بۇل جيىننىڭ القيسساسى, ياعني بنەق I سەزى 2017 جىلى مينسك قالاسىندا (بەلارۋس رەسپۋبليكاسى) باستالعان. ويتكەنى ەۋرازيا كەڭىستىگىندە بالالار دەنساۋلىعىنا قاتىستى بۇگىنگى وزىق تەحنولوگيالارعا سۇيەنگەن, ماماندانعان نەيروحيرۋرگيالىق سان ءتۇرلى كۇردەلى مانيپۋلياتسيالاردى جاساۋدا تاجىريبە الماسۋ, وقىپ-توقىپ, ءبىلىم الۋ, ونى پراكتيكادا قولدانۋ ماسەلەلەرىن ءبىرىگىپ, اقىلداسا وتىرا ءجون-جوباسىن كەلتىرۋ وسى سالاداعى قانداۋىرلى دارىگەر قاۋىمىنىڭ ويىندا ءبىرازدان بەرى جۇرەتىن. سول نيەتپەن ەڭ الدىمەن بالالار نەيروحيرۋرگتارىنىڭ ەۋرازيالىق قاۋىمداستىعىن قۇرۋدىڭ نەگىزگى يدەياسى ءپىسىپ-جەتىلىپ, ول اتالعان كەڭىستىكتەگى بالالار نەيروحيرۋرگتارىنىڭ اراسىندا عىلىمي جانە تاجىريبەلىك جەتىستىكتەرمەن الماسۋ, بالالار نەيروحيرۋرگياسى سالاسىنداعى مامانداردى وقىتۋ, بايلانىستار ورناتۋ سىندى كەشەندى ماسەلەلەردى قامتىدى. وسىلايشا وسىدان ەكى جىل بۇرىن مينسكىدە باستاۋىن الىپ, جالعاسىن قازاق جەرىندە تاپقان سەزدە ەۋرازيا ايماعىنداعى بالالار نەيروحيرۋرگياسىنىڭ دامۋى مەن ونىڭ كەلەشەگىن, بۇگىنگى تاڭداعى وزەكتى ماسەلەلەرىن تالقىلايتىن الاڭعا جيىلعان كوپتىڭ ىشىنەن سالانىڭ جىلىگىن شاعىپ, مايىن ىشكەن الەمگە تانىمال مامانداردىڭ كورىنۋى فورۋمنىڭ باعاسى مەن ءمانىن اشا تۇسكەندەي.
القالى جيىننىڭ سالتاناتتى اشىلۋ راسىمىندە ءسوز العان دەنساۋلىق ساقتاۋ ۆيتسە-ءمينيسترى ءلاززات اقتاەۆا: «ەلىمىزدەگى بالالار نەيروحيرۋگياسىنىڭ جەتىستىكتەرى ۇلتتىق نەيروحيرۋرگيا ورتالىعىمەن بايلانىستى. سەرىك اقشولاقوۆ باسقاراتىن وسى ورتالىقتان ەلىمىزدىڭ ءار ايماعىنان كۇردەلى نەيروحيرۋرگيالىق وپەراتسيانى قاجەت ەتەتىن پاتسيەنتتەر جوعارى تەحنولوگيالى, ساپالى مەديتسينالىق كومەك الىپ, ساۋىعىپ قايتۋدا» دەي كەلە فورۋم جۇمىسىنا تابىس تىلەدى.
مەملەكەت باسشىسىنىڭ 2019 جىلدى جاستار جىلى دەپ جاريالاعانىنا بايلانىستى سەزدە جاس ماماندارعا قولداۋ كورسەتۋ دە نازاردان تىس قالماعان. سول ءۇشىن فورۋم شەڭبەرىندە جاس نەيروحيرۋرگتەر باياندامالارىنىڭ بايقاۋى وتكىزىلىپ, وعان جاقىن جانە الىس شەتەلدەردەن نەيروحيرۋرگيا سالاسىنداعى ۇزدىك باياندامالارىمەن جاس دارىگەر نەيروحيرۋرگتەر قاتىساتىنى جوسپارلانعان ەكەن.
ۇلتتىق نەيروحيرۋرگيا ورتالىعىن وسى سالانىڭ فلاگمانى دەسە ەش ارتىق ەمەس. بۇكىل ەل اۋماعىندا مي, ومىرتقا جوتاسى, ج ۇلىن-جۇيكە جۇيەلەرىندە اقاۋى بار ادامداردىڭ قىسىلعاندا جاندارىنا سايا, ەمىنە شيپا ىزدەپ الاڭداپ, ءۇمىت ارتا ەلەڭدەپ كەلەر ورنىنا اينالعان وسى ورتالىقتا اشىلعان كۇننەن بەرى ەرەسەكتەر مەن كىشكەنتاي پاتسيەنتتەرگە 3000-نان اسا وپەراتسيا جاسالسا, سونىڭ ىشىندە جىل سايىن نەرۆ جۇيەسىندە اسا كۇردەلى پاتولوگياسى بار 500-دەي بالا ورتالىقتا جوعارى بىلىكتى نەيروحيرۋرگيالىق كومەك الىپ وتىرادى. پاتسيەنتتەرىنە ەسىگىن ايقارا اشقان 11 جىل ىشىندە ورتالىقتا 5000-داي بالا ەم قابىلداپ, ورتالىق نەرۆ جۇيەسى دامۋىنىڭ اۋىتقۋلارىنا, فۋنكتسيونالدى نەيروحيرۋرگيا, مي ىسىكتەرىنە نەيروناۆيگاتسيا, ينتراوپەراتسيالىق نەيرومونيتورينگ ەندوسكوپيالىق, ەندوۆوسكۋليارلىق قۇرال-جابدىقتى قولدانۋمەن 4000-نان اسا وپەراتسيا جاسالدى. بۇگىنگى تاڭدا ورتالىق پاتسيەنتتەردى دياگنوستيكالاۋدان باستاپ, ەرتە وڭالتۋمەن اينالىساتىن مەديتسينالىق قىزمەتتەردىڭ تولىق سپەكترىن كورسەتەتىن قازاقستانداعى مامانداندىرىلعان جالعىز كلينيكا.
