شىلدە ايى بارىسىندا اقتاۋ, اتىراۋ جانە اقتوبە قالالارىنداعى «شاتتىق», «رادۋگا» جانە «جىگەر» مەكتەپتىك جازعى لاگەرلەرىنىڭ وقۋشىلارى اسكەري بولىمدەرگە قوناق بولىپ كەلۋدە. ءىس-شارانى ۇيىمداستىرۋشىلار اسكەريلەردىڭ ومىرىمەن ىشتەن كورىپ باقىلاۋ ارقىلى, وسكەلەڭ ۇرپاقتىڭ بويىندا پاتريوتتىق سەزىم ويانىپ, تۋعان جەرگە دەگەن ماقتانىشى ارتىپ, وتانىنا قىزمەت ەتۋگە دايىن بولۋعا تاربيەلەيدى دەگەن ماقسات قويىپتى. ءىس-شارانىڭ بارىسىندا 300-دەن اسا وقۋشىنىڭ اسكەري بولىمدەرگە كەلۋى جوسپارلانعان.
اشىق ەسىك كۇندەرى بارىسىندا وقۋشىلار اسكەري ومىرمەن تانىسىپ, وفيتسەرلەر مەن سەرجانتتارمەن سۇحباتتاسۋ بارىسىندا وزدەرى ءۇشىن كوپتەگەن قىزىقتى دەرەكتەر مەن مالىمەتتەردى الدى. ولار اسكەرگە كەلىپ تۇسكەن زاماناۋي تەحنيكالار مەن قارۋ-جاراق ۇلگىلەرىمەن تانىسىپ, اسكەري قىزمەتشىلەردىڭ كاسىبي شەبەرلىكتەرىن ءوز كوزىمەن كورە الدى. سونىمەن قوسا, ولار ساربازداردىڭ ءۇي-جايلارىن, وقۋ سىنىپتارىن, سپورت قالاشىقتارى مەن اسحانانى ارالاپ شىقتى.
- بىزدەر بۇگىن ناعىز اسكەري قىزمەتشىلەردىڭ ومىرىمەن تانىسىپ, ولاردىڭ قىزمەتتەرىنىڭ جوعارى جاۋاپكەرشىلىك پەن ۇدايى كاسىبي دايارلىقتى قاجەت ەتەتىنىنە كوزىمىز جەتتى. كەلەشەكتە مىندەتتى تۇردە وتان الدىمداعى بورىشىمدى ابىرويمەن اتقارىپ, ناعىز ەر ازامات اتانۋدى الدىما ماقسات ەتىپ قويدىم, دەيدى اقتاۋ قالاسىنىڭ № 7 ورتا مەكتەپتىڭ وقۋشىسى امانگەلدى ءىزباسار.
ماڭعىستاۋ وبلىسى
