بايقاۋدا قازىلار القاسىنىڭ وڭ باعاسىن العان توپ-20 ۇمىتكەر قوناقتاردىڭ الدىنا شىعىپ, تاعى دا ونەرلەرىن ساراپقا سالادى. ولار اقتوبە قالاسىنىڭ 150 جىلدىق مەرەيتويىنا ارنالعان كەڭ اۋقىمدى باسەكەنىڭ جۇلدەلى ورىندارى ءۇشىن باق سىنايتىن بولادى.
بىزگە ەرجان ماكسيم مەن نارگيز جانۇزاق سەكىلدى وسىنداي ۆوكالدىق ەسترادانىڭ جاس جۇلدىزدارىن سىيلاعان «Baqytty bala» فەستيۆالىنىڭ ءبىرىنشى ماۋسىمىنىڭ تارتىمدىلىعى جۇرتشىلىقتىڭ نازارىن اۋدارىپ قانا قويعان جوق, سونىمەن بىرگە, وقيعانىڭ اۋقىمىن دا, شاقىرىلعان قوناقتاردىڭ دەڭگەيىن دە كورسەتتى. بۇل ءىس-شارانىڭ مارتەبەسىن ارتتىرعانى ءسوزسىز.
ال الداعى كونكۋرستا قازىلار القاسىنىڭ مۇشەلەرى بولىپ شەتەلدىك بەلگىلى ورىنداۋشىلار مەن شوۋ يندۋسترياسىنىڭ قۇرمەتتى دە كاسىپقوي ماماندارى تاڭداپ الىندى. ولاردىڭ قاتارىندا «X-فاكتور» جوباسىنا قاتىسىپ, ءبىرىنشى كاستينگىنىڭ بەينەتاسپاسى YouTube حوستينگىنىڭ كەڭىستىگىندە ۆيرۋستىق تۋىندىعا اينالىپ, قازاقستاندىق كورەرمەننىڭ دە ەسىندە قالعان ۋكراينانىڭ تانىمال ءانشىسى ايدا نيكولايچۋك بار. تاۋەلسىز وكىل رەتىندە ايگىلى «گولوس» تەلەجوباسىنىڭ جۇلدىزى, گرۋزين ورىنداۋشىسى نيني تسنوبيلادزە شاقىرىلدى. سونداي-اق ساراپتامالىق كومانداعا ۆالەري لەونتەۆ, نيكولاي باسكوۆ, فيليپپ كيركوروۆ جانە تۇرىك حورى سياقتى توپ جۇلدىزدارمەن جۇمىس ىستەيتىن رەسەيدىڭ وكىلى, كومپوزيتور ەۆگەني ەۆزەروۆ كىردى.
قازىلار القاسىنىڭ قۇرامىنا ەلىمىزدەن ديماش قۇدايبەرگەننىڭ ساۋند-پروديۋسەرى جانە مۋزىكا كوركەمدەۋشى ەرلان بەكچۋرين, تانىمال كومپوزيتور ءارى ورىنداۋشى ۇلىقپان جولداس جانە ديماشتىڭ ۇستازى, ونىڭ بىرەگەي تالانتىن الەمگە تانىتقان قر ەڭبەك سىڭىرگەن مادەنيەت قايراتكەرى مارات ءايتىموۆ شاقىرىلدى.
الەمنىڭ 9 ەلىنەن (ۋكراينا, رەسەي, بەلورۋس, پولشا, وزبەكستان, قىرعىزستان, گرەتسيا, كانادا, مولدوۆا) كەلگەن ونەرپازداردان 500-دەن استام ءوتىنىم قابىلداعان فەستيۆالدىڭ اقتىق سىنىنا ىرىكتەۋ تۋرىندا گەوگرافيالىق جاعىنان وزگەرىستەر پايدا بولدى. قورىتىندىعا سايكەس, كونكۋرسقا 8 ەلدەن كەلگەن 20 ۇمىتكەر جىبەرىلەتىن بولادى.
