قازاقستان ۇلتتىق قۇراماسىنىڭ سپورتشىلارى سپورتتىڭ 10 ءتۇرى بويىنشا ەل نامىسىن قورعادى. ۋنيۆەرسيادا ويىندارىنا ۇلكەن قۇراممەن اتتانعاندار قاتارىندا سەمسەرلەسۋ سپورتىنىڭ 18 وكىلى يتاليا تورىندە باق سىناپ, بىردە-ءبىر مەدال ولجالاي المادى. سونداي-اق جەڭىل اتلەتيكادان سىنعا تۇسكەن 16 سپورتشىمىزدىڭ ىشىنەن تەك ميحايل ليتۆين عانا كۇمىس مەدال جەڭىپ الدى. ستۋدەنتتەر دوداسىنا 15 سپورتشىمەن بارعان تاەكۆوندوشىلار دا ءبىر كۇمىستى قاناعات تۇتۋعا ءماجبۇر بولدى. 87 كيلوعا دەيىنگى سالماقتا بەلدەسكەن سمايىل دۇيسەباي فينالدا قارسىلاسىنا ەسە جىبەردى. ساداق اتۋدان سەگىز, نىسانا كوزدەۋ جانە ستەند اتۋدان ون سپورتشىنىڭ تەك ەكەۋى عانا جۇلدەگە ىلىكتى. زويا كراۆچەنكو كۇمىس, سارسەنكۇل رىسبەكوۆا (سۋرەتتە) قولا مەدال يەلەندى. سپورتتىق جانە كوركەم گيمناستيكاداعى التى سپورتشىنىڭ ەكەۋى كۇمىس مەدال يەلەنسە (ناريمان قۇربانوۆ پەن ميلاد كاريمي), ون دزيۋدوشىنىڭ ىشىندە اۋىر سالماقتاعى عالىمجان قىرىقباي عانا ۋنيۆەرسيادانىڭ باس جۇلدەسىن ولجالادى. ال تەننيس جانە ءجۇزۋ سپورتىنان جارىسقا قاتىسقان سپورتشىلاردىڭ قورجىنى بوس قايتتى.
بيىلعى جازعى ۋنيۆەرسيادانىڭ قورىتىندىسى بويىنشا, 94 سپورتشىمىز 1 التىن, 5 كۇمىس جانە 1 قولا جۇلدە يەلەندى. جالپىكوماندالىق ەسەپتە ءبىزدىڭ ستۋدەنتتەر 7 مەدالمەن 25-ورىنعا تۇراقتادى. ال مەدال كورسەتكىشى بويىنشا ۇنەمى قازاقستاننان كەيىن تۇراتىن وزبەكستان قۇراماسى 2 التىن, 2 كۇمىس جانە 4 قولا مەدالمەن 19-ورىنعا كوتەرىلدى. جالپى كوماندالىق ەسەپ بويىنشا بۇل جىلى دا جاپونيا قۇراماسى ءبىرىنشى بولدى. كۇنشىعىس ەلى ستۋدەنتتەرىنىڭ ەنشىسىندە 82 مەدال بار (33 التىن, 24 كۇمىس جانە 28 قولا). رەسەي فەدەراتسياسىنىڭ سپورتشىلارى جاپونيامەن بىردەي مەدال جيناعانىمەن, التىن سانى بويىنشا (22, 24, 36) ەكىنشى ورىندا تۇر. ال ءۇشىنشى ورىنداعى قىتاي قۇراماسىنىڭ قورجىنىندا 43 مەدال بار (22, 13, 8).
ەكى جىل سايىن تۇراقتى تۇردە ۇيىمداستىرىلىپ تۇراتىن ستۋدەنتتەردىڭ كەلەسى ۋنيۆەرسيادا ويىندارى 2021 جىلى قىتايدىڭ چەندۋ قالاسىندا وتەدى.
