ىقىلاستىڭ وسكەن ورتاسىندا كۇيشىلىك ونەر ايرىقشا اسپەتتەلەتىن داستۇرگە اينالىپ, داۋلەسكەر كۇيشىلەردىڭ قالىڭ شوعىرى قالىپتاسقان. تاتتىمبەت, سارى, توقا, دايراباي, قىزداربەك, يتاياق, ءابدي سياقتى كۇيشىلەردىڭ ىقىلاس ءبىرىنىڭ داڭقىن ەستىپ, كۇيىن قۇلاعىنا قۇيىپ وسسە, كەيبىرىنىڭ كوزىن كورىپ, قادىرلەس, سىيلاس بولعان. بۇل ورتادا باعزىدان جەتكەن تەرىس بۇراۋ كۇيلەرى ۇشتالىپ, ءورىسىن ۇزارتقان. ىقىلاس بولسا سول ۇلى ءداستۇردى قوبىز تىلىندە جالعاستىرۋشى داۋلەسكەر كۇيشى. قورقىت اتادان كەيىن تاڭىرلىك اسپاپقا ادامنىڭ ءتىلىن دارىتىپ, جوعىن جوقتاتىپ, مۇڭىن مۇڭداتقان ءبىرتۋار كومپوزيتور.
ۇيىمداستىرۋشىلاردىڭ ايتۋىنشا, كەشتىڭ ماقساتى – ناسيحاتتالۋى كەمشىن ءداستۇرلى مۋزىكا مەن ونىڭ تانىمال تۇلعالارىنىڭ ءبىرى - ىقىلاس دۇكەن ۇلىنىڭ شىعارمالارىن تىڭدارمان نازارىنا ۇسىنۋ جانە ول تۋرالى تىڭ دەرەكتەردى رۋحاني اينالىمعا قوسۋ.
كەشكە بەلگىلى ونەر ادامدارى, مۋزىكاتانۋشى عالىمدار, كۇيشىلەر, انشىلەر جانە ىقىلاس دۇكەن ۇلىنىڭ ۇرپاقتارى قاتىسىپ, ىقىلاس دۇكەن ۇلىنىڭ شىعارمالارى تىڭدارمان نازارىنا ۇسىنىلماق. ىقىلاس دۇكەن ۇلى تۋرالى 1993 جىلى «قازاقتەلەفيلم» تۇسىرىگەن «ىقىلاس» اتتى دەرەكتى فيلم كورسەتىلەدى.
ال رۋحاني كەشتى بەلگىلى ونەرتانۋشى, كۇيشى, "شالقار" راديوسىنىڭ جۇرگىزۋشىسى سارسەنعالى ءجۇزباي مەن ءانشى, "شالقار" راديوسىنىڭ جۇرگىزۋشىسى جاسۇلان ناۋرىزباي ۇلى جۇرگىزەدى.
ىقىلاس تۇلعاسى رۋحاني تاريحىمىزدىڭ تورىنەن ورىن العان. ول - اتاقتى قورقىت بابادان كەيىنگى قوبىزعا ءتىل بىتىرگەن ادام.
قوبىزدىڭ قۇدىرەتتى ءۇنىن تۇرلەندىرىپ قۇبىلتقان ىقىلاس - عاسىر ءۇنىن عاسىرلارعا جەتكىزگەن اسقان كۇيشى. ونىڭ «اققۋ», «ەردەن», «قاسقىر», «جالعىز اياق», «جەز كيىك» جانە تاعى باسقا كۇيلەرى - حالىقتىڭ اسىل مۇراسى.
كونەدەن جەتكەن قوبىز ونەرىن ارتىندا قالعان مۇراگەرلەرى جالعاستىرىپ كەلەدى.
