قوردىڭ قاراجاتىنا ءارقايسىسى ەكى وتباسىنا ارنالعان «دۋپلەكس» ءتيپتى 50 تۇرعىن ءۇي سالىنادى دەپ جوسپارلانىپ وتىر. يگى باستامانىڭ دەمەۋشىلەرى قۇرىلىستىڭ تاپسىرىس بەرۋشىلەرى رەتىندە ونى تىكەلەي ءوز باقىلاۋىنا الادى. مەردىگەر ۇيىم دا تاڭدالىپ قويىپتى. كوزدەلگەن شارۋا قىركۇيەك ايىنىڭ ورتا تۇسىنا قاراي اياقتالماق. قور وكىلدەرى, قۇرىلىس بىتكەن سوڭ قاجەتتى تۇرمىستىق تەحنيكامەن تولىققاندى سانيتارلىق توراپتارمەن جاراقتالعان باسپانا قونىستانۋعا دايىن بولاتىنىن ايتادى. تۇرعىزىلاتىن ءۇيدىڭ اۋدانى 10 سوتىق جەر تەلىمىنەن تۇراتىندىقتان, ءار وتباسى ءوز باۋ-باقشاسىندا جەمىس-جيدەك پەن كوكونىس تۇرلەرىن وسىرەدى.
«بۇكىل قازاقستان ارىستا بولعان جاعدايعا قايعىردى, بۇل وقيعا ەلىمىزدىڭ ءاربىر ازاماتىن ەلەڭدەتتى. ءبىز وتانداستارىمىزعا قولداۋ كورسەتىپ, قالانى قالپىنا كەلتىرۋگە ءوز ۇلەسىمىزدى قوسقىمىز كەلەدى. سوندىقتان قوردىڭ قۇرىلتايشىسى باسپاناعا مۇقتاج قازاقستاندىقتار ءۇشىن ۇيلەردىڭ قۇرىلىسىنا باعىتتالعان «بالامەكەن» جوباسىن كەڭەيتۋگە جانە جالعاستىرۋعا شەشىم قابىلدادى. جوبا اعىمداعى جىلدىڭ كوكتەمىندە قىزىلوردادا باستالعان بولاتىن. وندا قور بولگەن اقشاعا 100 تۇرمىسى تومەن وتباسى ءۇشىن باسپانا تۇرعىزىلدى. ءوزىمىز قىزىلوردادا قولدانعان وڭ تاجىريبەنى ەندى ارىستا قولدانامىز», – دەيدى بولات وتەمۇراتوۆ قورىنىڭ ديرەكتورى مارات ايتماعانبەتوۆ.
سول سەكىلدى شاعىن اۋداننىڭ قۇرىلىسىنا ارنالعان جەر ۋچاسكەسى بەلگىلەنىپ, قاجەتتى ينفراقۇرىلىمدىق جەلىلەر دە سالىناتىنىن ايتادى قايىرىمدىلىق قور مۇشەلەرى. بۇعان دەيىن اتالعان ۇكىمەتتىك ەمەس ۇيىم ارىستاعى اپاتتان زارداپ شەككەن 2 مىڭ تۇرعىنعا «كومەك كارتاسى» جوباسى نەگىزىندە 60 ملن تەڭگە بولەتىنىن حابارلاعان-دى. بۇل سوما كوپ بالالى وتباسىلارعا جانە مۇمكىندىگى شەكتەۋلى جاندارعا بەرىلەدى.
ايتا كەتەيىك, وتكەن ايدا ارىس قالاسىنداعى اسكەري ءبولىمشەدە وق-ءدارى قويماسى جارىلىپ, ءۇش ادام قايتىس بولعان. ءبۇگىندە اتالعان ايماقتا توتەنشە جاعدايدىڭ سالدارىن رەتتەۋ بويىنشا جۇمىس جۇرگىزىلىپ جاتىر.
جاقسىلىق مۇراتقالي,
«Egemen Qazaqstan»