سەزدەگى شامالى ءۇزىلىستى پايدالانىپ «ۇلتتىق نەيروحيرۋرگيا ورتالىعى اق» باسقارما توراعاسى, قازاقستاننىڭ ەڭبەك ەرى سەرىك اقشولاقوۆتى سوزگە تارتتىق. «نەيروحيرۋرگيا سالاسىنىڭ اۋرۋلارى باس, مي, جۇلىن, ومىرتقا, ميدىڭ قان تامىرلارىندا تۋا بىتكەن جانە جاراقات الۋدىڭ سالدارىنان بولادى. ەلىمىز بويىنشا بالالار نەيروحيرۋرگياسى سوڭعى كەزدەرى ساپالى مەديتسينالىق كومەك بەرۋدىڭ جوعارى ساتىسىنا كوتەرىلدى دەپ ايتا الامىن, سەبەبى ورتالىعىمىزدا 25 ورىندىق بالالار ءبولىمىنىڭ اشىلۋىمەن جۇمىس ءوز ىرعاعىن تاپتى. ءارينە ورىننىڭ ازدىعى سەزىلەدى, اۋىراتىن بالالاردىڭ سانى وتە كوپ, بۇكىل ەل اۋماعى ءۇشىن 25 ورىن دەگەن نە؟ سول سەبەپتەن وبلىستارداعى كلينيكالاردىڭ جانىنان 5-10 بالاعا ارنالعان نەيروحيرۋرگيالىق وپەراتسيا جاسايتىن ورىندار اشتىق. ءبىزدىڭ ورتالىقتا ميشىقتىڭ ىسىكتەرى, مي قابىرشاقتارىنىڭ ىسىكتەرى سىندى كۇردەلى وپەراتسيالار ءساتتى وتكىزىلىپ ءجۇر. سونىمەن بىرگە نازارىمىزدا بالالار ەپيلەپسياسى تۇر. ەسەيىپ كەتكەن ەرەسەك ادامدى بۇل اۋرۋدان ناتيجەلى ەمدەۋ قيىن, ال بالالاردا جاقسى ىلگەرىلەۋگە قول جەتكىزىلەدى. بۇل رەتتە ىزدەنىستەر مەن تىنباي جاسالعان جۇمىستاردىڭ ناتيجەسىندە جەتىستىكتەرىمىز بار. قازىردىڭ وزىندە 200-گە تامان ەپيلەپسياعا وپەراتسيا جاسالدى. ال وسى وپەراتسيا جاساۋ ءۇشىن شامامەن 2000 بالانى تەكسەرۋدەن وتكىزدىك. سەبەبى اتالعان دياگنوزى بار بالالاردىڭ 10 پايىزىن عانا وپەراتيۆتىك جولمەن ەمدەۋگە بولادى, قالعانى وپەراتسياعا جاتپايدى», دەيدى سەرىك قۋاندىق ۇلى.
ەلىمىزدە بنەق II سەزىن ءوتكىزۋ وتاندىق مامانداردىڭ ءمۇمكىندىگىن بۇرىنعىدان دا كەڭەيتەدى, ويتكەنى سان ءتۇرلى باعىتتار بويىنشا تاجىريبە الماسۋ, جاڭا تاجىريبە, تەحنولوگيالار مەن بىلىممەن ءبولىسۋ, ارىپتەستەرمەن تانىسۋ 3 كۇن ىشىندە تولاسسىز جۇرگىزىلمەكشى. سەزد جۇمىسىنا 15 مەملەكەتتەن: رەسەي, بەلورۋسسيا, ارمەنيا, ۋكراينا, گەرمانيا, برازيليا, يزرايل, قىتاي, اقش, گرۋزيا, وزبەكستان, مولدوۆا, تاجىكستان, قىرعىزستاننان 250-دەن اسا مامان كەلىپ, پلەنارلىق جيىننان باسقا تاقىرىپتىق سەكتسيالىق وتىرىستار, پلەنارلىق دارىستەر, ساتەلليتتىك سيمپوزيۋمدار جانە پوستەرلىك سەسسيا وتەدى.
