جىل باسىنان بەرى ەلىمىزدە بىرنەشە مارافون وتكىزىلدى. جارىستار نەگىزىنەن نۇر-سۇلتان جانە الماتى قالالارىندا ۇيىمداستىرىلدى. وتكەن جەكسەنبىدە ەل استاناسىندا ترياتلوننان الەمدەگى ەڭ باستى جارىستىڭ ءبىرى وتكەن بولاتىن. Ironman 70.3 دەپ اتالاتىن مۋلتيسپورتتىق دوداعا الەمنىڭ 50 ەلىنەن 1400-قا جۋىق قاتىسۋشى جينالدى. ءۇش كەزەڭنەن تۇراتىن مارافون ەلوردامىزدا وسىمەن ەكىنشى رەت وتكىزىلىپ وتىر. مارافون ەرەجەسى بويىنشا, سپورتشىلار ەسىل وزەنىندە 2 شاقىرىم ءجۇزىپ, ودان كەيىن 90 شاقىرىم ۆەلوسيپەدپەن ءجۇرىپ, 21,1 شاقىرىم جۇگىرۋى شارت ەدى. ءتۋرنيردىڭ تولىق مارشرۋتى 113 شاقىرىمعا سوزىلدى. لوندون وليمپياداسىنىڭ چەمپيونى, ۆەلوشاباندوز الەكساندر ۆينوكۋروۆ قاتىسۋشىلار قاتارىنان كورىندى. ايتا كەتەتىنى, جارىسقا قاتىسۋشىلار اراسىندا كوش باستاعان الەكساندر ۆينوكۋروۆ پەن ەكاتەرينا شاتنايا بولدى.
بيىلعى مارافوننىڭ ەڭ جاس قاتىسۋشىسى – سانجار ءبازىلجانوۆ. 18 جاسار وتانداسىمىز اتالعان شاراعا ءبىر اي دايىندالعانىن ايتتى. «شاراعا دايىندىقتىڭ ءوزى وڭاي بولمادى. قولداۋشىلارىمنىڭ, باپكەرىمنىڭ ارقاسىندا بۇگىنگى ناتيجەگە قول جەتكىزدىم. بارلىق كەزەڭدى ارتتا قالدىرعان سوڭ, قولداۋى بار ادامنىڭ قولىنان كەلمەيتىنى جوعىن ءتۇسىندىم», دەيدى جاس قاتىسۋشى. سانجار Adal Volunteer Club دەپ اتالاتىن تالانتتى ەرىكتىلەر ۇيىمىنىڭ نەگىزىن قالاۋشى. باسقارىپ وتىرعان ۇيىمى ەلىمىزدىڭ بىرنەشە قالاسىندا جۇمىس ىستەيدى.
ۇيىمداستىرۋشىلاردىڭ ايتۋىنشا, مارافوننىڭ ورتا جاسى جىل سايىن ازايىپ كەلەدى ەكەن. بۇل قاتىسۋشىلاردىڭ كوبى جاستار بولىپ جاتقانىن كورسەتەدى. ماسەلەن, مامىردا وتكەن BI Marathon 2019 شاراسىنداعى 1931 قاتىسۋشىنىڭ 953-ءى جاستار. جىل باسىنان بەرى وتكىزىلگەن مارافونداردىڭ جارتىسى قايىرىمدىلىق ماقساتىندا بولعانىن ايتىپ وتكەن دە ءجون. بۇل جاستاردىڭ سالاماتتى ءومىر سالتىمەن بىرگە قوعامدىق شارالاردا دا كومەك كورسەتۋگە دەگەن نيەتىن كورسەتەدى.
