ينۆەستيتسيالىق احۋالدى جاقسارتۋ قاجەت
ۇكىمەت باسشىسى حالىقتىڭ ءال-اۋقاتىن جانە جالپى ەكونوميكانى جاقسارتۋعا باعىتتالعان پرەزيدەنتتىڭ تاپسىرمالارىن ەسكە سالا وتىرىپ, مينيسترلەر كابينەتىنىڭ قازىرگى مىندەتى – حالىقتىڭ ءومىر ءسۇرۋ ساپاسىن جاقسارتۋ جانە تابىسىن ارتتىرۋ, جاڭا جۇمىس ورىندارىن اشۋ جانە جاڭا ينۆەستيتسيالار تارتۋ ەكەنىن اتاپ ءوتتى.
«بارلىق مەملەكەتتىك ورگاندار, ۇلتتىق حولدينگتەر مەن اكىمدىكتەر ينۆەستيتسيالاردى تارتۋ بويىنشا جۇمىستى بەلسەندى تۇردە جۇرگىزۋلەرى ءتيىس. وسى جۇمىستى باقىلاۋ ءۇشىن ءاربىر مەملەكەتتىك ورگانعا, حولدينگكە جانە اكىمدىككە وزەكتى تيىمدىلىك كورسەتكىشتەرى بەلگىلەنەدى. ۇكىمەت جاڭا ءتيىمدى جۇمىس ورىندارىن قۇرىپ, ەكونوميكانىڭ باسىم سەكتورلارىندا ءوندىرىستى ءارتاراپتاندىرۋدى, وزىق تەحنولوگيالاردى ەنگىزىپ, ەكسپورتتى كەڭەيتۋى قاجەت. وسى رەتتە مەملەكەت تاراپىنان قاجەتتى قولداۋ شارالارى قابىلدانىپ, ينۆەستيتسيالىق احۋالدى جاقسارتۋ كەرەك», دەدى پرەمەر-مينيستر.
«الەۋمەتتىك سالانى دامىتۋ ماقساتىندا بىرقاتار ناقتى شارالار قولعا الىنادى. سونىڭ ىشىندە, مۇقتاج ادامدارعا الەۋمەتتىك قولداۋ كورسەتۋدىڭ ناقتى جانە اشىق راسىمدەرى بەلگىلەنەدى, الەۋمەتتىك قولداۋدىڭ كەپىلدى كولەمىن كورسەتۋدىڭ بىرىڭعاي تاسىلدەرى جاسالادى. ءبىلىم بەرۋ سالاسىندا ءبىلىم مەن عىلىمدى تولىق قارجىلاندىرۋدى قامتاماسىز ەتۋدىڭ ءىس-قيمىل جوسپارى ازىرلەنەدى, مەكتەپتى جانە كاسىپتىك-تەحنيكالىق ءبىلىم بەرۋدى ودان ءارى رەفورمالاۋ جۇمىسى جالعاسادى», دەدى ۇكىمەت باسشىسى.
بيۋدجەت قاراجاتى ۇنەمدەلەدى
پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا.سمايىلوۆ بيۋدجەتتى جان-جاقتى ۇنەمدەۋ ماسەلەسىنە كەڭىنەن توقتالدى. «تامىزدا جالپى سيپاتتاعى ترانسفەرتتەردى ەسەپتەۋ ادىستەمەسىنە وزگەرىستەر ەنگىزىلەدى. 2020-2022 جىلدارعا ارنالعان جالپى سيپاتتاعى ترانسفەرتتەر 2020 جىلدىڭ 1 قاڭتارىنان باستاپ كورپوراتيۆتىك تابىس سالىعىن شاعىن جانە ورتا بيزنەستەن جەرگىلىكتى بيۋدجەتتەرگە بەرۋدى ەسكەرە وتىرىپ, ايقىندالاتىن بولادى. بيىل قازان ايىندا كۆازيمەملەكەتتىك سەكتورعا بولىنەتىن قاراجاتتى پايدالانۋ ءتيىمدىلىگىنە تالداۋ جۇرگىزىلەدى. سالىنعان قاراجاتتان قايتارىمدى باقىلاۋ ءتاسىلدەرى جانە كۆازيمەملەكەتتىك سەكتور قىزمەتىنىڭ تيىمدىلىگىن باعالاۋ ءۇشىن ءادىستەمە جوباسى ازىرلەنەدى», – دەدى ءا.سمايىلوۆ.
