شىلدەنىڭ 10-ى كۇنى «ساۋدا-ەكونوميكالىق, عىلىمي-تەحنيكالىق جانە مادەني ىنتىماقتاستىقتىڭ قاعيداتتارى تۋرالى» ۇكىمەتارالىق كەلىسىمنىڭ شەڭبەرىندە «سامۇرىق-قازىنا» اق باسقارما توراعاسى احمەتجان ەسىموۆ پەن اليك ايدارباەۆ تاتارستان رەسپۋبليكاسىنىڭ پرەزيدەنتى رۋستام ميننيحانوۆپەن كەزدەستى. كەزدەسۋ بارىسىندا تاراپتار مۇناي-گاز سالاسىندا ىنتىماقتاستىقتىڭ جاڭا كەزەڭىن باستاۋعا ىنتا ءبىلدىردى. اتاپ ايتقاندا, گەولوگيالىق بارلاۋ جۇمىستارى, مۇناي جانە گاز حيمياسى, تەحنيكالىق ىنتىماقتاستىق جانە تسيفرلاندىرۋ ماسەلەلەرى بويىنشا تاتارستان رەسپۋبليكاسىنىڭ كاسىپورىندارى مەن قمگ اراسىنداعى ءوزارا ءىس-قيمىل مۇمكىندىكتەرى تالقىلاندى.
سول كۇنى «قازمۇنايگاز» ۇك اق جانە «تاتنەفت» جاق اراسىندا ءوزارا تۇسىنىستىك تۋرالى مەموراندۋمعا قول قويىلدى. قۇجاتتا قازاقستان مەن رەسەي اۋماعىندا گەولوگيالىق زەرتتەۋ جانە بىرلەسكەن گەولوگيالىق بارلاۋ جۇمىستارىن جۇرگىزۋ; مۇناي ءوندىرۋدىڭ جاڭا تەحنولوگيالارىن ەنگىزۋ جانە ءوندىرىستى تسيفرلاندىرۋ بويىنشا تاجىريبە الماسۋ سالاسىنداعى ىنتىماقتاستىقتىڭ بولجامدى باعىتتارى ايقىندالعان.
-مەموراندۋمعا قول قويۋ ارقىلى ءبىز بىرلەسكەن داڭعىل جولدىڭ جاڭا كەزەڭىنە جول اشاتىنىمىزعا سەنىمدىمىن. مۇناي-گازى بار كاسپي ماڭى ويپاتىن يگەرۋ ماسەلەسى ءىرى حالىقارالىق مۇناي كومپانيالارى ءۇشىن ۇلكەن قىزىعۋشىلىق تۋدىرىپ وتىر. رەسەيدىڭ, سونىڭ ىشىندە تاتارستاننىڭ كومپانيالارى وسى پروتسەسكە بەلسەندى قاتىسا الادى, دەپ قمگ باسشىسى اليك ايدارباەۆ تاتنەفت جانە قازمۇنايگاز كومپانيالارىن تەحنيكالىق اقپاراتپەن الماسۋ جانە ماماندار وقىتۋ سالاسىندا ۇزاق جىلعى بەرىك قارىم-قاتىناستار بايلانىستىراتىنىن اتاپ ايتتى.
تاراپتار قازان قالاسىنداعى كەزدەسۋ مۇناي-گاز سالاسىنىڭ قازىرگى سىن-تەگەۋىرىندەرىن تالقىلاۋعا ارنالعان الاڭ عانا ەمەس, سونداي-اق ىنتىماقتاستىقتىڭ جاڭا ءارى ءوزارا ءتيىمدى باعىتتارىن انىقتاۋدىڭ كەرەمەت مۇمكىندىگى ەكەنىن اتاپ ءوتتى. قاتىسۋشىلار كەزدەسۋ قازاقستان مەن تاتارستاننىڭ جەتەكشى مۇناي-گاز كومپانيالارى اراسىنداعى سەرىكتەستىك قاتىناستاردىڭ نىعايۋىنا ءوز سەپتىگىن تيگىزەتىنىنە سەنىم ءبىلدىردى.
ماڭعىستاۋ وبلىسى
