اقپارات سالاسى ماماندارىنىڭ ابىرويىن اسىرىپ, مەرەيىن تاسىتاتىن ايتۋلى Nur Suńqar كونكۋرسى بيىل ونىنشى رەت سالتانات قۇردى. وسى ارالىقتا بايقاۋ جۋرناليستەردىڭ قالامىن ۇشتاپ, شابىتىن شىڭداۋعا باعىتتالعان بەدەلدى ءىس-شاراعا اينالدى. مەرەيتويلىق ماراپاتتاۋ ءراسىمىن Nur Otan پارتياسى ءتوراعاسىنىڭ ءبىرىنشى ورىنباسارى باۋىرجان بايبەك اشىپ, قازىرگى تاڭدا جۋرناليستيكانىڭ قوعامداعى ءرولى مەن ىقپالىنا توقتالدى. «مەملەكەت باسشىسى قاسىم-جومارت توقاەۆتىڭ باستاماسىمەن 28 ماۋسىم جۋرناليستەر كۇنى رەتىندە ءوز الدىنا بولەك مەرەكە بولىپ بەكىتىلگەنىن جاقسى بىلەسىزدەر. بۇل – جۋرناليستەردىڭ قوعامداعى مارتەبەسىن ودان ءارى وسىرەتىن يگى باستاما. بيىل Nur Suńqar كونكۋرسى پرەزيدەنت سايلاۋىنا بايلانىستى مەرزىمىنەن كەش وتكىزىلدى. ون جىل بويى باق وكىلدەرىنىڭ ۇزدىكتەرىن انىقتاپ كەلگەن بۇل جولعى بايقاۋ Nur Otan پارتياسىنىڭ 20 جىلدىعىمەن تۇسپا-تۇس كەلىپ وتىر. بۇگىندە جاڭا تەحنولوگيالار دامىپ, ادامداردىڭ اقپاراتقا قانىعۋ مۇمكىندىگى كۇشەيدى. وسى تۇستا حالىققا شىنايى ءارى جەدەل حابار تاراتاتىن كاسىبي جۋرناليستەردىڭ ماڭىزى ودان سايىن ارتا ءتۇستى», دەدى باۋىرجان بايبەك.
سونداي-اق سالتاناتتى شارادا اقپارات جانە قوعامدىق دامۋ ءمينيسترى داۋرەن اباەۆ ءسوز الىپ, Nur Suńqar سىيلىعى مەديا-لاندشافقا سونى سەرپىن قوسىپ, ۇزدىكتەرگە لايىقتى ماراپات بولعانىن, وسىنداي ءىس-شارالار اقپارات سالاسىنداعى ىلكىمدى جۇمىستاردى ىلگەرىلەتەتىنىن ايتتى.
Nur Otan پارتياسى باستاماشى بولعان بيىلعى كونكۋرستىڭ ۇيىمداستىرۋ كوميتەتىنە 207 جۋرناليستەن مىڭعا جۋىق جۇمىس كەلىپ تۇسكەن. ولاردىڭ ىشىنەن ءسوزى جۇيەلى, ويى تياناقتى ۇزدىكتەردى پارلامەنت ءماجىلىسىنىڭ دەپۋتاتى قۋانىش سۇلتانوۆ توراعالىق ەتكەن كوميسسيا ءمۇشەلەرى جەڭىمپاز دەپ تانىدى. سونىمەن Nur Suńqar-2019 بايقاۋىنىڭ جەڭىمپازدارى 10 اتالىم بويىنشا قارا ءۇزىپ شىقتى.
ونىڭ ىشىندە ورنى ەرەكشەسى – قالامى توسەلگەن, شەبەرلىگى شىڭدالعان جۋرناليسكە بۇيىراتىن «ءسوز زەرگەرى» اتالىمى. بيىل بۇل اتالىمدى قازاق ءباسپاسوزىنىڭ قارا شاڭىراعى, عاسىرلىق تاريحى بار «Egemen Qazaqstan» گازەتى باس رەداكتورىنىڭ ورىنباسارى عابيت مۇسىرەپ يەلەندى.
سونىمەن قاتار ەلباسى قىزمەتىن ۇزدىك ناسيحاتتاعانى ءۇشىن «ەلباسى سالعان سارا جول» اتالىمىنا – يگور پروحوروۆ («كازاحستانسكايا پراۆدا» گازەتى), وتاندىق جۋرناليستيكانى دامىتۋعا قوسقان ۇلەسى ءۇشىن «مايتالمان» اتالىمىنا – نۇرتىلەۋ يمانعالي ۇلى («جەتىسۋ» تەلەارناسى), ۇزدىك گازەت ءجۋرناليسى رەتىندە «ماستەر سلوۆا» اتالىمىنا – تالعات ەسەنوۆ («ليتەر» گازەتى) جانە باعدارلامانى ىلگەرىلەتۋگە قوسقان ۇلەسى ءۇشىن «رۋحاني جاڭعىرۋ» اتالىمىنا بازاركۇل وتىنشيەۆا («استانا» تەلەارناسى) مەن ايگۇل كەمەلباەۆا («اباي» جۋرنالى) لايىق بولدى.
بۇعان قوسا ۇزدىك تەلەۆيزيالىق جۋرناليستەر ايبەك قوبداباي («Qazaqstan» تەلەارناسى) – «حالىق داۋىسى», جۇراعات بامان («حابار» تەلەارناسى) – «توچكا زرەنيا», ۇزدىك جاس جۋرناليستەر ساكەن ماحامەتكەرىموۆ, نازىمگۇل كۇمىسپاەۆا («حابار» تەلەارناسى) – «جاس سەرپىلىس», ينتەرنەت باسىلىمنىڭ ۇزدىك ءجۋرناليسى اقمارال ولجاباەۆا (Bnews.kz) «مەديا-پروفي» اتالىمدارىمەن ماراپاتتالدى. سونداي-اق «پارتيا جوبالارىن ۇزدىك ناسيحاتتاعانى ءۇشىن» ەكاتەرينا برىنيۋك («استانا» تەلەارناسى) پەن گۇلجان راحمانعا («ايقىن» گازەتى) سىيلىقتار تابىستالدى.
