كەزەكتەن تىس كونفەرەنتسياعا 245 دەلەگات سايلاندى. ال كۇن تارتىبىندە «Nur Otan» پارتياسى ماڭعىستاۋ وبلىستىق فيليالىنىڭ توراعاسىن سايلاۋ, «Nur Otan» پارتياسى ماڭعىستاۋ وبلىستىق فيليالى ساياسي كەڭەسىنىڭ قۇرامىنا وزگەرىستەر ەنگىزۋ جانە پارتيا الدىنداعى مىندەتتەر سىندى ءۇش ماسەلە قارالدى.
باسقوسۋدا ءسوز العان «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك پارتيا توراعاسى, ەلىمىزدىڭ تۇڭعىش پرەزيدەنتى نۇرسۇلتان نازارباەۆتىڭ بەرگەن بىرقاتار تاپسىرمالارىنىڭ ورىندالىسىنا ايرىقشا نازار اۋدارۋ قاجەتتىگىن ايتىپ, پارتيانىڭ باستاماسىمەن جۇزەگە اسىرىلىپ جاتقان جوبالاردىڭ ۋاقتىلى ءارى ساپالى ورىندالۋىنا باسا ءمان بەرۋگە شاقىردى. سونىمەن قاتار, كونفەرەنتسيا بارىسىندا «Nur Otan» پارتياسى ماڭعىستاۋ وبلىستىق فيليالىنىڭ جاڭا توراعاسى بولىپ وبلىس اكىمى سەرىكباي ترۇموۆ سايلاندى. توراعا كۋالىگىن سەرىكباي وتەلگەن ۇلىنا باۋىرجان بايبەك تاپسىردى.
سونداي-اق, پارتيانىڭ ماڭعىستاۋ وبلىستىق فيليالى ساياسي كەڭەسىنىڭ قۇرامىنا وزگەرىستەر ەنگىزىلدى. ياعني, بۇعان دەيىن پارتيا مۇشەلىگىندە بولعان ەرالى توعجانوۆ, شولپان يلمۋحانبەتوۆا, اسقار رزاحانوۆ جانە قالنياز وڭداباەۆ پارتيانىڭ ساياسي كەڭەسىنىڭ قۇرامىنان شىعارىلدى. ولاردىڭ ورنىنا «Nur Otan» پارتياسى ماڭعىستاۋ وبلىستىق فيليالى توراعاسىنىڭ ءبىرىنشى ورىنباسارى ەلۋباي ءابىلوۆ, «Yessenov Univercity» رەكتورى, پارتيانىڭ وبلىستىق فيليالى جانىنداعى «جوعارى تەحنولوگيالاردى دامىتۋ» كوميسسياسىنىڭ مۇشەسى بەرىك احمەتوۆ, «قاراجانباسمۇناي» اكتسيونەرلىك قوعامىنىڭ ءبىرىنشى ۆيتسە-پرەزيدەنتى سۇيىندىك الداشەۆ, «تۇلپارمۇنايسەرۆيس» جاۋاپكەرشىلىگى شەكتەۋلى سەرىكتەستىگىنىڭ شەبەرى, «جاسىل ەل» ەڭبەك جاساعى ماڭعىستاۋ وبلىستىق فيليالىنىڭ ديرەكتورى ساكەن مىڭباەۆ پارتيانىڭ ساياسي كەڭەسىنىڭ قۇرامىنا قابىلداندى.
ماڭعىستاۋ وبلىسى
