىپ, ەلەكتر ەنەرگياسىنىڭ شىعىنىن جانە قورشاعان ورتاعا زياندى قالدىقتاردى شىعارۋدى ايتارلىقتاي تومەندەتەدى.
– №6 ەنەرگيا بلوگىن قالىپقا كەلتىرۋ جۇمىستارىنا 250 ملن. اقش دوللارىن باعىتتادىق. جوباعا 20-داي وتاندىق مەردىگەر تارتىلدى. ولاردىڭ كوبى ءوز جۇمىستارىن جاقسى اتقارىپ, دىتتەگەن مەجەلەرىنە جەتتى, – دەيدى «ەەك» اق ديرەكتورىنىڭ كۇردەلى جوندەۋلەر جونىندەگى ورىنباسارى رۋستام احمەتوۆ.
سونىمەن, رەسپۋبليكاداعى الىپ نىسان قۇرىلىسىن جاڭعىرتىپ, قالىپقا كەلتىرۋ تولىقتاي اياقتالدى دەپ ايتۋعا ابدەن بولادى.
مارات اققۇل,
«ەگەمەن قازاقستان».