ۇكىمەت باسشىسىنىڭ ءبىرىنشى ورىنباسارى كۆازيمەملەكەتتىك سەكتورداعى كومپانيالاردىڭ ىسىراپ جاساۋىنا قانداي توسقاۋىل قويىلاتىنىن ايتتى. «بيىل جەلتوقساندا ۇلتتىق ەكونوميكا مينيسترلىگى ەسەپ كوميتەتىمەن بىرلەسىپ, مەملەكەتتىك جانە كۆازيمەملەكەتتىك سەكتورلاردا بيۋدجەت قاراجاتىن ءتيىمسىز پايدالانعانى جانە جوسپارلاعانى ءۇشىن جاۋاپكەرشىلىكتى كۇشەيتۋ بويىنشا شارالار, ونىڭ ىشىندە زاڭناماعا وزگەرىستەر قابىلداناتىن بولادى», دەدى ۇكىمەت باسشىسىنىڭ ءبىرىنشى ورىنباسارى.
سونداي-اق ءا.سمايىلوۆ بيۋدجەت قاراجاتىنىڭ تيىمدىلىگىن ارتتىرۋ ماقساتىندا بيۋدجەتتىك وتىنىمدەردى قاراۋ كەزىندە ەڭ الدىمەن الەۋمەتتىك-ەكونوميكالىق اسەرى ەسكەرىلەتىنىن ايتا كەلىپ, كورمەلەر, كونفەرەنتسيالار جانە دوڭگەلەك ۇستەلدەر وتكىزۋگە ارنالعان شىعىستارعا تالداۋ جۇرگىزىلىپ جاتقانىن ءمالىمدەدى. ونىڭ ايتۋىنشا, يميدجدىك ءىس-شارالارعا كەتەتىن شىعىن نەگىزىنەن جەرگىلىكتى بيۋدجەتتەن جۇمسالماق.
«دەلدالدىق بايلانىستاردى قىسقارتۋ ماقساتىندا كوكونىستەر مەن جەمىستەردى ساقتاۋعا ارنالعان زاماناۋي ينفراقۇرىلىم, ازىق-ت ۇلىك ونىمدەرىنە ارنالعان تاراتۋ ورتالىقتارى قۇرىلادى. كورشى ەلدەرمەن كولىكتىك-لوگيستيكالىق جەلى دامىتىلادى. قولما-قولسىز تولەمدەردى ىنتالاندىرۋ جانە ەلەكتروندى كوممەرتسيانى دامىتۋ ارقىلى شاعىن ءجانە ميكرو-بيزنەستى كولەڭكەلى ساۋدادان جاپپاي شىعارۋ جوسپارلانۋدا», دەدى ۇكىمەت باسشىسىنىڭ ءبىرىنشى ورىنباسارى.
بوس جەرلەردى اينالىمعا تارتۋ جوسپارى بەكىتىلدى
ۇكىمەت وتىرىسىندا پرەمەر-مينيستردىڭ ورىنباسارى جەڭىس قاسىمبەك اگروونەركاسىپ كەشەنىن دامىتۋدىڭ مەملەكەتتىك باعدارلاماسىنا 2019 جىلدىڭ قازان ايىندا وزگەرتۋلەر ەنگىزىلەتىنىن حابارلادى.
«مەملەكەت باسشىسىنىڭ تاپسىرماسى بويىنشا اگروونەركاسىپ كەشەنىن دامىتۋدىڭ مەملەكەتتىك باعدارلاماسىنا 2019 جىلدىڭ قازان ايىندا ءوزگەرتۋلەر ەنگىزىلەدى. ونىڭ ىشىندە اگروونەركاسىپ كەشەنىن مەملەكەتتىك قولداۋ شارالارىنىڭ تۇراقتىلىعى مەن ايقىندىلىعىن قامتاماسىز ەتۋ, اگروونەركاسىپ كەشەنىنىڭ ءوزارا مىندەتتەمەلەرىنىڭ جيىنتىعىن ايقىنداۋ, وڭدەۋ زاۋىتتارىن جاڭعىرتۋعا, قايتا قۇرۋعا ترانسۇلتتىق كورپوراتسيالاردى تارتۋ, جەر رەسۋرستارىن ۇتىمدى پايدالانۋ شارالارىن قابىلداۋ ەسكەرىلگەن», دەي كەلە ج.قاسىمبەك «قازاگرو» ۇلتتىق باسقارۋشى حولدينگى»اق قىزمەتىنىڭ ءتيىمدىلىگىن ارتتىرۋ ماسەلەسىنە دە توقتالدى.
«بيزنەس-پروتسەستەردىڭ قارجىلىق تۇراقتىلىعىن قامتاماسىز ەتۋ جانە ءتيىمدىلىگىن ارتتىرۋ ماقساتىندا «قازاگرو» حولدينگىنىڭ ترانسفورماتسيالىق باعدارلاماسى دايىندالدى. 2020-2029 جىلدارعا ارنالعان حولدينگتىڭ جاڭا ستراتەگياسىنىڭ جوباسى ازىرلەنىپ, سالانىڭ نەگىزگى باسىمدىقتارى ەسكەرىلدى. بيزنەس-پروتسەستەر مەن قۇرىلىمدى وڭتايلاندىرۋدى تولىق اۆتوماتتاندىرۋ جۇزەگە اسىرىلادى. حولدينگ شەتەلدىك مامانداردى تارتادى», دەدى ۇكىمەت باسشىسىنىڭ ورىنباسارى.