«Baqytty bala» فەستيۆالدىڭ رەجيسسەرى اننا وبويانسكايا كونكۋرستىق وتىنىمدەر ساپاسىنىڭ ادەتتەگىدەن جاقسارعانىن جانە ورىنداۋشىلاردىڭ ۆوكالدىق دەڭگەيىنىڭ وسكەندىگىن ايتادى. ولاردىڭ اراسىندا حالىقارالىق دەڭگەيدە ءوزىن كورسەتىپ ۇلگەرگەن جەتكىنشەكتەر دە بار ەكەن. الايدا, اننانىڭ سوزىنە قاراعاندا, ىرىكتەۋ كەزىنىنىڭ نەگىزگى تالاپتارىنا ساي قاتىسۋشىلار ەرەكشە ۆوكالدىق جانە ارتىستىك قابىلەتتەرىن كورسەتۋى ءتيىس جانە بۇل تالاپ ءاردايىم ساقتالىپ قالا بەرمەك. سوندىقتان كاسىبي ورىنداۋشىلارمەن بىرگە توپ-20-عا الەمگە ءالى تانىلماعان, بىراق داۋسى كەرەمەت ۆوكالدىق الەۋەتكە يە شالعاي وڭىرلەردەن كەلگەن دارىندار دا تاڭدالعان.
اننا وبويانسكايانىڭ وزىنە كەلسەك, ول ۋكراينادان ارنايى شاقىرىلعان. ونىڭ جيناعىندا يتاليا, يسپانيا, تۇركيا جانە گرەتسيادا وتكەن حالىقارالىق اۋقىمداعى جوبالار, سونداي-اق «Bastau» اتتى ديماشتىڭ سولدىق كونتسەرتى بار.
ايتا كەتەرلىگى, بىلتىر اقتوبەلىك 4 بالا تاڭداۋلى 20 دارىننىڭ قاتارىنا ەنىپ, ولاردىڭ بىرەۋى 1, 2, 3-دارەجەلى, قالعان ۇشەۋى گران پري جۇلدەگەرى اتانعان بولاتىن. بۇل, ءوز كەزەگىندە اقتوبە اكىمدىگىنىڭ قازاقستان ەستراداسىنىڭ جارقىن جۇلدىزدارىن تاباتىن جانە وسىرەتىن تالانتتار فابريكاسى اتاعىنا لايىق ەكەندىگىن دالەلدەسە, ەكىنشىدەن, ءىس-شارانى جوعارعى دەڭگەيدە جانە جان-جاقتى ۇيىمداستىرۋعا سەرپىن بەردى. وسىنداي قولداۋدىڭ ارقاسىندا ترانسفەر, تاماقتانۋ جانە قاۋىپسىزدىك شارالارىن قوسا العاندا, كونكۋرس قوناقتارى مەن قاتىسۋشىلارىنىڭ ىڭعايلىلىعى ءۇشىن بارلىق قاجەتتى جاعدايلار كوزدەلگەن.
«اقتىق كونتسەرتتىڭ بيلەتتەرىن ساتۋدان تۇسكەن قاراجاتتىڭ ءبارى قالالىق مادەنيەت ءۇيى بالالار ۇجىمىنىڭ ماتەريالدىق-تەحنيكالىق بازاسىن جاڭارتۋعا جۇمسالادى», - دەپ ءتۇسىندىردى اقتوبە اكىمىنىڭ ورىنباسارى ايگۇل امانقازىقىزى.
ەسكە سالا كەتەيىك, «Baqytty bala» فەستيۆالى ديماش قۇدايبەرگەننىڭ جانە ونىڭ «ديماشالي» پروديۋسەرلىك ورتالىعىنىڭ جەتەكشىلىك ەتۋىمەن ۇيىمداستىرىلۋدا. الەم تىڭدارماندارىنىڭ جۇلدىزى ءارى ەركەسى قاتىسۋشىلاردىڭ ساپاسى مەن جوعارى كاسىبيلىگىنىڭ كەپىلى رەتىندە كونكۋرستىڭ بارلىق كەزەڭىنە جەكە ءوزى قاتىسۋدا.
ەلىمىزدە تەڭدەسى جوق جوباعا قازاقستان, رەسەي, وزبەكستان, ۋكراينا, گرەتسيا مەملەكەتتەرىنىڭ تانىمال وكىلدەرى اتسالىسادى. حالىقارالىق دەڭگەيدەگى ارتىستەر فەستيۆالدىڭ قازىلار القاسىنىڭ قۇرامىنا ديماش قۇدايبەرگەن, دانەليا تولەشوۆا, دجوردان اراكەليان, ۆلاد سىتنيك, جەڭىس ىسقاقوۆا, سۆەتلانا جانە قانات ايتباەۆتار كىرەدى.
