قاراشاڭىراقتىڭ يەسى قازاق حالقىنىڭ تاريحىنا, تىلىنە, سالت-داستۇرىنە زور قۇرمەتپەن قاراۋ – قازاقستانداعى جالپىۇلتتىق بىرلىكتىڭ ۇيىتقىسى. وسىنداي قۇندىلىقتاردى دارىپتەيتىن «قازاقتانۋ» عىلىمي-اعارتۋشىلىق جوباسىنىڭ تۇساۋكەسەرى ەلباسى نۇرسۇلتان نازارباەۆتىڭ باستاماسىمەن قازاقستان حالقى اسسامبلەياسىنىڭ XXVI سەسسياسىندا جاسالدى.
اتالعان جوبانىڭ اياسىندا ەلوردالىق قحا عىلىمي-پراكتيكالىق كونفەرەنتسيا ۇيىمداستىردى. بۇل ءىس-شاراعا مەملەكەتتىك قايراتكەرلەر, پارلامەنتتىڭ دەپۋتاتتارى, نۇر-سۇلتان قالاسىنداعى ەتنومادەني بىرلەستىكتەردىڭ وكىلدەرى, ساراپشىلار جانە جاستار قاتىستى. كونفەرەنتسيا باستالماستان بۇرىن عيمارات ىشىندەگى قازاقتىڭ كيىز ۇيىندە بارلىق ەتنوس وكىلدەرى ءبىر شاڭىراقتىڭ استىنا جينالدى. كيىز ۇيگە جيىلعان اعايىن بەرەكەلى داستارقاننان ءدام تاتىپ, ابايدىڭ عيبراتقا تولى ءان-جىرىمەن قۇلاق قۇرىشىن قاندىردى.
القالى جيىندا العاشقى بولىپ نۇر-سۇلتان قالاسى اكىمىنىڭ ورىنباسارى باقتيار ماكەن ءسوز الدى. ول «ىنتىماقتى ەلدىڭ ىرىسى مول» دەگەن اتالى سوزگە سۇيەنىپ, اۋىزبىرلىگى مەن تاتۋ تىرلىگى جاراسقان ەلىمىزدىڭ ءوڭىر-وڭىرىندە «قازاقتانۋ» جوباسى ءساتتى جۇزەگە اسىپ جاتقانىن ايتتى.
ال قحا توراعاسىنىڭ ورىنباسارى جانسەيىت تۇيمەباەۆ جوبانىڭ قازاقستاندا ءومىر ءسۇرىپ جاتقان ەتنوستار اراسىندا قازاق حالقىنىڭ مادەنيەتىن, تاريحىن, فيلوسوفياسىن جانە رۋحاني قۇندىلىقتارىن ناسيحاتتاۋعا ارنالعانىن ايتىپ, بۇل ۇرپاقتار ساباقتاستىعىنىڭ كوكجيەگىن كەڭەيتىپ, وتانعا دەگەن سۇيىسپەنشىلىكتى تەرەڭدەتە تۇسەتىنىن اتاپ ءوتتى.
– بىلتىر «قازاقتانۋ» جوباسىنىڭ اياسىندا رەسپۋبليكالىق دەڭگەيدە اقمولا, قىزىلوردا, قوستاناي جانە اتىراۋ وبلىستارىندا ءىس-شارالار ۇيىمداستىرىلدى. بۇل باستاماعا «كيەلى قازاقستان», «مەملەكەت تاريحى ينستيتۋتى», سونداي-اق قحا-نىڭ عىلىمي-ساراپتامالىق كەڭەسى اتسالىستى. جالپى, اتالعان جوبانىڭ اياسىندا 300-گە جۋىق ءىس-شارا ءوتىپ, بارلىعى 192 مىڭ ادام قاتىستى. ونىڭ ىشىندە اباي مۇرالارىن دارىپتەيتىن دۇنيەلەر دە بار. كەلەسى جىلى حاكىم اباي قۇنانباي ۇلىنىڭ 175 جىلدىق مەرەيتويى اتالىپ وتپەك. اتاۋلى شاراعا دەگەن قۇرمەت پەن ءىلتيپاتتىڭ ىزگىلىكتەرى وسى جىلدان باستالدى. «قازاقتى تانىعىڭ كەلسە, ابايدى وقى» دەگەن ۇستانىم قالىپتاسقان. بۇل بەكەر ايتىلعان ءسوز ەمەس, – دەدى ج.تۇيمەباەۆ.
بۇدان كەيىن ءسوز العان پارلامەنت ءماجىلىسى توراعاسىنىڭ ورىنباسارى ۆلاديمير بوجكو قازىر مەملەكەتتىك اپپاراتتا قازاق ءتىلىنىڭ دەڭگەيى تومەن ەكەنىن ايتىپ, قازاق پاتريوتيزمىنە نەگىزدەلگەن بىرلىكتى نىعايتا ءتۇسۋ ءۇشىن مەملەكەتتىك ءتىلدىڭ قادىرىن ارتتىرۋ كەرەكتىگىنە باسا ءمان بەردى.
باسقوسۋ سوڭىندا قاتىسۋشىلار جوبانى ودان ءارى ىلگەرىلەتۋ ماقساتىندا جوعارى وقۋ ورىندارىندا «قازاقتانۋ» ءپانىن ەنگىزۋ, دوستىق ۇيلەرىندە قازاق قولونەرىنە باۋليتىن ۇيىرمەلەر ۇيىمداستىرۋ سياقتى باستامالار كوتەردى.