ج.قاسىمبەكتىڭ ايتۋىنشا, اۋىل شارۋاشىلىعى مينيسترلىگى مەن باس پروكۋراتۋرا پايدالانىلماعان جەرلەردى انىقتاۋ جانە ونى اينالىمعا ەنگىزۋ بويىنشا ءىس-شارالار جوسپارىن بەكىتتى. «بيىل جەر مونيتورينگى, جەردى پايدالانۋ, قورعاۋ, مەملەكەتتىك باقىلاۋ جانە جەر تەلىمدەرىن ءبولۋ ۇدەرىستەرىن اۆتوماتتاندىرۋ, سونداي-اق پايدالانىلماعان جەرلەردى اينالىمعا ەنگىزۋ جانە قايتارۋ جونىندەگى شارالاردى قامتاماسىز ەتۋ بويىنشا زاڭنامانى جەتىلدىرۋ جوسپارلانۋدا», دەدى ج.قاسىمبەك.
سونىمەن قاتار اۋىل شارۋاشىلىعى جەرلەرىن ساتۋ جانە جالعا بەرۋگە قويىلعان موراتوري ماسەلەسىنە توقتالىپ, اۋىل شارۋاشىلىعى مينيسترلىگىنىڭ الاڭىندا زاڭ جوباسىنىڭ تۇجىرىمداماسى تانىستىرىلعانىن ايتتى. «اتالعان ماسەلەنى قوعامداستىقپەن تالقىلاۋ تۇرعىسىندا وڭىرلەرگە ساپارلاۋ كەستەسى بەكىتىلدى. 2019 جىلدىڭ سوڭىنا قاراي بۇل ماسەلە قازاقستان رەسپۋبليكاسى پرەزيدەنتىنىڭ جانىنداعى ۇلتتىق قوعامدىق سەنىم كەڭەسىنە ۇسىنىلاتىن بولادى», دەدى ۇكىمەت باسشىسىنىڭ ورىنباسارى.
جاڭا زاڭ ەڭبەك داۋلارىنا جول بەرمەيدى
مەملەكەت باسشىسى ۇكىمەتتىڭ كەڭەيتىلگەن وتىرىسىندا كوتەرگەن ماسەلەلەردىڭ ءبىرى شەتەلدىك كومپانيالارداعى ەڭبەك داۋلارى. وسى ورايدا پرەمەر-مينيستردىڭ ورىنباسارى گۇلشارا ابدىقالىقوۆا قازىرگى تاڭدا قىزمەتكەرلەرگە تەڭ ەڭبەك جاعدايىن جاساۋ, ەڭبەكتى قورعاۋدى باسقارۋدىڭ زاماناۋي جۇيەسىن ەنگىزۋ بويىنشا جۇمىس بەرۋشىلەردىڭ مىندەتتەرى مەن جاۋاپكەرشىلىگىن بەكىتۋدى كوزدەيتىن زاڭ جوباسى ازىرلەنگەنىن, قۇجات جاقىن ارادا پارلامەنتكە جىبەرىلەتىنىن مالىمدەدى. «العا قويىلعان تاپسىرمالاردى جۇزەگە اسىرۋ ءۇشىن شەتەلدەن جۇمىس كۇشىن تارتاتىن كاسىپورىنداردا شيەلەنىستىڭ الدىن الۋ جانە بولدىرماۋ ءىس-شارالار جوسپارى ازىرلەنۋدە. كەيبىر كاسىپورىنداردا تەكسەرۋلەر جۇرگىزۋ جوسپارلانعان. ونىڭ قورىتىندىسىنا ءسايكەس, زاڭنامالىق اكتىلەردى جەتىلدىرۋ بويىنشا كەشەندى ۇسىنىستار ازىرلەنەتىن بولادى», دەدى ۇكىمەت باسشىسىنىڭ ورىنباسارى.
«پرەزيدەنتتىڭ تاپسىرمالارىن ورىنداۋعا ارنالعان جوسپاردى ساپالى ءىسكە اسىرۋ كەرەك. پرەزيدەنت ۇكىمەت جۇمىسىنا سەنىم ءبىلدىرىپ, ۇكىمەت پەن اكىمدىكتەر الدىنا ماڭىزى ۇلكەن مىندەتتەر قويدى. بۇل – ۇلكەن جاۋاپكەرشىلىك. سوندىقتان ءبىز وسى سەنىمدى تولىعىمەن اقتاۋىمىز كەرەك. مەملەكەت باسشىسىنىڭ بارلىق تاپسىرمالارىن ورىنداۋ ماقساتىندا ءتيىستى ءىس-شارالار جوسپارى ازىرلەندى. جوسپاردى تولىقتاي ءارى ساپالى ورىنداۋىمىز كەرەك», دەدى ا.مامين.
