وڭىردەگى نەگىزگى ءىس-قيمىل ينۆەستيتسيالىق تارتىمدىلىقتى ودان ءارى تەرەڭدەتىپ, جاڭاشا سەرپىلىس بەرۋگە باعىتتالۋعا ءتيىس. بۇل رەتتە ءوز قىزمەتىن بىلتىر باستاعان جوبالىق كەڭسەنىڭ ەكىنشى تىنىسىن اشۋ كوزدەلگەن. اتالعان الاڭ ءتيىمدى تۇردە پايدالانىلسا, بۇل قادام ينۆەستيتسيالىق جوبالاردىڭ كەدەرگىسىز جۇزەگە اسۋىنا سەپتىگىن تيگىزبەك. سونىمەن بىرگە ينۆەستورلاردىڭ بويىندا سىبايلاس جەمقورلىققا قارسى تۇرا ءبىلۋ داعدىلارى مەن يممۋنيتەتىن قالىپتاستىرۋعا جول اشپاق. مۇنداي فرونت-كەڭسە ينۆەستيتسيالىق سيپاتتاعى بيزنەس-كليماتتىڭ جاقسارۋىنا دا اسەر ەتە الاتىنى بەلگىلى بولىپ وتىر. ايتالىق, وبلىستا اتالعان قۇرىلىم اشىلعان ۋاقىتتان بەرى ينۆەستورلاردى سىبايلاس جەمقورلىققا قارسى سۇيەمەلدەۋ بويىنشا 24 كەلىسىمگە قول قويىلعان. سونداي-اق وڭىردە العاشقى اتالعان جوبامەن ەنشىلەس «اقتوبە – ادالدىق الاڭى» جوباسى سىبايلاس جەمقورلىق دەڭگەيىن قىسقارتۋعا ءارى وسى دەرتكە تەرىس كوزقاراس قالىپتاستىرۋعا اسەر ەتە باستاعانى انىق بايقالادى. وسى ارقىلى ازاماتتاردىڭ مەملەكەتتىك بيلىك ينستيتۋتتارىنا دەگەن سەنىمىن تەرەڭدەتە ءتۇسۋ قاراستىرىلعان.
بۇگىندە وبلىستا پرەزيدەنتتىڭ ۇكىمەتتىڭ كەڭەيتىلگەن وتىرىسىندا جەرگىلىكتى اتقارۋشى ورگاندارعا بەرگەن تاپسىرماسىن ورىنداۋ ءۇشىن جۇيەلى جۇمىستار ءجۇرگىزىلە باستادى. مۇنىڭ ءبىر ارناسى ينۆەستيتسيالىق قاراجاتتار كولەمىن ودان ءارى ءوسىرۋگە باعىتتالعان. وسىعان وراي كەيبىر دەرەكتەردى كەلتىرە كەتسەك, 2019 جىلدىڭ العاشقى جارتىجىلدىعىنىڭ قورىتىندىسى بويىنشا وڭىردە ينۆەستيتسيا تارتۋ ءوسىمى 100,2 پايىزدى قۇراپتى. ەسەپتىك كەزەڭ ارالىعىندا وبلىستا 210 ميلليارد تەڭگەنىڭ ينۆەستيتسياسى تارتىلعان. ونىڭ 30 پايىزى سىرتقى ينۆەستيتسيا بولىپ تابىلادى. بۇل قاناعات تۇتۋعا تۇرارلىق كورسەتكىشتەر ەكەنى كامىل. ايتسە دە بيىل وڭىردە ينۆەستيتسيا تارتۋ جونىندەگى مەجە تابانى كۇرەكتەي 620 ميلليارد تەڭگەدەن اساتىنىن ەسكەرسەك, العاشقى جارتىجىلدىقتا الىنعان اسۋ تۇتاستاي جىلدىق ءمولشەردىڭ نەبارى ۇشتەن ءبىر بولىگى ەكەنىنە كوز جەتكىزەمىز. بۇل كولەم وتكەن جىلدىڭ دەڭگەيىنەن 10 پايىزعا ارتىق ەكەندىگى دە ينۆەستيتسيانىڭ جاڭا تولقىنىن تۋعىزۋ ءۇشىن تىڭ تاسىلدەر مەن ىزدەنىستەردى قاراستىرۋ كەرەكتىگىن كورسەتەدى.
وسى ورايدا وڭىردە ينۆەستيتسيالىق تارتىمدىلىقتى ودان ءارى تەرەڭدەتۋ ءۇشىن كەشەندى كوزقاراس قالىپتاستىرۋ قاجەتتىگى تالاس تۋعىزبايدى. بيىلعى ءساۋىر ايىندا كاسىپكەرلىك كودەكسىنە بىرقاتار ءوزگەرىستەر ەنگىزىلدى. كودەكستە ينۆەستورلارعا «ءبىر تەرەزە» قاعيداتى بويىنشا مەملەكەتتىك تۇرعىدان قولداۋ كورسەتۋ شارالارى بەلگىلەنگەن.
ياعني, جەڭىلدەتىلگەن ءارى وڭايلاتىلعان رەجىم جاعدايىندا ينۆەستورلارعا جەر بەرۋ مەن ءبولۋ ارقىلى ولاردىڭ سالىق تولەۋ ءجونىندەگى ماسەلەلەرى ءبىرشاما وڭتايلانا تۇسپەك. ينۆەستورلارعا ارنالعان «ءبىر تەرەزە» قاعيداسى تەك مۇنىمەن شەكتەلمەيدى. بۇل وزگەرىس قارجىلاي كومەك پەن ادامي كاپيتال بويىنشا بارلىق قاجەتتى ماسەلەلەردى توعىستىرا الادى, دەيدى. اقتوبە وبلىستىق كاسىپكەرلەر پالاتاسىنىڭ باسشىسى انار دارجانوۆا.
ءتۇيىپ ايتقاندا, ايماقتا ينۆەستيتسيا تارتۋ جونىندە بيىك مىندەتتەر بەلگىلەنگەن. بۇل رەتتە وبلىس اكىمدىگى تاراپىنان قولعا الىنعان ءىس-شارالار جاۋاپتى ءىستىڭ ءناتيجەلى بولۋىنا نەگىز قالايدى دەگەن ويدامىز.
اقتوبە
