دەنيسسىز وتكەن ءبىر جىل

وسىدان تۋرا ءبىر جىل بۇرىن دەنيس تەننىڭ الماتى قالاسىنداعى قۇرمانعازى مەن بايسەيىتوۆا كوشەلەرىنىڭ قيىلىسىندا قاسكويلەردىڭ قولىنان اۋىر جارالانىپ، جانساقتاۋ بولىمىنە تۇسكەنى تۋرالى سۋىت حابار لەزدە تاراپ كەتتى. ەلىمىزدە عانا ەمەس، شەتەلدەردە دە كەڭىنەن تانىلىپ ۇلگەرگەن دەنيستىڭ بار الەمدەگى جانكۇيەرى ونىڭ اماندىعى ءۇشىن دۇعا تىلەگەن ەدى. وكىنىشكە قاراي، دەنيستى اجالدان اراشالاۋ مۇمكىن بولمادى. بۇل تەك قازاق سپورتىنىڭ عانا ەمەس، مانەرلەپ سىرعاناۋ الەمىندەگى ورنى تولماس قازا بولاتىن... دەنيستىڭ قازاسى ەشكىمدى دە بەيجاي قالدىرعان جوق. بارشا قازاقستان حالقى نامىستى ۇلىنان ايىرىلىپ، قايعىدان قان جۇتسا، الەمنىڭ ءار تۇكپىرىندەگى جانكۇيەر تانىمال سپورتشىدان كوز جازىپ قالعانىنا وكىندى. 

ميلليونداعان جانكۇيەر جۇرەگىنىڭ تورىنەن ورىن العان تالانتتى سپورتشى دەنيستىڭ قازاسىنان سوڭ، ونى ەسكە الۋعا ارنالعان ءتۇرلى ءىس-شارالار ۇنەمى وتكىزىلىپ تۇردى. اتاپ ايتار بولساق، 2018 جىلدىڭ 9 تامىزىندا دەنيس تەننىڭ اناسى وكسانا تەن ۇلىنىڭ اتىن وشىرمەۋ، دەنيستىڭ اتىنان ءتۇرلى ءىس-شارالاردى وتكىزىپ تۇرۋ ماقساتىندا قوعامدىق قور اشقانىن مالىمدەدى. 

2019 جىلدىڭ باسىندا دەنيستىڭ جانكۇيەرلەرى، دوستارى الماتى قالاسىنىڭ اكىمدىگىنە حالىق ارەنا مۇزسارايىن دەنيس تەننىڭ اتىنا بەرۋ تۋرالى ۇندەۋ جاساپ، ونلاين قول جيناۋ­دى باستادى. ءبىر كۇننىڭ ىشىندە مىڭعا جۋىق قول جينالدى. ارادا التى اي وتسە دە، مۇزسارايى سپورتشىنىڭ اتىنا ءالى كۇنگە دەيىن بەرىلگەن جوق. 13 اقپاندا دەنيس تەن تۋرالى «دەنيس تەن – ۆەليچايشەە شوۋ» اتتى دەرەكتى فيلم جارىققا شىقتى. فيلم دەنيستىڭ ءتورتىنشى ءارى سوڭعى «دەنيس جانە ونىڭ دوستارى» اتتى مۇز ايدىنىنداعى شوۋىنا دايىندىق تۋرالى باياندايدى. 

22 ماۋسىمدا الماتىدا دەنيس تەنگە ارنالعان ەسكەرتكىش ورناتىلدى. ەسكەرتكىش سپورتشى قايتىس بولعان قۇرمانعازى – بايسەيىتوۆا كوشەلەرى قيىلىسىنا ورناتىلعان. مۇسىندە سپورتشىنىڭ 2014 جىلى سوچيدەگى وليمپيادادا ونەر كورسەتۋ ءساتى بەينەلەنگەن. بۇل وليمپيادادا دەنيس تەن قولا جۇلدە ۇتىپ العان ەدى. ەسكەرتكىشتى سانكت-پەتەربۋرگ ءمۇسىنشىسى ماتۆەي ماكۋشكين جاساعان. 

سونىمەن قاتار دەنيستىڭ اتىنداعى تۋرنير حالىقارالىق كونكي سپورتى تۇرلەرى فەدەراتسياسىنىڭ (ISU) كۇنتىزبەسىنە ەندى. ال 20 شىلدە كۇنى الماتىدا قازاقستان جانە الەم جۇلدىزدارىنىڭ قاتىسۋىمەن «دەنيس تەن جانە ونىڭ دوستارى» اتتى مۇزدى شوۋ ءوتتى. شوۋعا ماو اسادا، ەلەنا راديونوۆا، تاتيانا تاراسوۆا، كەيتلين ۆيۆەر، ەندريۋ پوجە، يۆان بۋكين، الەكساندرا ستەپانوۆا قاتىسىپ، قالىڭ جانكۇيەرگە ءوز ونەرلەرىن كورسەتتى. 

قازاقستاننىڭ مانەرلەپ سىرعاناۋدان باي تاريحى مەن جەڭىسپەن ورىلگەن ءداستۇرى بولماسا دا، ەل سپورتشىلارىنىڭ بۇل سپورتتا دا جوعارى ناتيجەگە تالاسى بار ەكەنىن دەنيس بۇكىل الەمگە مويىنداتتى. سول ءۇشىن دە دەنيستىڭ اتى ءبىزدىڭ جۇرەگىمىزدەن مəڭگى ورىن الادى.